1940 CHHOVA AIZAWL TLANGVAL FIAMTHU Pu PS Chawngthu min hrilh kha a ni a, ka’n bengzeh ve mai mai ang che u: Kum 1940 chho vel khan tlangval zu inho hian fiamthu pah hian Aizawla hruaitu leh mi hming lâr deuhte hming invuah leh inkoh kha an chîng thin a. Tum khat zu an inho thinnaa chuti ang fiamthu-a an lo inkoh lai tak chuan Pu Suaka (Lushai clerk pensioner) zan lêng tur kal lai tak a ni a. Tlangval phawk fiamthu thawh pakhat chuan, “Khai, Pastor Chhuahkham, han sâwr leh la Suaka hi ka han leh ang e,” a ti lûng lûng hi Pu Suaka chuan a hria a. Zu inna hmun lam chu a pan chhova. Kawngkaah a dâk dêk dêka, “A tu hi nge ni Suaka chu?” a han ti mai zawng. Tlangvalho tan chuan vana lâwn tum leh a sang bawk si, leia luh dawn leh a ping bawk si hi a ni a ni ringawt. Aizawl tlangvalho chuan senior missionary Pu Mena (Rev. EL Mendus) kha sawisak an ching hle bawk. A sawi ni miah lo hi “sawitir” an ching a. Tlar-thum Zai (Chheih Zai) pakhat: “Berhvatê mah di ngaiin thing lênbuangah, A tap hmâr tlâng a hawi thûl e,” tih kha Pu Mena’n a han sawi ve dawn a: “Sava pakhat a awm a, a hming ka hre reng ta lo va, A lung a lêng em em a, thinglêrah a fu a, Pu Suaka khaw lam a hawi a, a tap bawk a,” a ti e, an tia lawm. Pu Suaka khua hi Durtlang a ni a, Pu Mena bangla atang chuan hmar lam a ni ve ngei bawk a, mahse a han hril dan hi chuan a sak chu a harsa viau ang! Chhim hla phuah thiam Lalmama phuah “Chhura Sangha Vuak Hla”-a “Pi Khûp, ngawi la tawkdângi a tlân ang e,” tih lai pawh kha, “Well, Pitar khûp, bengchheng shiam shu, a nih loh leh utawk a tlân ang,” zu han tihtir pek a. Pu Mena hovin pastor leh kohhran upa-ho hi a bangla-a a mut pindanah a rûkin lehkha an dentir leh pek a! Pu Mena chuan a la dêng thiam ve meuh lo va. Amah pui turin a eisiam Pu Lalkhuma chu a bul-ah a thu ve a. Pu Mena chuan âk dawih (jack of spade) a han dêng thla thuk a. Pastor Chhuahkhama chuan âk kir (king of spade)-in a lo man hlauh mai a. Pu Mena hrilhhai chuan, “Well, Lalkhum, dawih hi chu a huai meuh lo a ni,”a ti, zu han ti pek a! Missionary lar tak bawk Pi Zaii (Miss K. Hughes) pawh kha tlangvalhovin a tawngkam an zirsak nasa mai bawk thin a. A sawi hauh loh hi an sawitir an sawitir mai thin. Hlaphuah thiam hmingthang Rokunga thiannu hi Pi Mawii a ni a, a hmingpum chu a hnam hming chawia Sazamawii tia sak a ni a. A hmingpum hi Pi Zaii an theihnghilhtir a. “Pu Rokunga nupui fel tak, lian tak, sang tak, inkhawmnaa kal fo thin hi a hming ka hre reng ta lo, ‘Sazuk-duhawmi’ a ni lo, ‘Sakhi-lungruni’ a ni lo, ‘Chinghne-Odi’ pawh a ni lo, “Sele-pari’ pawh a ni lo, ‘Sahrâm-ainawni” pawh a ni lo, ‘Sakei-hermawii” pawh a la ni chuang lo,” ti te-in an sawitir vak vak thin.
Posted on: Thu, 20 Nov 2014 08:50:08 +0000
Trending Topics
Recently Viewed Topics
© 2015