## THLAPHUR 04 A Photographer’s Diary-II THIL HLUI NGAINAT: OLD IS GOLD ~ Lawrence S Khawzawl Guwahati Hmar Christian Fellowship members hai, abiktakin KTP haiin phur taka tarik 27 April 2014, April thla chawlni nuhnungtak ni a Pillangkata a ei Chapel a KTP Sports 2014 Follow-up Programme cum Fellowship and Prize Distribution hmang dinga ei insingsah a, zingkhawvar nghaka ei la in bawr bawr ding lai chun, ei Chawibiek inkhawmna hlak Guwahati Baptist Church, Panbazar hmuna inthawka hla raklo, Danish Road, Lakhtokia hmuna chun in hlui le hlu tak el, India President lo ni tah Fakhruddin Ali Ahmed lo umna hlak le a sunghai chengna in Rasul Lodge chu kangmei suok leiin a kang ta ut ut el a. Hi in hi Manipur Simthlang Biela Hmar ha’n chanchintha an dawng kum, kum 1910 lai a khah a chung rangva a hnuoi thingphek le lungrawchang inpawla bawlzo a nih a. Guwahati khawpui sunga ding khawma insawng hmasa pawl tak le a hun laia a khaw pumpuiin ha hipa an hrilh uoi uoi hlak in pakhat ve a nih. Chuong lawma in hlui le hlu a hei kangral el chu inpam a um hle a, mi tamtak chun Guwahati in a Rohlu a chan an ti hiel hrim a nih. Thil hi a hluisaha um chu vang hle’ng a tih. A tir chun thilthar a ni phawt hlak a, a hnungah hun hung fe peiin, a sawt a, a hung hlui lem chauh hlak. A hung hlui ta chun a hlutna khawm a hung zuol peia, ngainat a hung hlaw ta pei hlak a nih. Mihriem khawm hi ei naupang lai le ei thatlai huna chun rawnkai khawm ei hlaw naw el thei. Amiruokchu, mi a hung upa a, a hung tar deu deu ta chun, a hlutna a hung zuola min an pan rawn a, min iengkimah an hung rawn ta hlak a nih. Thil i hriet ta’m i hrietnaw ta’m, i upatna azarah mi rawnkai i hung nih a, min nanga khan thil hriet nuom an beisei ta hlak a nih. Chuongang bawk chun, thil dang khawm chengna In amanih, annaw leh insung thuomhnaw khawm niraw seh, a hung sawta a hung hlui deu deu ta chun, ngainat khawm a hung hlawsa pei ta hlak. Thil hlui ngainat kawnga hin eini tlangmi hai hi ei la var naw hle a, thil thar chu lawm vieu siin thilhlui chu ienga ding khawm ei ti nawh a, a tangkaina khawm ei hriet bik chuong nawh. Ei inmawl lei ni tho de sien khawm, hnam naupang ei la nina lei le hieng ang thil hlui ngaihlut ding ei la nei tlawm lei khawm ni ve ngei a tih. Eini rawi chu ngaihlut nek hman hmanin thil hlui chu Pathienthu lova ngaina nei hiel dam ei la um lem ta hman hman a. Ei thil hlui nei tlawm zie hre der lovin, thenkhatin Senvon Zopuitlanga ei pi le puhai rohlu Sikpui ruoi huna khuongpu inthungna Zawllung dam kha an hang letkhup tawp a. Pathien thlarauin an thawtir chu ninaw tawp a ta, chuong nek hmanin, mawl lei le thil hrietnaw taluo lei khawm ning a tih. chuong khela chun, thil hlui ngainatna chang hrietnaw lei ni sa bawkin ei pi le puhai thil hlu le ei ringtu sakhuo an kala hrietna indiknaw an nei lei khawm ning a tih. Amiruokchu, tuta thangthar thiemna tamtak nei huna khawm hieng ang lungril hiel nei ei la um hi chu an vet thlak hle el. Pi le puhai thil hlui le ei ringtu nun hin iengtak am inkalna a nei a? Hi Zawllung hin ei hnam ta dingin chanchin tamtak a min tung pek ani lem naw maw? Hnam upa inkhina pakhat chu thil hlui nei that le nei tam a khawm hin an nghat thuk hle lem. Hnam var lem hai hi an lo changkangna a sawt tah a, in le lo, thil ropui tak tak anl o indinna khawm a sawt tah a, thil hlui khawm an lo hau hle a. Chu zara chun, thil hlui humhal le ngainatna kawnga khawm an lo bengvar inhma a, hma khawm an lo lak tha thei hle. Chuong ninaw sien chu, vawisuna khawvel pumpuia thil hlui chanchin ei hriet le hmu dam, khawvela thilmak ropui ‘wonders of the world’ ti hai dam hi ei hmu kher di’m chu maw! India rama ngei khawm khawhlui tak tak dam, in hlui tak tak dam, British han an mi awp hma a Civilization hlui tak tak hai kuthnung a’nthawkin India zalenna a hmu hnung chena thil hlui tak tak humhal khawm a um a, chuong hai chu vawisun hin India mi chauin an hlut nawh a, khawvel pumpuiin an hlut em em a nih. India ta ding lem chun sum hnar tha tak niin, ram hrang hranga inthawk hieng thil hlui humhala um hai entu ding an hung zing bawk a nih. Tuta tuma ka assignment chu Guwahati khawpui sunga thil hlui, in hlui, dawr hlui dam, gate hlui dam annawleh, historical monuments dam thla lak kuol a nih a. Thla la dinga kan vaksuok hma hin ka thaw dan pangai angin Research ka thaw phawt hlak a. Website hrang hrangah mihai article ziek dam ka tiem a. Chu khela chun, library research ka beih nawk a, lekhabu dawra hai fe in Guwahati a thilhlui chungchang inziekna hai ka zawng khawm a. Chutaka ka thil hmu hai chu Guwahati khawpui sunga na na na khawm Uzan Bazar, Pan Bazar, Fancy Bazar, Paltan Bazar le Ulubari hai hi veng lo um hmasa pawl an nih a, abiktakin Pan Bazar lem hi chu a ni zuol bik a, building in hlui tak tak hai, dawr in hlui, college hlui le biekin hlui chen umna a nih a, a hlu em em a nih. (sunzawm ding...)
Posted on: Mon, 05 May 2014 05:31:26 +0000
Trending Topics
Recently Viewed Topics
© 2015