AN DANG CHUANG LOVE - Suakliana Jerusalem Zion khawpui chu thlir teh u, Aw mi an tam, Beram No Lal lenna hmun a awm lo, Aw lungngaihna leh lawmna Kalvari, Tlang a lo lang e. Jerusalem khawpui chu han thlir ta ila, he khuaa mihring awm hmasate chu BCE 3500 daiha awm tawh kha an ni a. Israel lal Davidan a lak hma kha chuan khaw langsar pawh a ni ngai lo.Melkisedeka lalna hmun kha nia ngaih a ni. Tichuan Davida, lal ropui takin a luah lai leh a fapa Solomona lal lai khan Jerusalem chungchang chu ropui takin an sawi thin a. Aw Jerusalem, i chungchang thu ropui takin an sawi thin (sam ziakah kan hmu) He khua hi vawi 20 chuang run a ni tawh a, a chhuta chhut chhiat leh halchhiat barh hi BCE 597 leh AD 70 ah te khan a tawk a. Khaw pakhatah chuan he khua hi ral laka lak tuma beih tawk nasa ber a ni. Khawvela Isua, Pathian Beram No a lokal khan Jerusalemah hian inthawi turte, Pathian be tur tein a kal thin a. Mahse Jerusalemah hian a tan hmun a chep hle mai. Rawng a bawl kum khatnaah khan Messia tiin lala siam an tum a, a hun a la thlen loh avangin thlaler lamah a kal bosan a, a ngeiawm zawngin, atum loh zawngin an nawr a, a tlanchhiat a ngai a. A kal leh tum khat chu Kalhlen kutah a ni a. A ziritirte chu a tel lova kal turin a ti a, a hnuah a rukin a han chho ve leh tho a, a tan hmun awmin a hre lo a ni. A tlawh tum thumnaah chuan Lal angin lo lawm mahse, hekna avangin Krawsah khengbetin an tihlum daih. Beram No Lal lenna hmun a awm lo. Isua thih hnuah hian a zirtirte kha Juda hotute hlau reng rengin an khawsa a, an tan Jerusalem kha a chep tak meuh a. Nekchepna karah inkhawmpui te kha nei mah se, hlauh an nei. AD 70 ah tihchhiat vek a ni ta a, hemi hnu pawh hian Jerusalemah hian Beram No Lal Isua tan hmun a awm zui ta chuang reng reng lo a. Jerusalem beitute hi..Egypt, Jebus, Assyrian, Persian, Macedonian, Hasmonean, Roman ho.. Isua hnuah Byzantine, Persian, Rashidun, Umayyad, Abbesid, Fatimid, Seljuk Turk,Crusaders, Ayubid, Mameluk, Ottoman..chumi hnuah..British, Israel... Heng ho zawng zawngin Jerusalem chunga ro an rel lai hian Englai mahin Jerusalem Zion khawpuiah hian Beram No Lal Isua len nan hmun a zalen ngai lo, tun thlengin. Maite khuaa piang Suakliana, lehkha zir sang lo tak, mit del lehngal hian heng hi a hria emaw ka hre lo. Aw mi an tam Beram no Lal lenna hmun a awm lo a ti tlat. Jerusalem hi khawvela khawpui hlun ber pawl niin a khuaah hian mi an va tam tawh em! Chu hmunah ngei chuan Beram No Lal tana lungaihna leh a ringtute tana lawmna Kalvari tlang chu a lo lang ta a ni. Chu chu Jerusalem City khu a ni. Jerusalem khawpui thar nuam chu thlir teh u, Aw mi an tam Beram No Lal lenna hmun mawiah chuan, Aw Kalvaria Pathian khawngaihna Dawn a tul mang e. Chanhnihna ve thung hi...Khawngaihna lam a hawi raih mai. Van Jerusalem a thlir a.Suakliana hian Bible a Jerusalem pahnih a khaikhin a, Jerusalem thar chu Beram No Lal lenna hmun mawi a ni thung tlat. Chutah chuan mi an tam zia bawk a hrilhfak a. Mahse chuta lut tur chuan Kalvaria Pathian khawngaina dawn a tul tlat mai. Isua Krista hnathawh avanga Pathian khawngaina lo lang lo chan ve hi True ticket to heaven a ni tih a nemnghet chiang hle a ni. Changthumna : Halleluia hril thiam ila, Halleluia, Aw hmangaihna dai chuang ngai lo lawmna, nunna par mawi, Sawi thiam awm maw, hril thiam awm tak ang maw, Aw hmangaihna hi.. Hetah hi chuan Pathian hmangaihna nasat zia, mihringte anka nema hril mai chi a nih loh zia a tarlang a. Pathian hmangaihna hre chiang tak tak tute chuan Pathian fak nan hian Aw mawi chhiar sen loh neih an chak a, Lei sang neih an chak a. Mizo pa Pathian hmangaina hre chiang pakhat chuan Thangvan pui khi zai se, Piallei, nang au la, Hellelui rual rawh se mual zawng zawng, a lo ti bawk a ni. A thunawn mawlh mai hi a ropui a, Maite khuaa sikul chhe chhuak phuaha mawi pawh a ni lo. He hla hi Mizo tawng ni lo, khawvel hriat English a phuah ni ngat sela chuan khawvel hi a deng chhuak chiang ve ang chu- Aw hnam zawng zawng leh chi tin tawng tin hi, Van Lal nau ang a tahna Kalvariah An dang chuang love.. Khawvela hnam hrang hrang leh pianken chi hrang hrang neite hi Isua thisen tlanna zarah chuan silfai, thianghlim an lo ni a. Khan sang deuh, dul kiar deuh, mit kalh deuh, ke zungtang kim lo, mit khing del, sam kir, tarmit bun, haihawt, scientist, khup tuah deuh, biang dinglama khuavang lian deuh nei, urdu tawng hmang, mandarin tawng hmag, celtic thlah leh Myamar chenin, khawvela chi tinreng hi...Van Lal nau ang a tahna Kalvariah An dang chuang lo ve... Khawvela hnam ropui inti British leh Germany mite pawhin he hla hi hria se..eng tin ngai ang maw...??
Posted on: Thu, 23 Oct 2014 18:48:47 +0000
Trending Topics
Recently Viewed Topics
© 2015