ARUBA Dialuna mainta Minister Otmar Oduber hunto cu su coleganan Mike de Meza y Benny Sevinger a presenta un total di 5 proyecto cu ta enfoca riba mehoracion di nos beachnan pa tanto local como bishitantenan. Ta trata aki di e proyectonan na Baby Beach, Cura Cabay/Zeewijk, Surfside, Eagle Beach y Arashi, cual lo mester bay destaho publico pa nan por wordo otorga y cuminsa traha riba nan, e proyectonan aki ta wordo financia via fondonan di FDA y na un escala mas chikito dor di TPEF, e fondo pa mehoracion di producto Aruba. Minister Oduber ta sumamente contento di por a anuncia e proyectonan aki na comunidad ayera, den presencia no solamente di su coleganan, pero tambe di Minister di Labor di Corsow Jeanne-Marie Francisca cu tabata dialuna na nos isla pa un bishita di trabou. Minister Oduber a indica cu e siman aki e destaho lo sali pa loke ta trata e proyecto di Baby Beach. El a duna di conoce cu durante e ultimo 9 pa 10 luna a traha riba diferente cambio cu mester a tuma lugar pa loke ta trata e plannan pa por acomoda Baby Beach di tal forma cu lo bay mehora e infrastructura di e parkeo na unda e veld ta na e momentonan aki. Tambe a prepara e expansion pa loke ta Baby Beach mes banda pabou, vergroening, lo bin e luznan cu tabata ser spera pa hopi tempo y asina eleva e aspecto di seguridad y cu na mes momento lo permiti e uso di Baby Beach te den oranan di anochi. Ademas lo bin un scheidingswand caminda cu e veld ta, es decir, lo alarga e muraya pa por evita dañonan na e beach na momento cu awacero bendiciona nos isla. “Naturalmente lo amplia henter e area aki cu infrastructura di kioskonan cu lo wordo poni den e area di Baby Beach hunto cu instalacionnan di baño, etc pa di e forma aki nos por logra haci di Baby Beach y aplica pa e por bira e promer Blue Flag certified beach na Aruba. Esaki lo haci cu Baby beach por bira un atraccion mundial mirando e reputacion cu e certificacion aki tin”, Minister Otmar Oduber a duna di conoce.
Posted on: Tue, 23 Jul 2013 03:09:07 +0000
Trending Topics
Recently Viewed Topics
© 2015