2nd RDR Rescuelympics nagmalampuson Ni Billy Dulatre Davao del Norte, July 29, 2013 - Nagmalampuson ang gipahigayong 2nd Reduce D’ Risk Rescuelympics didto sa bag-ong Davao del Norte Sports and Tourism Complex sa Mankilam, Tagum City, nga gisalmotan sa nagkadaiyang mga city ug municipal disaster responder (LDRRMO’s) sa probinsya. Sa ikaduhang tuig sa rescuelympics, gibahin sa duha ka kategorya ang kompetisyon nga mao ang barangay category ug city and municipal (LGU) category. Lima ka barangay ang misalmot sa barangay category samtang duha ka dakbayan ug pito ka lungsod ang miapil sa LGU category. Ang mga barangay responders nagpakita pud sa ilang kusog ug kahanas sa pagresponde sa mga nagka lain-laing mga kalamidad, ug nakita nga dako ilang matabang sa local disaster response isip anaa sa baranggay, kay sila ang labing unang maka responde kung may mga kakuli-an o mga disgrasya na mahitabo. Gihatagan ang mga responders ug mga senaryo diin dunay pasyente nga gipahigda sa atubangan nga ilang respondehan pinaagi sa mga nagkalain-lain nga mga life saving techniques, sama sa Cardio Pulmonary Resuscitation kon CPR, Rescue Breathing kon RB ug First Aide Basic Life Support aron makita gayod kung husto ang ilang mga gipang-apply atubangan sa mga hurado nga gikan sa PDRRMC. Sumala pa ni Sonio Sanchez, action officer sa PDRRMC nga ang maong kumpetisyon dili lang para sa premyo nga ilang madaog kun dili isa sa ilang gipaningkamutan nga mahatagan ug pagtagad ang panaghi-usa sa tanang mga LDRRMO’s sa probinsya. Tungud kay dako kini ug tabang nga makighimamatay ang mga responders aron dali lang ang koordinasyon kung adunay mga mahitabong kalamidad. “The very purpose of this event is camaraderie and to enhance and capacitate the skills of our local responders here in the province,” sulti ni Sanchez. Gigasahan usab ang maong event pinaagi sa presensya ni OCD Region XI Director BGEN Loreto G. Rirao, nga naghatag sa iyang mensahe atol sa maong pahigayon, anaa usab si Governor Rodolfo P. Del Rosario nga mismo nitunol sa mga premyo sa maong resculympics. Nahimung nagmadaugon sa barangay category ang gihi-usang kusog sa duha ka barangay sa Talaingod nga nakakuha sa 1st prize nga P20,000 pesos. Gisundan kini sa Baranggay Ising, Carmen ug Baranggay Sambog, New corella isip mananaog sa 2nd ug 3rd prizes. Nasungkit usab sa Island Garden City of Samal and LGU category nga dunay ganti nga P30,000. Misunod ang mga lungsod sa Kapalong ug New Corella isip 2nd and 3rd placers.
Posted on: Tue, 30 Jul 2013 00:51:12 +0000