## THLARAM 29 Mi i thangpui ve hlak am ? ~James Neingaite Nikhat office pan dinga lampuia ka fe lai chun, iengkhawm ngaituo lawk um thak loivin, “Mi iengtin am i thangpui ve hlak a ?’’ ti zawna hi ka lungrila a hung lut vawng vawng a, chu zawna chu keikhawma ngaitha el loin ka ngaituo zui nghal a. Chu ni vek chun student iemanizat le hmel hriet dang hai khawma ka office thawkna le inzawmin thangpui an tul zie phone a an mihung hril a. Hlawkna beiseia zuk thangpui ding ni lang chu, a hlawk hmu thei dingin lampui khawm siem theina ngirhmuna ka um ve bawk. Amiruokchu, mi iengtin am ei thangpui ve tawl hlak ding. Mi ei thangpui nuom dan le thangpui hlak dan hai in ang kher vawng naw nih. Ei laina, sungkuo inhnai pui, ruoltha, ei hotu le a dang dang hai ei thangpui dan hai dang a ta. Mi ei thangpui nasan khawm in ang kher naw nih. A then chu a hlawk beiseina lei dam, a then chu hming that beiseina lei dam ning a tih. Thenkhat chu hlawkna beisei thakloa thangpui khawm um bawk an tih. Tulai chu condition um naw chun mi thangpui khawm harsa ei ti nuom vieu tah. Thangpui ei hang ti de a chu, “thangpui/ thawpek ka ti chea iem i mi pek ve ding?’’ ti hi ei lungrilah a um ve tlat hlak chu tie! Chu el bakah, ei thangpui haiin lawmthu an hril naw lem chun thangpui nawk chu a harsa awm hle ti naw chu lungrila thil dang chu a um bek ring a um nawh. Awleh! Pathien thuin iengtin ama a mi’n chuktir a? Luke 10:30-35 ei en chun, mi pakhat suomhmang haiin an sawisak thangpui ngai em em, hmel hriet ngailo, thangpui ngai hmuin a um a. Priest pakhat le Levi mi pakhat chun hmu hai sien khawm, an hel hmang ve veh a, a hnung deua hung Samari mi ruok chun a hei hmu chun a lunginsiet ta em em a, a pawpnahai chu puona tuomin, sahriek nal pekin a sabengtung ah inchuongtir el chau nilovin, khuolbuk ah chun thuoiin a sum hai khawm a seng ti thu hmuiin a um a nih. Samari mitha lungril thatak le feltak ang neiin eini hai teh mi ei thangpui ve hlak am? Ama ta dingin iengkhawm hlawkna ding nei naw sien khawm, a lungrila hmangaina a nei leiin a thangpui a nih ti chu a chieng em em. Mi po po mithmu ah thaw naw sien khawm, a thatzie hrietin a um tho tho a nih, Pathien ditzawng a thaw tlat leiin. Mathai 6:3 a chun chieng deuin “I kut changtiengin a thaw chu i vawitiengin hre naw raw se” a ti si! Pathien ringtu hai ei in-enkhina ding chu Bible chau hi a ni si. Chuleiin, mi ei thangpui chang hlawkna ding, hming thatna ding chau beiseia thaw mi ei lo ni chun thangpui tling zo naw nih, chu nek hmanin mi fahektu le Pathien thuah ringum naw le Pathien sukhmingsietu ni lem ei tih. Mi thangpui ei ti reng reng chu, mani hlawkna ding beisei thak lo le mani chan or hekna ding a um khawm pawisa lova thangpui hi thangpui a tling lem chau naw am a nih? A hlawkna ei hmu sung chu thangpui tling thei ngai naw nih. Isu Krista’n iengtin am a thangpui che a? I ta dingin a hringna pe in a thangpui naw che am a nih? Chuleiin, thangpui ngai hai ei thangpui changa hlawkna hmu naw inla khawm, pawi ti ve nawng ei tiu, ei beisei angin lawmthu dawng naw inla khawm, pawi ti bawk naw’ng ei tiu, mihai hrietlo le hmu loa mi i thangpui kha a rukin Pathienin a hmu zing che a nih ti a hin lawm lem ei tiu, chu chu a pawimaw em em a nih, Pathien ringtuhai hringnuna dingin. Chuleiin, mi thangpui theina ngirhmuna i um nawk pha chu a chunga Pathien thu khi lungrila vawng tlatin hmang tum ei tiu leh. Amen. Tiem tu hai po po Pathien malsawmna dawng seng dingin ditsakna kan hlan cheu!
Posted on: Mon, 30 Sep 2013 09:01:36 +0000
Recently Viewed Topics
© 2015