A DINTU LEH A ZUARTUTE PAWHIN AN HNAWL TAWH CONGRESS MIZO TEN I HNAWLVE ANG U Aizawl:Nimin Mizo Hnam Run-a Aizawl Municipal Council (AMC) Sawrkar thar lawmna inkhawm ah Pu Zoramthanga, President MNF chuan, “A dintu leh Mizorama rawn zuartu vai ho pawhin an hnawl tawh Congress hi keini Mizo te pawh hian i hnawl ve tawh ang u” a ti. A sawi zelna ah Pu Zoramthanga chuan, “Vawiin ah Aizawl Municipal Council Sawrkar thar lawmna kan nei a, Sawkar pui zawk State Sawrkar lawmna pawh kan la nei zel ang tih i beisei ang u. AMC hi a pianna turin MNF Sawrkar khan bul tanin, AMC Act passed in, a pian chhuahna tura kawng sialtu leh a paipuitlingtu kan ni a. AMC Sawrkar a lo pian khan a pianna tur ruahmantu MNF chu neitu nihna nei lovin kan awm a. Mahse, hun a lo kala a paitu ngeiin chanvo kan nei ve ta hi anihna tur reng a niin, lawmawm ka ti hle a ni” a ti. Politics-a hlawhtlinna leh puitlinna bul pawimawh tak chu ‘mahni hmasial loh leh dawhtheihna’ hi a ni. Heng bak thildang thusawi thiamna, lehkhathiamna etc te chu a cheimawi leh zualtu an ni. Chuvangin, Party ah a hruaitu kan ni emaw, worker kan ni emaw, kan sawi tak ‘Quality’ hi kan neih loh chuan thawhho a harsa thin a ni. AMC Sawrkar thar lo piang hi tu ten emaw an beihchiam avanga lo piang a ni lova. Chunglam remruatna avangin boruak an chiri deuh nak nak karah rual takin kan HALELUI rual thei ta thap a ni. India ramah Congress Party hi duh duh ti thei ang hialin an kal thin a. An duh leh National Emergency-te an puang a, anmahni lam ni lova an hriat Party hruaitute an man khawm rup rup a. Tihluihnain fa nei thei lo turin mi awm mai mai an tilui a. Nutling patling an duh duh an khalhkhawm a, tihluihnain an siam lui mawlh mawlh mai thin a. Mizoram ah pawh Congress hotu ten “Nangni VC mai mai te chu Thereng a vawthla tih vang pawhin kan thiat thei che u” an ti thin a ni. Tunah Congress chu Central -ah namenloin an tla a. Mizoram ah AMC-a an Sawrkar an tla a, an Governor paih a ni leh zel te hi chhut tham a awm a ni. Hetihlai hian Congress hotu te chuan thilawmzia chhut lovin lal an la hrawt a, anmahni thlunna hrui chunglamin an inpalawh nan a la thlahdul ah i ngai ang u” a ti. Dr. R. Lalthangliana, Vice President MNF chuan, “Aizawl Municipal Council lo pianna chhan hi MNF Sawrkar khan Central Sawrkar atanga Development sum dawhthleng atan leh Aizawl khawpui enkawltu mumal neilo enkawl ngai enkawltu atan AMC din tul a ti a. AMC Act te a duang fel a, Mizoram Assembly Election dawn anih avangin AMC Election kha buatsaih rem lovin a hria a, Congress Sawrkar thar lo piang khan AMC Election kha a rawn buaipui ta a ni” a ti. Pu Zarzoliana, AMC Chairman thar chuan, “Tuna AMC Sawrkar thar lawmna MNF-in a buatsaih dan atang hian AMC hian MNF ah hmun lailum a luah a ni tih a chiang hle in ka hria a. AMC Sawrkar thar lo pian dan hi a mak hle a. Kei phei chu ZNP leh MPC Councillor thenkhat ten Party thar an din vel lai khan Damdawiin ah ka awm a. Thil in her vel dan pawh ka hre ve pha lova. Tunah AMC Chairman nihna ka chang ta mai hi mak pawh ka ti hle a ni. India ram ah hian Congress Sawrkar-na hrim hrim hi Pathianin paih a tum ta ah ka ngai a. AMC Inthlan November 2015-a neih tur ah pawh hian kan hotu ten an rel sual fe anih loh chuan Sawrkar-na chak leh zualin kan chan ngei ka ring a ni. NGO te enghelh em em Licencing Regulation siam thatna tur ah hian AMC Member -te ni mai lo, Party hotu ten ngun taka an ngaihtuah angai ang” a ti. AMC Sawrkar thar lawmna inkhawm hi Pu Tawnluia, Sr. Vice President MNF -in a kaihruai a, Commissioner Lalngaihawmi’n hunserh hmangin Pathianthu chah tha tak tawifel takin a sawi a, Party worker thahnem tak an kalkhawm a ni.
Posted on: Sat, 09 Aug 2014 01:18:21 +0000
Trending Topics
Recently Viewed Topics
© 2015