11 AUKUHO TALA FOU Kua hui te tala o te tau mo ki tatou i te vaiaho nei ko te po o te aho Gafua 5 Aukuho na iei te matagi ma uaga fakaauau mai ki te taeao o te aho Lua 6 Aukuho. Eiei te taimi e huhulu manaia ai te la kae ko te lahiga lava ona taimi e uaga ma havili te matagi. Ko te nuku e ola malolo e heai lele he tala vale e fakalogo kiei. TALA FOU I te po o te aho Ha 4 Aukuho na fai ai he fonotaga mamalu a te kaiga o te PTA faiakoga ma matua, ko te fonotaga muamua tenei kua fakatino i te Tauhaga tenei 2013, na vaega ienei na fakatalanoa e uiga ki te i. na tautuaga mo te tauhaga nei 2013 ii. ko te lipoti TAPA ei loto ai na hukega o te year 4 I he lipoti mai te Pule akoga o Matiti Niu Koloi e tokalahi ki latou na fanau akoga a Matiti na au ki luga i te top 10. Ko te fonotaga foki tenei na fakailoa ai he lipoti o te year 11 mai te tauhaga kua teka. I he fakamoemoega ko te aho 1 Hetema ka toe nofoia ai he fonotaga ma te PTA kae maihe ai he inugati mo ki latou na faiakoga fehoahoani vena ma na faiakoga foou ki Matiti. Ko ni mafaufau ga taki ienei ke tuku atu ki te mamalu o te PTA ke kikila totoka ma galulue fakatahi ma te kaiga o faiakoga aua te lumanaki manuia mo fanau akoga a Matiti Ko te taimi nei foki eiei he tahi fehoahoaniga foou i te akoga a Matiti te matua kia Lita Sakaria na faimalaga mai i Niu Hila i te mahina kua teka, i he lipoti mai te Puleakoga. "E fiafia lahi lele te loto ke iei ni fehahoaniga venei, kae maihe ai ki latou e aumau i nuku mamao ke iei he latou hao ki te akoga a Matiti". Ko te matua tenei kia Lita Sakaria e fiafia lahi foki ke iei hana fehoahoaniga ki te akoga a Matiti e tuha ai ma te taimi e tafao ai ia i luga o Nukunonu Tokelau. Ko te taeao o te aho Gafua 5 Aukuho na fai ai te maopoopoga a te malohi o te nuku ki tua i te Falepa eve lava ona mahani ai ki te tufatufaga o taulelea mo na galuega o te aho, na fai te latou galuega fita ko te fakamamaaga o te fenua i te lapihi laku ki vao na maea te latou galuega tena oi tala loa ki tua ki kaiga malolo mo te aho katoa. Ko te aoauli o te aho Gafua lava na fakatu ai te pou a te Ola Malolo ki te itu ki Motuhaga o te Falefa, ko te pou tenei e ohe fakaaliga lahi e fia tuku ki luga ke fakaali ai ki te Nuku e uiga ki te Hikaleti ke taumafai ke fakaitiiti ki latou e ulaula ki te tapaka (hikaleti), i he lipoti mai te mataeke o te Ola Malolo e tofu uma te nuku ma te fakaaliga tenei ko te taeao o te aho Falaile na fakapipiki ai loa te fakaaliga ki luga o te pou. I te po o te aho Gafua lava na fai ai te fonotaga mamalu a te Tupulaga Talavou o Nukunonu, na fakaali ai he pepa taua na maua mai i te matua faufautua kia Lihe Suveinakama. Ko te tuhi tenei ko he aho fakapitoa e o te Tupulaga o te Lalolagi na fakavae e Malo Kaufakatahi i te tauhaga 2000, ona ai fatoa iei he takiala mo te Tupulaga o Tokelau ma kua pahia mai foki i te Fono Fakamua, kua tatau ai te Tupulaga o Tokelau ke fakataunuku foki na vaega ienei e tutupu i te lalolagi katoa. Ko te aho tenei e patino ki te aho 12 Aukuho ko te aho Gafua tena o te vaiaho foou. Na malilie te Tupulaga o Nukunonu ke fakatino te vaega tenei ona ai ko he taimi muamua e fiafia ai te loto ke fakailoa atu ki te lalolagi katoa ko Tupulaga o Tokelau na fakatino foki e latou te aho taua tenei, na filifilia ai e latou te Ola Malolo ma te Aganuku ke fakatino i te aho taua tenei. Ko te taeao o te aho Lua 6 Aukuho na uhu ai te malohi o te nuku ki na galuega o te faugafale kae maihe ai te fakatotokaga o te galuega ate Falemaki. Na fai te latou palu i te afiafi o te aho Tofi. Ko te aoauli i te 2 o te aho Lua na fai ai te fonotaga a te komiti o te akoga a Matiti na fakatino tena i Talikilagi. I te taeao o te aho Lulu 7 Aukuho na nofoia ai te fonotaga mamalu a te Taupulega a Nukunonu, na lahi lele na matakupu taua na fakatalanoa ai. Na talia ai foki e latou te pepa talohaga a te Tupulaga mo te fakatinoga o te aho taua o Tupulaga o te lalolagi, e fakataunuku te aho taua tenei i te taeao o te aho Gafua 12 Aukuho. I te afiafi o te aho Lulu na taunuku mai ai te malaga a te BBMatua ki Nukunonu, na lahi he uta meakai o te falekoloa kae maihe ai na uta a tagata tautokatahi. Na teka lava i te afiafi tena ki Atafu, toe taliu mai i te afiafi o te aho Tofi fakauta te pahehe ma te uta ma teka atu ai lava ki Apia. I te afiafi o te aho Tofi 8 Aukuho na fai ai te happy hour a te nuku i Talikilagi, na manaia lahi lele te fiafiaga tenei, ma ihe lipoti mai te Nofoa Lua kafai e tumau pea te fiafia ma te iloa e tagata oi fuafua tatau te inu ki te ava malohi e fakaauau pea na alofaaga ienei ma tatala ai loa te pia ki tua. Na kitea lava ki te fiafia o tagata ona ai kua iei he fakatagaga ke iei ni mafutaga fakatahi venei ke fiafia fakatahi ai te malohi o te nuku kae maihe ai ki latou e fiafia lahi taumafa te vailima malulu, na iku ma te manuia te fiafiaga tenei e heai lele he mea matavale na tutupu ai. I te afiafi foki lava o te aho Tofi na fakataunuku ai he ZUMBA a te faitu o EGELANI i tua i te falepa na fakatumulia tenei koleniga mae e fakamoemoe e fakaauau foki na koleniga ienei. I te taeao o te aho Falaile 9 Aukuho na fai ai te inuga ti a faiakoga o Matitimo te fakaulufalega o na faiakoga foou ienei ki a latou tautuaga mo Matiti te pulekoga Niu Koloi, faiakoga Isara Mafala Alesana ma te faiakoga fou mai Hamoa ko Itasi, na fakatahi ai foki ia fanau akoga i te aoauli o te aho Falaile ma a latou takaloga faka-Tokelau, ko te fakamoemoega o tenei polokalame ni tapenapenaga mo te latou vaiaho Gagana Faka-Tokelau. Ko te taeao o te aho Ha 11 Aukuho na fai ai te fonotaga a te kaiga o te Tupulaga mo te latou tapenapenaga mo te aho o te National Youth Day taeao, e maopoopo uma ki latou ki te umu o Talikilagi mo te fakatotokaga ote meakai mo te aho taeao. Ko te taeao nei foki na fano ai te pikiniki a te vahega o te USP ki te utafenua. Ola Malolo Eiei te peleni a te Mataeke o te Ola Malolo e fakamoemoe ke fakatino i te fakaikuga ote mahina nei, e malaga atu ki na nuku takitahi oi talanoa ki na Taupulega e tuha ai ma te fakagaoioiga o te latou peleni e uiga ki te Ola Malolo, ko te fakamoemoega ke mafai ai na nuku takitahi ke galulue fakatahi ma te mataeke mo te fakatinoga o na peleni ienei. I te taimi nei e galulue ai nei te falemaki ki te hifiga o te falemai tuai ki te falemai foou Ko te afiafi o te aho Falaile na fai ai te latou toga lakau i luma fale o te fale mai foou. Ko te taeao o te aho Tonai 10 Aukuho na fakaauau ai te polokalame koleni a te Ola Malolo. Fatupaepae I te taimi nei e koi tala ai ki tua ia matua o te Fatupaepae e tuha ai ma na galuega/fekau fita nae fakafeagai ai ma te 4vaiaho kua tuanaki atu nei, e fuafua ko te vaiaho fou ka toe kamata ai a latou tautuaga mahani. Koloa Eiei he fonotaga a te komiti o te fale koloa ke iei he tahi tino fakaopoopo ki te latou kau faigaluega, ka ta te avanoa mo te tino faigaluega tenei e manakomia. Litia Maiava mo na tala fou NUKUNONU TOKELAU tautuaga a te TE MANA
Posted on: Sun, 11 Aug 2013 04:45:22 +0000
Trending Topics
Recently Viewed Topics
© 2015