. XE SUCESSO IN SETEMBRE DE DUE ANI FA... In Arena co’l “Và pensiero” scritto da: Roberto Stanich Mio zio Tonin xe un bon omo, qualche volta fin tropo bon e ingenuo. Quel che lo ga sempre fregà xe la passion per la politica, anche se no’l xe mai sta un vero politican...te ma pretamente un idealista. La politica lo atirava, come le vespe xe atirade del miel e, ingenuo come che’l iera, el se fasseva insinganar de certi sui amici militanti del partito, che i parlava de socialismo, de rivoluzione proletaria, de potere ai lavoratori e altre robe simili. Lui a ‘ste robe el ghe credeva veramente, iera i sui ideali. Parlemo dei ani 1946-47, quando che a Pola iera ancora i aleati ma zà se saveva che saria rivadi i druzi. La magior parte dela gente, pur con la morte nel cuor, la se prontava per lassar la cità ma iera anche quei che, qualchedun per problemi personali ma altri anche per idee politiche, i gaveva deciso de restar. Uno de questi iera Tonin. Lui no’l gaveva fato la guera, el iera ancora tropo giovane, ma el gaveva visto come che la iera stada bruta e le brute robe che gaveva fato el fassismo. El gaveva anche sentì parlar dele foibe e dele altre brute robe che gaveva fato i druzi ma i sui compagni de partito i ghe diseva che iera la “giusta reazione popolare alla barbarie fassista” e lui, ingenuo come che’l iera, el ghe credeva. Anche quando che iera sucessa la strage de Vergarola, el referente del partito lo gaveva convinto che probabilmente iera stada una disgrassia, una fatalità opur, se iera un atentato, alora lo gaveva fato i servizi segreti italiani, per far confusion e darghe la colpa ala Jugoslavia. Lui el parlava de ‘ste robe a casa e iera grandi discussioni, specialmente con Bepi, suo fradel de qualche ano più vecio. Bepi gaveva idee completamente diverse, e, dopo la guera, el se gaveva aruolà nela Polizia Civile, el iera un “Cerin” o un “Bacolo nero”, come che i ciamava a Pola ‘sti polissioti. Tonin el lavorava al mulin de Sansa e, quando el 3 genaio 1947, durante la dimostrassion per impedir che i paroni del mulin i portassi via i machinari, la polissia civil ga sbarà sui dimostranti e tre operai xe morti, lui iera coi dimostranti e Bepi con la polissia, fradel contro fradel. Questo fato gaveva causà la rotura completa dei raporti e, dopo che Bepi xe andà via con l’esodo, i due fradei no se gaveva più visto ne parlà per ani. Tonin iera restà a Pola e, quando che iera rivadi i druzi, el se gaveva dà de far nele organisassioni del partito e dei lavoratori. I dirigenti i lo gaveva inquadrà subito come uno che gaveva voia de lavorar e che no dava problemi e i ghe gvevaa afidà diversi incarichi. Ma Tonin iera tropo onesto e idealista e presto el se gaveva acorto che una roba xe la teoria, quel che predicava el partito e l’altra xe la pratica, la realtà dei fati. Iera tempi duri, rassionamento del magnar con le tessere, miseria. Co’ Tito gaveva fato barufa con Stalin, tanti compagni, i cosideti “cominformisti”, monfalconesi ma anche istriani, i iera finidi a Goli Otok. Paura de parlar ma anche de pensar, per no andar in disgrassia, Tonin gaveva imparà a sue spese che el silensio xe veramente de oro, come che disi el proverbio e pian pianin el se gaveva tirà fora dei incarichi politici. De italiani ghe ne iera restai pochi a Pola e iera rivada altra gente de l’interno de l’Istria e anche de altre parti dela Jugoslavia. Iera gente diversa e iera dificile capirse e andar dacordo. Tonin qualche volta se sentiva straniero a casa propria. Ma el tigniva duro el iera orgoglioso dela sua identità italiana e el voleva mantignirla. El frequentava el circolo italiano e, anche se se saveva che, come tute le organisassioni, anche el circolo iera soto el controlo del partito, iera bel trovarse con gente nostra, che parlava el nostro bel dialeto. Nel fratempo el se gaveva anche sposà con la Pina, una mula polesana de Castagner e ghe iera nati due fioi, un putel e una putela. Quando che i xe stai in età de andar a scuola, el gaveva avù qualche problema a iscriverli ala scuola italiana per via del cognome che finiva in “ic”, ma ala fine i li gaveva acetai. Intanto passava i ani, adesso se stava un poco meo, cominciava rivar i primi turisti, iera più libertà. La moglie gaveva eredità un tochetin de tera visin Veruda e Tonin con grandi sacrifici e el prestito dela banca, el iera riussido a farse una caseta. El gaveva fato far un per de camere in più che’l afitava ai turisti e questo iera un bel aiuto economico per la famiglia. Gaveva comincià a vignir anche Bepi con la famiglia in ferie a Pola ma i raporti tra i due fradei iera ancora ‘sai fredi. Le robe andava avanti cussì, un poco meo un poco peso ma se capiva che i tempi stava cambiando. Nel 1980 xe morto Tito e Tonin gaveva pianto, quando che’l gaveva savesto. No xe che’l aprovava tuto quel che el vecio ditator gaveva fato ma con lui spariva un grande toco dela sua vita. Dopo, Tonin no xe rivà più a capir quel che stava sucedendo in politica. Iera tropa gente nova, tropi novi politicanti de diverse nasionalità sempre in barufa tra de lori. L’unico fato positivo iera che l’Unione degli Italiani se gaveva dà un novo statuto con un ordinamento democratico, indipendente dal partito. Tonin nel fratempo iera andà in pension. La pension iera picia ma Tonin se rangiava con qualche lavoreto e lui e la moglie no’i gaveva grandi pretese. Ma eco, quasi al improviso una nova tragedia, una nova guera tra Serbia e Croazia. Tonin no gavessi mai dito che saria sucessa una roba del genere. Per lui, Croati, Serbi, Bosniaci, iera tuti uguali e lui iera ancora restà ai slogan del partito de una volta che el predicava la “fratellanza tra i popoli”. Se vedi che questo principio no valeva più per i novi politicanti e alora ancora morte e distrussion, omini, done, fioi, colpevoli solo de esser de un’altra nasionalità o de un’altra religion. L’Istria, fortunatamente, no la xe stada tocada più de tanto ma i morti inocenti no ga nasionalità e tuti merita rispeto. Xe finida anche questa guera ma la ga lassà gravi conseguense, bisognava incominciar de novo, ricostruir ma Tonin no gaveva più voia, ghe ne gaveva viste trope. No’l se trovava più, iera cambiado ancora tuto, le legi, el sistema, la gente. Adesso se podeva far tuto, anche quel che no se dovessi mai far, iera libertà ma anche anarchia, iera un mondo fato per i furbi e i prepotenti. Se trovava de tuto ma la vita iera diventada ‘sai cara, La pension no ghe bastava più ma per fortuna el gaveva l’orto dove che cresseva tanta verdura e due boni fioi che lo iutava. Tonin no’l andava squasi più in cità e quele rare volte che’l andava, no’l vedeva nissun de quei che’l conosseva. El preferiva lavorar in orto o andar a pescar o anche solo caminar lungo el mar. Dele volte el se sentava su una grota e vardando el mar, che se perdeva in lontanansa, el andava indrio nel tempo, el se ricordava dela Pola de una una volta, dela gente che la abitava, dei amici e conossenti e el se domandava dove che iera andai a finir Rudi o Nini o Giordano. Intanto passava el tempo, adesso el gaveva più dificoltà a moverse ma el iera sempre informà de tuto, el legeva el giornal, el scoltava la radio e la television. Le notizie del mondo iera pe la magior parte brute, guere, atentati, rapine, omicidi ma, ogni tanto el legeva qualcossa de bel. Cussì el gaveva leto che ai primi de luglio saria vignù a Pola el presidente italian Giorgio Napolitano e che, insieme al presidente croato Ivo Josipovic ei gavaria partecipà a un concerto in Arena. Iera tempo ormai de meter una piera sule dolorose vicende del passato e tuti i citadini, specialmente i italiani ma non solo questi, iera invitadi a partecipar, per far sentir la propria solidarietà al gesto simbolico dei due presidenti. Tonin ga deciso subito che’l voleva andar. El ghe ga telefonà al fio e lui ghe ga promesso che lo porterà. Purtropo, Napolitano ga dovù cancelar la visita dei primi de luglio per impegni urgenti e el ga spostà el concerto in arena, al tre de setembre. “Va ben lostesso”, ga dito Tonin, “speteremo altri due mesi e speremo che Dio ne daghi la salute.” Xe passadi due mesi e xe rivà el tre de setembre. Come promesso, el fio ga portà Tonin in arena. L’arena iera piena ma el fio ghe gaveva fato tignir el posto in una bela posission, dove che’l podeva veder e sentir ben. Iera una bela serata, el ciel iera seren e una bavisela rinfrescava l’aria. Davanti al palco iera l’orchestra che zà provava i strumenti. De drio stava el coro, duecento coristi scelti tra i cori de tute le comunità italiane de l’Istria. Dopo i saluti preliminari i ga sonà i inni nazionali e quando che i ga fato quel italian, Tonin ga sentì che ghe vigniva come un gropo in gola, un gropo che no’l rivava smolar e che no ghe andava ne su ne zò ma no’l voleva lassarse andar ala comossion, el voleva tignirse su. Dopo, ga parlà i due presidenti, el stesso discorso in italian e croato. “Bele parole”, ga pensà Tonin, “ma bisogna veder i fati. Però anche le parole xe importanti, se le xe sincere” e el ga a batù le mani convinto, insieme con tuti i presenti. E finalmente ga incomincià la musica, tochi de opera: l’Ouverture del Nabucco, el Te Deum dela Tosca, mi chiamano Mimì de La Boheme di Giacomo Puccini e altri tochi ancora de musicisti croati, che Tonin no conosseva. Tuto bel, bela musica, bravi cantanti ma quel che Tonin spetava con impazienza iera el “Va pensiero”, el “Va pensiero” sonà e cantà in arena, dopo tanti ani, finalmente! E, quando che el coro ga intonà “Va pensiero su l’ali dorate…”, Tonin ga sentì che el gropo che’l gaveva in gola el se smolava, alora el ga serà i oci e el se ga lassà andar completamente. El se sentiva leger come una piuma, el andava in alto seguendo l’onda dela musica, el volava sule “ali dorate”, sempre più su, tra le arcate de l’arena, sempre più in alto, sora el mar, sora la città, la via Medolin, dove che’l iera nato, Veruda, dove che’l stava,Verudela, Scoio dei Frati, Frascher, picio e grande, Promontore, el faro de Porer.. el volava e insieme con lui iera tanta altra gente, istriani, polesani, iera suo fradel Bepi, el suo amico Mario , i sui compagni de scola, quei dela squadra del balon, quei che iera andadi in Italia, in America, in Australia, tuti insoma e iera tuti contenti, tuti in pase, che i se sorideva l’un con l’altro e iera bel, bel, cussì bel che’l no gaveva più voia de tornar in tera. Roberto Roberto Stanich
Posted on: Mon, 30 Sep 2013 15:11:57 +0000
Trending Topics
Recently Viewed Topics
© 2015