Akibou e karta ku PHU a manda na Gezaghebber tokante e Moshon di Deskonfiansa ku UPB tin intenshon di entregá kontra Gezaghebber di Boneiru mañan. Respetable presidente i miembronan di Konseho Insular, Tópiko: Integridat, krísis den gobernashon i konflikto entre Gezaghebber i Diputadonan Via media PHU a tuma nota ku tin un krísis den gobernashon di nos isla. Nos mester ta un tiki kouteloso ku komentario pa motibu di e papel ku e Konsehal, ex-miembro di PHU, Rafael Santana ta hunga den tur esaki. Ya hopi tempu kaba nos no ta duna òf kasi no ta duna niun komentario riba su aktuashon, pa motibu ku e lo por wòrdu komprondé fásilmente komo algu personal. Den pasado nos a indiká públikamente kaba ku na nos opinion diputado Burney Elhage ta moralmente obligá di tuma su retiro, pa motibu ku Korte di Hustisia a duna òrdu na Ministerio Públiko pa pèrsiguiele pa un òf mas delito serio. Den un situashon asina un polítiko tin ku entregá su retiro en espera di tratamentu di su kaso. E ta hasi esei pa su mes, pero tambe pa no susha nòmber di su partido. Sin embargo, nos tur a mira ku Elhage no ta komprondé e regla étiko aki. I esnan ku mester a hala su orea, ta keda ketu. Den e konteksto aki nos ta referí espesífikamente na Representante di Reino (Rijksvertegenwoordiger). Su silensio ta krea impreshon, tantu den pueblo komo serka e diputadonan konserní, ku ta OK pa Elhage mantené su funshon. I esaki ta krea impreshon ku Representante di Reino tambe ta haña OK ku UPB ta keda na mando, pasobra nan ta bon mucha. Ademas, ta un hecho konosí ku CDA i UPB ta traha huntu. Na mesun momentu tin e asuntu di Kroon. Tin hopi pregunta habrí, pero nos ta konstatá ku el a skapa ku un reproche. Mirando esei, e lo por keda. Loke el a hasi no ta korekto, pero nos por biba kuné. Den un kultura kaminda e tipo di eror ku Kroon a kometé ta òf tabata normal, un tiki fleksibilidat ta rasonabel. Pero sigur ta ku Kroon no tin niun motibu pa tuma Gezaghebber algu na malu. Gezaghebber a hasi su trabou. Nada otro. Kroon tin ku respetá esei. Si t’esaki ta e kousa di e krísis, e ora ei lógikamente PHU ta skohe banda di Gezaghebber. Pero aki nos problema ta sinta. Nos no sa kiko a pasa realmente. Tabata e asuntu di Kroon ku a kousa e krísis, òf tin otro motibu? Por ehèmpel, por ta asina ku a baha pisá riba e fayo chikitu di Kroon, pasobra esei tabata e úniko kos ku por a proba? Kisas Gezaghebber tabata sospechá diferente otro malversashon grandi, pero no por a haña grep riba nan, aparte di e asuntu chikitu aki. Nos simplemente no sa. Pero si t’asina, e ora ei nos ta komprondé di kon a duna keho en bes di korigí e situashon internamente. Pero sin hechos, niun hende no por husga. Ta p’esei nos no ta saka konklushon ainda. Di kurason PHU ta sostené desishon di Gezaghebber pa laga hasi un investigashon den henter e situashon di WEB ku Ecopower etc. Asta nos kier a pidiele pa amplia e investigashon un tiki i tambe investigá ta di kon no a yuda WEB pa kumpra Ecopower? PHU kier sa ki papel Hulanda (es desir, gobièrnu Hulandes i/òf RCN) a hunga den henter e asuntu aki? PHU ta di opinion ku WEB en bèrdat a malfunshoná pa hopi aña kaba, pero benta di Ecopower na un kompania di afó pa un preis mínimo, klaramente tabata kontra interes di Boneiru. Pa kolmo e kompania kumpradó (Contour Global) a haña un monopolio i komo bonus un kontrato ku ta strangulá tantu WEB komo e konsumidó di elektrisidat i awa. Konsiderando ku na final t’e konsumidó ku ta paga pa finansiá e kompra aki, nos no por mira niun motibu di kon WEB mes no por a kumpra Ecopower. E ora ei tarifa lo por a baha. Ta di suma importansia pa investigá esaki. Tambe kua ròl Hulanda a hunga den tur esaki. Loke a pasa na WEB tin ku ber ku e silensio di Rijksvertegenwoordiger tokante a asuntu di integridat den BC di Boneiru. Aparentemente el a pèrmití tur kos di UPB. I esaki na su turno ta lanta pregunta tokante su propio integridat, loke e por a evitá si e lo a ekspresá su mes riba komportashon di Sr. Elhage, pa djis menshoná un ehèmpel kla. Pero tabatin otro asuntu tambe. Un kos ta sigur. Si t’e investigashon na WEB a kousa e krísis, e ora ei PHU ta sostené Gezaghebber 100%. Si tin otro motibu ku a hunga un ròl, loke nos por sospechá relashoná ku e forma ku Rijksvertegenwoordiger ta traha ku gobièrnu di Boneiru, e ora ei lástimamente, nos no por husga pasobra no tin informashon konkreto over di esei. Nos sí por bisa ku Rijksvertegenwoordiger tin ku respetá boluntat polítiko di pueblo di Boneiru. Su influensia riba gobièrnu lokal mester ta mínimo. Sin embargo, esei no ta e kaso. Lo no ta nada straño si ta sali despues ku e elemento aki tambe a hunga un ròl den henter e krísis aki. Pero pasobra nos no tin informashon, nos no por husga. Te kon leu Rijksvertegenwoordiger a usa Gezaghebber pa hasi e trabou duru i sushi pa inkulká integridat den nos gobièrnu, ta otro pregunta habrí ku nos no por kontestá. Pero atrobe, lo no ta nada straño si ta asina e ta. Ku henter pueblo di Boneiru nos ta spera ku e krísis aki lo por wòrdu solushoná na un manera legal i natural. Nos ta deseá tur esnan envolví hopi forsa i sabiduria. Por si akaso PHU por hasi algu pa trese solushon, nos ta dispuesto pa yuda gustosamente.
Posted on: Mon, 08 Jul 2013 21:35:33 +0000