1.5 million speakers 26th September 2013 Speakin anent the census feegurs that wis lowsed bi the National Registers o Scotland – that shaws 1.5 million fowk speaks Scots - Michael Hance, Director o the Centre for the Scots Leid, said “Thir nummers is braw news, but efter hunners o year disjaskit, something wants done noo for tae see that Scots wins ower in time tae come. The data ingaithert throu the census gies us information for the first time ever, anent the nummers o fowk that speaks Scots, whaur thay bide an whit clesses an cawings thay belang. This means we can stert tae plan oot whit wants done tae gie uphaud tae communities o speakers an whit we can dae tae shaw them that thair leid maiters an can be passt on tae the fowk that’s tae come efter them.” “Scotland athoot the Scots leid wad be a shilpit picture o itsel. For hunners o year the Scots leid haes been at the hert o oor culture, it haes helpit mark us oot as a fowk, an throu hit we’v aye haen oor ain voice an makkit kenspeckle airt.” “The Centre for the Scots Leid is cawin on the government tae draw up a Chairter for Scots that will shaw hoo the leid an its dialects can be better upheld.” “The bairns is key tae the health o the leid in time tae come, an we’d like tae see new ettles at novative projects that will gie the self-warth o Scots-speakin bairns a richt heize. It is dowie tae hear that even the noo the’r ower mony instances o teachers ‘richtifyin’ the tuin an graimar o Scots whaur it’s no wantit, an this maun stop. Bairns can easy unnerstaun the differs atween maks o langage an haes the can for learnin baith Scots an Inglis. The days is ower whan policy wis tae ding doun differs in langage an we maun mak shair that Scots speakers is treatit wi respect as the cairriers o a leid an culture that’s mony hunners o year auld.” “Whit’s wantit noo is TV programmes airtit at younkers that echoes thair ain spoken life. Oor Wullie an the Broons is Scotland’s favourite comic strips but is it no aboot time we heard them speak.” “Efter hunners o year wi the leid passt ower an dounhauden, we ferlie that the’r that mony fowk can claim tae speak Scots yet. The policy o smorein the leid led tae bairns gettin the tawse, an waur, year efter year, tae the black burnin shame o Scotland. Noo we can dae something aboot pittin thae wrangs richt an A howp the Scots Government will soon stert the process wi annooncin whit gait it will tak as an affcome o thir kenspeckle census feegurs.” scotslanguage/news/Sep-2013/1.5_million_Speakers
Posted on: Mon, 30 Sep 2013 21:24:51 +0000
Trending Topics
Recently Viewed Topics
© 2015