ARUBA Minister di Turismo, Transporte y Labor Otmar Oduber a anuncia e introduccion di LAN Colombia como aerolinea nobo cu lo bin cu 2 vuelo semanal directo for di Bogota desde promer di december 2013. Pa loke ta trata Latino America LAN ta un di e companianan cu ta den e top tres aerolineanan pa loke ta trata produccion y nan operacionnan. Esaki ta un momento sumamente importante pa pais Aruba, unda cu danki na e esfuerzonan haci pa Aeropuerto di Aruba, Oficina di Turismo y Ministerio di Turismo a logra pa firma e acuerdo aki pa LAN Colombia cuminsa bula e ruta di Aruba. A inicia e comunicacionan pa e proyecto aki cu LAN Chile desde 2007-2008, pero esaki a wordo concretiza durante e ultimo tres añanan caminda a cuminsa conversacionnan cu LAN Colombia. E mandatario ta splica cu pa hopi tempo no tabata posibel pa Aruba tin 2 vuelo di e mes un destinacion, den e caso aki Bogota cu ta crea e fenomeno di competencia. Na momento cu un mercado tin competencia e ta fomenta e mihor prijsnan y mihor prijsnan ta wordo naturalmente converti den un mihor negoshi pa e destinacion cu den e caso aki ta Aruba. Minister Oduber ta indica cu a keda comproba cu e maneho y vision pa diversifica mercadonan den cual Aruba ta activo, no ta crea solamente diversificacion y competencia den e mercado di Colombia, pero tambe por considera cu e vuelonan di LAN Colombia pa Aruba lo stimula otro mercadonan manera Brazil y Peru. Minister Oduber a yama bon bini na e Director di Benta di LAN Colombia, cu tabata di bishita na Aruba ya caba siman pasa y a regresa cu e bon noticia e siman aki for di Colombia, unda desde promer di decemebr LAN Colombia lo cuminsa cu e promer 2 vuelo semanal pa Aruba. Manera ta conoci Minister di Turismo conhuntamente cu Oficina di Turismo y Aeropuerto di Aruba ta percura pa tin semper un bon relacion cu ‘partners’ pa asina aki sigura cu ambos partido lo saca exito maximo di e convenio aki. E mandatario a haci uso di e oportunidad pa elogia Aeropuerto di Aruba, Sr. Steinmetz y Srta. Joanne Arends cu a percura pa hunto logra haci e vision aki posibel. E acuerdo aki lo complementa e trafico entre Aruba y Colombia, cu ta forma parti di e acuerdo Bilateral cu a sera cu Colombia den e di dos kwartal di aña y cu ta duna Aruba e tercer y cuarta libertad. Minister Oduber a pone hopi enfasis cu Aruba lo haci di e oportunidad unico aki uno hopi exitoso, mas aun mirando exitonan ya cosecha for di e mercado Latino Americano. Esaki ta demostra cu e vision poni nos dilanti y cu ATA a ehecuta fenomenalmente poninedo atencion riba e mercado di Venezuela, Colombia y Brazil como e tres mercadonan principal. Manteniendo naturalmente e expectativa pa explora y expande mercadonan for di Argentina, Peru, Chile y Mexico, manera ta para den programa di gobernacion 2013-2017.
Posted on: Fri, 13 Sep 2013 02:14:54 +0000
Trending Topics
Recently Viewed Topics
© 2015