#V_Tualchhung Vanglaini, October 28, 2014 Chief minister-in RTI Week a hawng CM-in dilna tikhawmuang lo turin a chah Nimin khan Aizawl leh district headquarters tinah RTI Week hawnna inkhawm hman a ni. Chief minister Lal Thanhawla chuan, ṭangkai lehzuala Right to Information Act hmang turin mipuite a chah a, sorkar department tinte chu RTI Act hmanga information dilna tikhawmuang lo turin a chah bawk. RTI Week hawnna inkhawma khuallian, CM Lal Thanhawla chuan, Mizoramah corruption-in mi a ei chhiat nasat thu sawiin, utilisation certificate pek theih loh vangin Central aṭanga sum hmuh tur hmuh theih tak loh a tam thu a sawi a, Chungte chu sorkar hnathawk, a bikin officer-te zelthel leh inthlahdah vang a ni, a ti. Lal Thanhawla chuan, kawngpui siam lai vawi tam tak a hmuh tawh thu sawiin, chungah chuan PWD SDO leh EE-te a hmuh ngai loh thu a sawi a, An tih turah an ngai lo a ni mai thei. Mahse an tih tur a nih lohna ka hre lo, a ti a; police hotute pawh buaina leh harsatna thlenna hmunah kal ve zel se a duh thu a sawi. Revenue department-a surveyor-ten ram an inpek ṭhin thu sawiin, Lal Thanhawla chuan, Mi chhungkaw buaina an thlen fo, a ti a; tun hnaia buhfai tihchingpen man a nih thu sawi langin, Buhfai khawihtu zawng zawngte hi suspend vek an la ngai ang tih ka hlau khawp mai, a ti. Sorkar hnathawkten property return an ngaih pawimawh loh thu leh sorkar hnathawkten motor leh thil man tam tham ang chi lei dawn chuan sorkarah thlen hmasak a ngaih thu a sawi bawk. Chief minister chuan, diknain ro a rel dawn chuan corruption-in hmun a chang tur a ni lo tih a sawi a, Kawng engkimah lepse kan ngam tur a ni. Ni tin hnathawhnaah ringtu kan nihna hi hman ṭangkai a ngai, a ti. Eirukna dona atan RTI Act chu hmanraw ṭangkai a nih thu sawiin, Lal Thanhawla chuan, RTI Act hi sorkar khalh ngil nan hmang ṭangkai hle ila kan duh. Corruption hi keini ringawt chuan kan veng seng lo a, mipuiten mawhphurhna kan nei tih hria a, tun aia nasa zawka min venpui kan ngai a ni, a ti a; mipuite chu ṭangkai lehzuala RTI Act hmang turin a chah. Chief minister chuan, sorkar department zingah RTI Act hmanga dilna tikhawmuang lui ṭhin an awm thu sawiin, department tinte chu RTI Act hmanga zawhnate ni 30 nghak kher loa a hma thei ang bera chháng zel turin a hriattir a, RTI Act hmang hian sorkar chak zawka a kal theih nan i ṭang tlang ang u, a ti. RTI Week hmannaah hianchief information commissioner Lal Dinglianan inlawmna thu a sawi a; IPR director Jim K Chozah leh information commissioner L Hrangnawna ten thu an sawi bawk. Mizoram Information Commission hi July 5, 2006-ah din a ni a, RTI Week hi kum 2011-ah hman ṭan a ni. RTI Week hi nimin vek khan district tinah MIC leh IPR department bultumin hman a ni a, district ṭhenkhatah chuan DC-ten an hmanpui a ni. Mizorama RTI application lut zat Kum Dilna 1st 2nd MIC-a Apr-Mar Lut zat Appeal Appeal Zualko 2006-07 476 6 1 6 2007-08 371 2 5 9 2008-09 177 2 5 15 2009-10 695 8 3 13 2010-11 741 12 8 12 2011-12 1045 2 8 16 2012-13 1316 17 1 8 2013-14 1750 42 11 10 Upto 1/9/14 Total 6571 91 42 89
Posted on: Tue, 28 Oct 2014 06:13:40 +0000
Trending Topics
Recently Viewed Topics
© 2015