A.M NEWS! From our studio here we carry hand take salute baba God weh keep everyone till this morning. And we pray make baba God touch the heart of our leaders make dem do wetin right first. And make baba God raise leaders weh go get Jesse for heart. We don shout so tay we don tire. The number one problem when we don observe say Jesse get na Light because the road own don tire everybody. I come deh wonder say upon all the promises, the thing deh take too long to bring transformer. Sometimes I deh wonder how much dem deh sell the transformer self. So now I wan make appeal to people weh don get small money make dem gather body buy transformers for some strategic places for the town as that kind thing fit open our failed politicians eye. The girl weh be Ketiency wife weh dem give vice chairman so, unu nor deh see wetin deh happen for council? MAke unu nor do foolishness like your husband and all the Councillors weh deh that set o. And make unu nor do like Irishegbone weh don represent us once o. Report fly enter our studio say transformers enter the Local government and I wan let unu now say unu fit agitate for one transformer come here o. Abi na usher unu go do there? Unu nor see say transition committee for other places deh act? Common open your eye make u act. For people weh deh go party deh go throw 50,000, 100,000 and spend big money take deh carry women, unu fit gather unu self like 10 or 20, gather the money together and with roughly 2million we fit get better transformer. But Nani self, unu deh hear the cry everyday, unu dem see aam self and unu deh claim say unu deh try to resolve am. But unu suppose know say this thing na major problem and the thing require urgent attention because people deh suffer. Thieves deh enter town because of dark strategic area. People don suffer light outage pass 2 years for some areas and others don deh go 3 years while some don pass 1 year. Why unu nor make effort take give priority to the transformer matter make the thing solve? Unu go deh shout say na so so unu name dem deh shout? Na only unu be person for here. But make unu know say the people eye deh on your now because na you deh represent them. And if you look the transformer issue na only Jesse the thing deh affect for the local government. And anything weh unu wan do make unu nor deh reason whether when Agoda deh there that time why he nor do am because Agoda nor deh fit even enter Jesse again because shame wan kill am. So, for this your time make unu use am well so that after 4years people go fit meet unu and say u were one of the best. Make unu give urgent attention to the transformer issue. Unu nor see say people nor deh even talk about Akpomiemie again and say even if he contest election for e own community he go fail? Because that man just carry show from no where, take opportunity and he come still use e own hand take spoil am. Person weh deh for 4 years no effect and dem still give am appointment no single effect. So unu weh stay here with us weh unu young and na here unu stay with unu children that time weh we deh work for Atiwor for gedu work. Make unu remember those good old days how Jesse take trust you although some chiefs still scold you. But make unu try resolve the transformer issue make the people still see am. Engr. Akpomiemie Anthony weh represent us before for House of Assembly and weh dem don still give commissioner before. Unu nor see say history nor far? Make unu come tell us wetin unu do for Jesse for the 4years weh unu deh office. Make we even leave the commissioner own self. Unu just go government go speak oyibo, carry women, travel abroad, buy cars and build house. Unu nor fit use unu opportunity take work for Jesse make dem see the impact for people like. Even if na Kpakpajoko, Abaku or Oteshiene dem send the message dem for deliver big time and people for deh happy now. Unu go claim say na law unu deh make and na where unu commot Ben Igbakpafor make people proud and now Nani don deh show am again only say make he deh do relevant project and make he deh do dem well na e remain and he don deh change. I want make unu (Akpomiemie) know today say anytime unu pass for Jesse people deh spit throwaway because e nor get just one single thing weh dem go take remember unu name for the Jesse. But right now I wan give you chance to redeem unu image. Make unu go buy two of that kind big transformer weh deh near Ikewun house so make unu donate am give Jesse community and make unu do this thing urgently. Please remember say we nor force you and nor be compulsory but make unu know say wetin we talk here so sense deh. The headmaster weh deh L.A primary school for Jesse, if unu use that unu gate weh don fall so take kill any pikin for the town unu go still die. Make unu nor let witch use that gate take kill pikin before unu go fall am o. Unu nor deh see children weh deh climb that broken pillar weh hold the gate and unu nor deh see the danger weh deh there? We don notice say teachers na 9:oclock dem take deh go school now and we deh try to make sure say one day we go lock dem for outside and na that day people go know Tafia. For all the failed Councillors weh Agoda use Councillor take compensate because of their loyalty, I deh wonder wetin unu do with all the small allocations weh unu collect and money weh unu collect for small community repairs weh unu nor do. Unu nor get money again but wetin unu go do make all past Councillors for the town call their-selves together and make Anthony Atima make the call make all of unu gather money take buy one transformer too and make e be like that kind one weh deh near Ikewun so. Because even if 10 transformers enter Jesse now e nor bad. Make unu call Stanley join unu body o. I go call inbox some of unu weh deh my list make I get feedback and anyone weh nor gree make unu talk am... that one go pack go back to he constituency. Make unu call all them fidelis and all dem Jude and stanley o. Make we get am for mind say this our Jesse the mind weh our fathers take stay nor be divided one. Na mind make everybody for fight together as one and na that time weh we deh live communal life na e good pass. That time we fit die for each other. That time truth deh prevail for every gathering and once the voice of everybody talk dem deh do am. Now we come tire say people just deh rude and hard to control because everybody deh vex for how dem take deh run the town. Make Leaders deh talk true to the followers, make elders know wetin dem suppose do and make dem deh do am well. Make king and high profile chiefs nor deh loyal to politicians and make dem deh call politicians to order. Make dem deh make sure say dem execute project to standard and make dem nor deh sell our street light like the one weh flourish Agoda do. I enter inside bush one day go see say house weh dem never complete, dem never roof am self, street light deh shine there because na Wene weh be formal youth president get am. Why?? And streets like Mission road, Dat street weh Kakitie pikin for get house side, Okuofo road, some deep small small streets nor get the street light. Make elders and leaders deh question those kind act then people conscience go calm down and Jesse go Better. Make I go front of Akpovwovwo up-stair go shop banga rice first. JESSE MUST BETTER!!!
Posted on: Tue, 25 Jun 2013 07:22:14 +0000
Trending Topics
Recently Viewed Topics
© 2015