“Tira bo karga riba SEÑOR, i E lo sostenébo; nunka E lo pèrmití pa esun di bon boluntat wòrdu sakudí (Salmo 55:22)”. “Bin serka Mi tur ku ta kansá i kargá, i lo Mi duna boso sosiegu. Tuma Mi yugo riba boso, i siña di Mi, pasobra Mi ta mansu i humilde di kurason; i boso lo haña sosiegu pa boso alma. Pasobra Mi yugo ta suave i Mi karga ta lihé” (Mateo 11: 28 – 30). Kuantu di nos no ta bai den bida afligí pa problema i di buk bou di karganan pisa manera malesa, pleitu, debe, traishon, falta di speransa i desesperashon? Kuantu di nos ta pasa den tur e kosnan amargo aki djis pasobra nos no ta òf ke komprendé e loke beibel ta siña nos ku e dos pasashinan aki? Djis para ketu i pensa un ratu. Si bo kue un baranka grandi i pisá i transport’é pa espasio, ora bo yega den espasio e baranka aki no tin peso mas. Esaki pasobra riba mundu tur kos ta wòrdu goberná pa e lei di gravedat, ku ta preskribí ku tur tur kos riba mundu, tin un peso riba dje. Meskos, malesa, pleitu, debe, traishon, falta di speransa i desesperashon ta kosnan ku ta wòrdu goberná pa e sistema di pensa i atendé kos di mundu. Reino di Dios sinembargo, no konosé limitashon òf peso pa pisa nada manera mundu konosé. E ta e esfera spiritual perfekto, unda solamente perfekshon i realisashon ta eksistí. E ta esfera unda enbes di leinan ku ta pusha manda tur kos abou, ta eksistí e lei di amor divino, ku ta transformá, kura, sana, pasifiká, kuida, protehá, alegrá i embolbí tur tur kos ku nos por konfrontá den bida. I ta prestamentu esaki Kristu Hesus ta ofresé nos ora e bisa “tuma Mi yugo riba boso. Pasobra Mi yugo ta suave i Mi karga ta lihé”. Sa ku e minüt ku bo pone TUR bo kosnan, kiko ku bo por ta enfrentá òf konfrontá den man di Kristu Hesus, b’a tira bo karga riba Señor pa bo mes bai liber den bida. P’esei, bisa na bos haltu awe: “Mi ta tira ........ (kualke problema ku bo tin) riba Kristu Hesus i mi ta bai liber den bida pa risibí ......., (e loke bo ta deseá), AMEN. (Loke ami a siña di bida).
Posted on: Sat, 13 Jul 2013 18:16:55 +0000
Trending Topics
Recently Viewed Topics
© 2015