A.M NEWS! From our studio for front of Hon John Nani house we carry our two hands join our two legs to clap kpakpakpakpakpa for Hon John Nani weh he don use e connection take influence 4 transformer come from the local government. Make unu know say nor be only bad tafia deh talk. Hon John Nani we want make unu deh listen to wetin we deh talk because our effort nor be to insult you and other leaders but to make sure say dem do the right thing to make Jesse a better place. Report fly enter our studio say dem don come look the place weh dem wan put the 4 transformer and to make it real, make unu let dem replace the one for Efemini Junction and udughe before any other one and make unu make sure say na that kind one weh deh Ikewun side because the load don plenty. MORE DETAILS LATER. Report reach us say that hospital weh be Galen Clinic weh deh along Asoro road deh charge too much. Make unu take unu charges easy because unu nor come here come cut people neck. Unu go just give patient 4 injections unu go deh collect 10,000 Naira for deposit after that unu go bring bill. Make unu make am easy o. After all unu nor be qualified doctor before. All the failed politicians weh we agree make dem buy tranformer give us for the town we never hear from them. Make unu organise unu self fast because na only that one unu go fit take get small name because unu names don finish. NDDC don approve one road through that Asoro road pass the back go cut across Mission road pass some houses go straight go Idjedaka. We interview them yesterday and this road divide some houses into 2 and na there dem say if he houses too many dem go carry the road go another side. But one talk say na there the road must deh. The road weh dem wan do so don pass through about 17houses for one side and still pass through ik brooks fence and na so some house for front weh be them Dede own enter plus some Ghana burga houses. Make leaders and community leaders make sure say adequate compensation deh ground before dem go break people house. Report reach us say government don stop student to deh bring phones come secondary and primary school. Make unu weh be parents warn unu children make dem nor carry phones because if dem see am na police station dem go dump the phone. Wisdom Omoniyodo make unu carry unu motor commot from that road and make the police warn all the big truck weh deh sell drinks come Jesse make dem deh park well commot from road before dem go sell. Harrison Uzor, as unu don repair unu small car so make unu deh drive well o. If unu misbehave unu go see wetin Tafia go do you because unu just deh speed like say aeroplane unu deh drive. Make all the past councilors do wetin Tafia say make dem do so or make dem just forget politics. Make I go take one Heineken for love place first. JESSE MUST BETTER!!!
Posted on: Thu, 27 Jun 2013 07:54:03 +0000
Trending Topics
Recently Viewed Topics
© 2015