Ai y ai ene paire d’annais, lai poroisse de Faymont dans les Boes, fut in bout de temps sans tiurie. Lou derrie qu’y aivait pessai s’était mâchai des élections, et peu ma foi, les Faymoueunies que ne sont ne mantchots ne gâtchies di brais drait, y aivint embâfenai lai poueugnie de sai souenotte aivo y ne sais troup quoi (Boutan que c’était di mie). Aiprée ste froutai, l’Archevêque raippelit lou tiurie pou peni ces sales poroissiens, ces goueyants de broye-moueutchie, et peu ai les laichi tout breneux aivo lu môtie veu coument in chotot, sans maijeu gnun pou praitchie. « Sé cu la sé con dom, » avait dit lou tiurie en paitchant. Dâdon, pu de messes, pu de vêpres dans lou velaidge. Mon Due, çou que les duemoueunes poraichint longs – âchi longs que des djous sans pain – ai ces mâdits bougres mitenant qu’ai ne saivint pu laivou ollai pou se pessai lou temps. Devant médi, çoulai ollai oncoueu ai po prée : el aivint lu ménaidge ai rédure, lu béte ai èyue ; mais lai véprai, ai demoueurint lai, coument des amen ai se virie et dévirie les peuces. Poutchant, po et po, lai môde vignit d’ollai lou bai temps se boutai ai l’ombre dô lu sutchie et junsque dans lou môtie. Et pou taitchie de rébiai qu’el étint délaitchie et déboptisie po l’archevêque en coulère, ai se bouteunent ai tchantoulai des espèces de vêpres en potois. « Ai lai boueune hure, que diait l’roudge Laxis tchie Mabouly, à moueu en comprend mitenant, gnun ne paye et tout lou monde rit ai ventre déboutenai ; ç’à bin atre aiffaire que ci devant. » Les du pu bais tchantus de l’endrait, ça que tchantint quasi tôdge, ç’était premierement in nommai Coinicu, paure vèye voverai, égrolai et bouetu qu’était aivu dans ste Mérique dans son djune aidge. Ai s’en était reveni ai Faymont aipré lai moe de sai fanne et son pu grand piaiji était de raicontai ses voyaidges dans lou Connecticut ai tiu viai l’oëyit. Les Faymoueunies que ne poueuillint djanmais se raippelai ce mout ou lou dire sans l’éch’tropiai, y aivint boutai nom Coinicu. Les goloupins de lai poroisse s’amugeint même bin sevent ai y récrïai quand ai péssai en cantchoyant : « Coinicu ! Coinicu ! Que n’ai ni quoue ni cu ! » (c’était çou qu’ai saivint lou meux en fait catét’yisse, dà quand lou tiurie était paitchi.) L’âtre tchantu était in bai gâ de veute-cinq ans, grand, foe et béte, in bon coueuillot, mai foi, qu’était aivu sudai ai tchouvâ dans les drogons de Lure. El en aivai raippouchai ai l’ôta ai lai fin de son condgie in bai pieumet roudge qu’el aivait mis à-dechu de son poultrait. Dans lou velaidge, el était achi respectai qu’in roi savaidge ai case qu’el aivait lai poueugne âchi dure que pesante et solide et qu’el aivait lou pu groe reune di pays pou tchantai ou pou criai à fue. En y diait « Lou Voindre » ai câse de sai fôche. Tous les duemoueunes ai tchantint don chu l’air de lai psiâme des vêpres (In exitu Israël) ene sôtche de tchant que n’a djanmais aivu aipprouvai po l’archevêque de Besançon, ni recoueugnu po les conciles et oncoueu moueu beni po lou Pape, mais qu’en aippeule dans lou pays, « Les Vêpres de Faymont.» Les voici, en potois de lai terre roudge et des Boes, tai que noes les ai envie Djoset Creuillot que se les a protiurie chu les yues. C’était Coinicu que tchantait les versts et lou Voindre que fesait les réponses. V. – Lai vou t’en vîré-tu lou Voindre, mon aimi, diverpropis ? Lai vou t’en vîré-tu, dis-mé lo, dis ? R. – Y m’en vira quéri ène fanne, qu’en pensa vo ? Y né vue pé rech’ta sans fanne to comment vo ! V. – Dov quoi lè rèmainérai-tu, diverpropis ? Dov quoi lè rèmainérai-tu, dis-mé lo, dis ? R. – Y lè rèmainera dans in bê tcher-ai-banc, qu’en pensa-vô ? Y né vue pé lè rem’na dans ene vyille bruyotte, to comment vo ! V. – Dov quoi lè neurré-tu, diverpropis ? Dov quoi lè neurré-tu, dis-mé lo, dis ? R. – Y lè neurra dov di bon totchè de foisse, qu’en pensa-vo ? Y ne vue pé lè neuri dov di pain d’ovoine, to comment vo ! V. – Dov quoi lè vêtré-tu, diverpropis ? Dov quoi lè vêtré-tu, dis-mé lo, dis ? R. – Y lè vêtra dov di bê settin tiâ, qu’en pensa-vo ? Y né vue pé lè vêti dov des vyilles guénilles, to comment vo ! V. – Dov quoi lè brochéré-tu, diverpropis, dov quoi lè brochéré-tu, dis-mé lo, dis ? R. – Y lé brochera dov mon roidge pieumet dé drogon, qu’en pensa-vo ? Y né vue pé lè brochie dov neut fichecu dé rémesse, to comment vo ! V. – Dov quoi l’émotcheilleré-tu, diverpropis ? Dov quoi l’émotcheilleré-tu, dis-mé lo, dis ? R. – Y l’émotcheillera dov ène chique coue dé rnâ, qu’en pensa-vo ? Y né vue pé l’émotcheillie dov ène coue dé kesse, to comment vo ! V. – Dov quoi errosoilléré-tu son pertarre, diverpropis ? Dov quoi l’érrosoilleré-tu , dis-mé lo, dis ? R. – Y l’érrosoillera dov ène belle grande kisse, qu’en pensa-vo ? Y né vue pé l’érrosoillie dov ène vyille kennule meujie, to comment vo ! V. – Dov quoi l’èmûjeré-tu, diverpropis ? Dov quoi l’èmûjeré-tu, dis-mé lo, dis ? R. – Y l’èmûjera en y pessant la raitote, qu’en pensa-vo ? Y ne vue pé l’èmujâ dov ène pététe fréguèye, to comment vo ! V. – Dov quoi lè règujeré-tu, diverpropis ? Dov quoi lè régujeré-tu, dis-mé lo, dis ? R. – Y lè régujera dov ène boine pirre émoulotte, qu’en pensa-vo ? Y ne vue pé lai règujie dov ène vyille signole to comment vo ! V. – Lai vou lè mettré-tu coitchie, diverpropis ? Lai vou lè mettré-tu coitchie, dis-mé lo, dis ? R. – Y lè mettra coitchie dans in bê lai bian, qu’en pensa-vo ? Y né lè fourra pé coitchie dans neut sou d’poe, to comment vo ! V. – Comment l’endreuméré-tu, diverpropis ? Comment l’endreuméré-tu, dis-mé lo, dis ? R. – Y l’endreumera en lè bréçant to balement, qu’en pensa-vo ? Y ne l’endreumera pé en lè rioppant, to comment vo ! V. – Dov quoi lè révoilléré-tu, diverpropis ? Dov qoui lè révoilléré-tu, dis-mé lo, dis ? R. – Y lè révoillera dov mai pététe clairinette, qu’en pensa-vo ? Y né lè révoillera pé dov ene peute trompette, to comment vo ! V. – Lai vou lè mettré-tu pichie, diverpropis ? Lai vou lè mettré-tu pichie, dis-mé lo, dis ? R. – Y lè mettra pichie dans in bê poto dé faiyence, qu’en pensa-vo ? Y né lè mettra pé pichie po lè fenêtre, to comment vo ! V. – Dov quoi élévéré-tu tes boûbots, diverpropis ? Dov quoi élévéré-tu, dis-mé lo, dis ? R. – Y zi beillera des boînes reuties, qu’en pensa-vo ? Y n’y mettra pé chu lu deu in fuzi dé toile, to comment vo ! V. – Et si tè fanne meure, lai vou l’enterré-tu, diverpropis ? Lai vou l’enterré-tu, dis-mé lo, dis ? R (En pieurant). – Y l’enterra dans lo pu bê car, dé neut kètchi, qu’en pensa vo ? Y ne vue pé l’enterra dans neut feumie, to comment vo ! Antienne. – Alléluia, alléluia, les tcheus sont gras. Si ç’no pé tchie noe, ço tchi Lombâ, qu’en di bon là ! Derrie oremus. – Amen, amen et tchemné mâque… Neu zerran in currie ai Pâque… OuallahTrinité. Pou côpie certifiai confourme ai lai tradition. Sinai - Djeuset CREUILLOT.
Posted on: Mon, 08 Jul 2013 16:36:42 +0000
Trending Topics
Recently Viewed Topics
© 2015