24 anyos nga dalaga, ginlugos kag ginpatay sa Iloilo ILOILO CITY—Makangilidlis ang gindangatan sang 24 anyos nga dalaga matapos ginlugos kag ginpatay sa Brgy. Cauayan, Pototan, Iloilo. Ang biktima nga si Mhe Ann Gumban, residente sang nasambit nga lugar kag nagatrabaho bilang receptionist sa isla sang Boracay ang nasapwan na lang sang iya pamilya sa masiot nga lugar nga hublas kag isa na ka malamig nga bangkay. Sa interview sang Bombo Radyo sa tiya sang biktima nga si Gng. Jean Dalla, sang nagligad nga adlaw lang nagpauli sa ila lugar ang biktima sa diin nagkadto ini sa balay sang iya lola ginabanta isa ka kilometro ang kalayuon gikan sa ila balay. Pagkagab-i, wala nakapauli ang biktima apang gindumdom lang sang iya mga ginikanan nga nagtulog ini sa balay sang iya lola ukon sa iya boyfriend sa kaiping nga barangay. Apang sang ila gin-usisa, natukiban nga wala man ini didto kag diri na kag ginpangita sang iya pamilya ang biktima tubtub nasapwan nga hublas kag patay na ginabanta 150 metros lang ang kalauyon sa ila balay. Ang biktima ang ginpatay paagi sa kuga sa diin yara pa sa liog sini ang balagon kag sleeveless shirt sini nga gingamit sa pagkuga sa iya. Ang lawas sang biktima buta sang lagub halin sa iya nawong, duha ka dughan, butkon kag duha ka paa. Ginapatihan nga ginbalabagan ang biktima sang ginabanta tatlo ka suspetsado samtang pauli na. May suspetsado na ang pamilya apang nagbalibad anay sa paghatag sang pangalan kag nagalaum nga kuntani indi pagpatulugon sang ila konsensya ang mga suspetsado.
Posted on: Fri, 27 Sep 2013 09:11:12 +0000