2014/03/20 ======== 2398. Khing Tiong tsîng-kat i m̄ tháu. Tâi-uân khah tshám tio̍h-tsha̍t-thau. 傾中情結伊毋敨，台灣較慘著賊偷， Jîn-tsîng sè-sū pat bô thàu. Tú-tio̍h tāi-tsì bih āu-thâu. 人情世事捌無透，拄著代誌覕後頭。 (2014/3/20)(2014/10/12改寫) 2399. Ǹg-bāng ho̍k-bōo ū ti̍k-hāu. Tshan-tshiūnn gōng-kâu tann tsio̍h-thâu. 向望服貿有特效，親像戇猴擔石頭， Hōo-lâng hó-khang tsia̍h-kàu-kàu. Suî kā Tâi-uân tsò in tau. 予人好空食夠夠，隨共台灣做in兜。 (2014/3/20)(2014/4/1改寫) 2400. Beh tsò tè-ông tsiânn ū-pān. Ngē-kut m̄-kiann líng-hong hân. 欲做帝王誠有範，硬骨毋驚冷風寒， Sin-tsiann hue khui tng tshàn-lān. Lâng lóng kiò guá pài-suè-lân. 新正花開當燦爛，人攏叫我拜歲蘭。 (2014/3/20) 2401. Huâinn-pà áu-bân ná thóo-huí. Tiong-kok bîng-phìnn khǹg tsi̍t tui. 橫霸拗蠻若土匪，中國名片囥一堆， Li̍p-uí m̄-tsò ài huí-luī. Oo-pe̍h-luān-bú hó tio̍h tsuî? 立委毋做愛匪類，烏白亂舞好著誰？ (2014/3/20) 2402. Tsìng-hú tsò kah kòo-lâng-uàn. Siā-huē luān-siōng khuànn tō huân. 政府做甲顧人怨，社會亂象看就煩， Tāi-jîn hiau-pai tsiânn pháinn-khuán. Peh-sènn sim-kuann kiat kui uân. 大人囂俳誠歹款，百姓心肝結規丸。 (2014/3/20) 2403. Lia̍h-tsún lâng tsē tō tshia-iānn. Nā-beh piau-kuat it-tīng iânn. 掠準人濟就奢颺，若欲表決一定贏， Uī bîn siat-sióng kám ū-iánn. Sim-lāi tsóng-sī thīn Nâ iânn. 為民設想敢有影，心內總是伨藍營。 (2014/3/20) 2404. Guán sī tsi̍t-tsiah tshái-hue-phang. M̄ ài tìng lâng ài hue-tsâng. 阮是一隻採花蜂，毋愛叮人愛花欉， Ta̍k-kang kut-la̍t pue tín-tāng. Siu-tsi̍p phang-bi̍t tinn koh phang. 逐工骨力飛振動，收集蜂蜜甜閣芳。 (2014/3/20) 2405. Tsi̍t-khoo thuî-thuî ná tòng-gōng. M̄-bat lo̍k-jiông ū khah sông. 一箍槌槌若侗戇，毋捌鹿茸有較倯， Ho̍k-bōo guā hó i leh kóng. Pah-bīn ka-tī ài phòng-hong. 服貿偌好伊咧講，百面家己愛膨風。 (2014/3/20) 2406. Gōo-tshe-pî suí iok hit-lâng. Sai-kiû-niá hia nǹg pōng-khang. 五叉埤媠約彼人，獅球嶺遐軁磅空， Guā-bo̍k-suann pinn iû hî-káng. Tuā-bú-lûn suann khuànn iânn-pâng. 外木山邊遊漁港，大武崙山看營房。 (2014/3/20) 2407. Kiann hōo Tiong-kok lia̍h pá-pìng. Ài kah bîn-tsiòng bô kāng-pîng. 驚予中國掠把柄，愛佮民眾無仝爿， Ta̍k-kang siōng-ài tshia-pua̍h-píng. Put-sî hiòng lâng thó kiù-ping. 逐工上愛捙跋反，不時向人討救兵。 (2014/3/20) 2408. Ngē-beh kuè-kuan siunn bián-kióng. Lô-kà tsiòng-lâng tuā tīn-iông. 硬欲過關傷勉強，勞駕眾人大陣容， Tong-tshoo nā-sī ū tsun-tiōng. Tsit-tsūn kám-tio̍h án-ne tshiong. 當初若是有尊重，這陣敢著按呢衝。 (2014/3/20) 2409. Kuann-uân m̄-thang siunn thíng-sīng. Nā peh tsiūnn-thinn tō khok-hîng. 官員毋通傷寵倖，若peh上天就酷刑， Tsing-kuân tua̍t-lī pháinn tshìng-tshìng. Kì-tsāi jîn-bîn sim-kuann gîng. 爭權奪利歹衝衝，據在人民心肝凝。 (2014/3/20) 2410. It kiam jī kòo tio̍h sam-su. Sù-su ngóo-king lio̍k-huat jû. 一兼二顧著三思，四書五經六法挐， Tshit kóng peh kóng uē sio-tú. Ing-kiú tsa̍p-tsiok pah-bīn su. 七講八講話相拄，英九十足百面輸。 (2014/3/20) 2411. I-pēnn kuan-hē beh hô-hâi. Hōo-siong thé-liōng sī ing-kai. 醫病關係欲和諧，互相體諒是應該， Tshian-bān m̄-thang gâu kik-sái. Phah-phái kám-tsîng lí tō tsai. 千萬毋通gâu激屎，拍歹感情你就知。 (2014/3/20) 2412. Iōng tsiú kái-tshiû bô-siánn hāu. Ki̍k-ke sim-tsîng luān-tshau-tshau. 用酒解愁無啥效，極加心情亂操操， Ut-tsut nā beh iōng tsiú tháu. Tian-tò gōng-sîn tsò giàn-thâu. 鬱卒若欲用酒敨，顛倒戇神做癮頭。 (2014/3/20) 2413. Lâu-tíng pin-pin koh piàng-piàng. Ta̍k-àm puànn-mê khí-moo giang. 樓頂乒乒閣乓乓，逐暗半暝起毛婸， Iô tshn̂g lòng piah siann hiáng-liāng. Tāi-tsì pān liáu khui tsuí tshiâng. 搖床挵壁聲響亮，代誌辦了開水沖。 (2014/3/20)
Posted on: Wed, 26 Nov 2014 17:08:22 +0000
Recently Viewed Topics
© 2015