“I ropuina chu khawngaih takin mi han entir teh.” (Exodus 33 : 18) He thu hi Mosia leh Pathian inbiakna a ni a. heta Lalpa chhanna kan hmuhah hian, Engkim chunga thuneitu a nihzia a lo lang a. “Ka thatna zawng zawng chu I hmaah ka lantir ang a, LALPA hming chu I hmaah ka puang zel ang. tichuan ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang. “Ka hmel zawng i hmu thei lo vang, mi hmua nung reng thei tumah reng reng an awm si lo,” a ti a. (Exodus 33 : 19 – 20) Pathian ropuina hmaa ding thei tur tumah kan awm loh turzia hei hian a tichiang hle awm e. Thlaler hnimbuk alh atanga kotu kha AWMA a ni a, chu AWMA chuan a awmpui reng a, chu chu LALPA Engkim siamtu leh Engkim chunga thuneitu a ni tih Exodus 3 – ah kan hmu bawk a, Mosia chu zam hle thin mahse, a tul apiang tithei turin LALPA chuan a hmang thin a ni. Mosia hnena Pathian inhriattirna hi thil pawimawh tak mai a ni a, “Ka duh apiang ka khawngaih ang a, ka duh apiang chungah zah ka ngai ang,” a tih tawngkam hian, Pathian chungnunzia leh Engkim chunga thuneitu, tuma sawisel phak loh a nihzia a tilang chiang hle a ni. Chutah tak chuan Mosia, mihring ve bawk, tling lo leh tlak lo, insit ngawih ngawih pawh chu LALPA chuan a mi Israelte chhanchhuaktu atan a thlang miau va, a hna ropui tak thawk tur chuan a khawngaihna leh zahngaihna chu lantirin, a hliahkhuh tlat thin a ni tih hi a ropui hle a ni. Keini pawh LALPAN a rawngbawl turin min ko va, kan tling lo chung chung tlingah min pawm a, vawiin thlenga a hna thawk thei tura a khawngaihna min hmuhtirin, a zahngaihna kan la chang mai zel hi a ropui em em a ni. A fel leh a tha tha thlan awm an nih laia, mi tling lo ber maite min han thlang mai hi i ngaihtuah ngai em? A chhan eng dang nilovin, “Ka khawngaih apiang chu ka khawngaih anga, zah ka ngaihna chung apiangah zah ka ngai ang,” a tihah khan, nang leh kei pawh min huam tel reng a lo ni. Lalpa hmel hmuh chakin, Mosia chuan Pathian awmpuina chu duh tawk lovin a hmel ngei hmuh adil a, Lalpa chuan “Ka hnung lam chu i hmu anga, ka hmel erawh chu i hmu lo vang,” ti-a chhangin, Lungpui keh kak karah chuan Mosia chu a thukru a, a kutin a hup a, Lalpa ropuina chuan a kal pel ta a, A hnung lam erawh chu a hmuh phal sak a ni. A ni, Hmaichhanah meuh chuan keini tehlul hian Pathian ropui chu kan hmu ngam lo vang. Amaherawh chu kan thil hmuh leh tawn chhoh mekah Pathian ropuina leh a hnathawh chu min hmuhtir zel zawk a, Lalpa chuan kan nunna derthawng tak chu Lungpui phenah chuan min lo hum thin a lo ni. “Ka Lalpa hmu lo mah ila, ka hnenah a awm reng fo,” tih hla siamtun a lo tih ang khan, hmu lo va ringtute chu a ni Engthawl kan tih thin chu ni.
Posted on: Tue, 30 Sep 2014 15:44:00 +0000
Trending Topics
Recently Viewed Topics
© 2015