A.M NEWS!!! From our studio weh deh market road for Jesse we carry ajuju, isorogu and akise and we pour powder follow body with all the women deh sing haleluya take thank Hon John Nani and Jude Fregene and all weh contribute as old market road don get light after years of darkness. Tafia happy well well come declare drinks full ground make people drink and pay. And Tafia thank people weh send card come inbox as na dem use their mind. Make God bless unu pocket as unu deh support Tafia work so and make unu see who go support unu for unu work. We wan sincerely, salute Hon John Nani for the quick execution of the transformer contract and we wan also Thank Jude Fregene because he don still do he own. Report reach us say efemini transformer, Mission road transformer and Ijomi road transformer don ready and dem go light today as I wan join dem work this morning. I don get vital report weh dem deh call prove beyond every reasonable doubt say dem don approve Three Hundred Million Naira (300,000,000.00) for state government for the 2013 budget make dem take complete the Dualisation of the Jesse road. Right now, I deh look for the contractor make I for select men weh go supervise the job on ground make the contracor mobilise come sight come complete the project. Report follow say vibrant young men for Jesse wan buy cars but the road deh discorage dem. This one nor be yeye execution because men go deh on ground take monitor the project to make sure say dem do better job. We don talk tire say the masses na small thing deh make dem happy because we tin we need from government na light, road and drainage. No body beg for food from unu and as unu don deh reason us so na sweet belle we go take deh pray for all of unu weh say make Jesse better!!! Unu weh never do wetin Tafia tell unu make unu rush do am o because Tafia prayer na once dem deh answer am. I wan use this medium take advice people say make dem learn how to keep the property weh government deh give us so make e for last. For instance if you see whi de do illegal connection weh fit bridge wires weh go cause problem give the transformer make unu report am to tafia quick quick. If unu see who deh stone school zink, or spoil tables and windows make unu hold am say na our right to protect government property because we nor wan go back to suffering. And if unu see who deh throw dirty for gutter make unu stop dem because if the gutter block, water nor go flow and flood go deh. And if unu see who wan use road take block road make unu tell am. In those days better access road deh through that place weh go through Innocent salon for market road go burst Agba and through to Amagiya road. But now dem don build block that better access road. make unu stop to deh do that kind thing because years coming those roads dem go do am. Tafia don personally follow the bush weh the new road wan pass so and dem don carry the road go different places as dem wan dodge many houses. But Tafia see say the people serious to do the job. My opinion be say if such proposal deh next time for that kind road, make dem quick grade the place open so that dem go put propose road. And that time people go give chance. Make unu do things weh go make Jesse better and make unu help protect our property make Jesse for better. Make I quick go shop rice for Obiebi compound make I go join dem do the light. JESSE MUST BETTER!!!
Posted on: Thu, 01 Aug 2013 07:28:51 +0000
Trending Topics
Recently Viewed Topics
© 2015