Aktualmente Kuerpo Polisial Kòrsou ta den preparashon di un proseso pa hisa kalidat den e Kuerpo i hasi su servisio mas efisiente i efektivo na komunidat di Kòrsou. Pa logra esaki ya ta hasiendo algun kambio/adaptashon den e systema di traha/funshona di e miembro nan di Kuerpo Polisial Kòrsou. Kuerpo Polisial Nobo Despues di e reorganisashon lo mester tin un Kuerpo Polisial kompletu ku ta traha a base di kalidat i den un forma profeshonal. Esaki ta rekerí un funshonamentu ku ta sostené e idea aki. Pues lo bin manera ya menshona kambio den e manera di funshoná di tantu e Kuerpo Polisial Kòrsou den su totalidad komo di e polis en partikular. E manera di funshoná di e Kuerpo Polisial nobo i e polis nobo lo ta: ‘Dirigí pa Informashon’, ‘Dirigí riba Proseso’, ‘Dirigí riba Bario’, , ‘Liderazgo’ i ‘Dirigí riba Kompetensia’ (‘Informatiegestuurd, Procesgericht, Wijkgericht, Resultaatgericht’, ‘Leiderschap’ i ‘Competentiegericht’). E polis ta bai funshoná basá riba prosesonan, di kua tur ta deliñá i den harmonia ku otro pa kumpli ku e metanan ku ta bon definí. E polis nobo lo dominá kompetensianan nesesario pa ehersé su funshon nobo mihó, pa por logra e resultadonan deseá kual ta duna un miho servisio na nos komunidad. Pues lo sòru pa edukashon i formashon na midí. Den e Kuerpo Polisial nobo partisipashon i inisiativa di e polis ta bai hunga un ròl masha importante. Esaki debi ku e mester akoplá sufisiente informashon relevante for di diferente fuente pero tambe for di , pa e por hasi su trabou di un manera mas efisiente i efikas. Huntu komo un solo Kuerpo Polisial (kolektivo) tur polis ta karga nan responsabilidat pa duna nan aporte i servisio di kalidat haltu na komunidat di Kòrsou. Wardanan di Polis Den e kuadro aki, entrante 1 di novèmber benidero lo tin algun kambio na e diferente wardanan di polis. E wardanan di Mahuma/Seru Fortuna i Brievengat , lo keda organisá komo Punto di Sosten i Seguridat (Veiligheidssteunpunt). E tareanan di un Punto di Sosten tin un karakter atministrativo. Pues un siudadano por akudí na un di e Puntonan aki pa entre otro: hasi denunsia no komplika, entregá i tuma ophetonan ku a pèrdè i/òf a haña, hasi petishon di ayudo ku òf sin sita i duna keho simpel. Ademas e Puntonan aki lo netwèrk (hasi kontakto) ku siudadano i otro organisashonnan den bario. Por lo pronto e Puntonan di sosten ta habrí 7 dia pa siman di 8:00 or’ pa 16:00 or’. E wardanan (wijkteams) na Punda i Otrobanda lo ta habrí 7 dia pa siman di 7:00 or’ pa 23:00 or’ por lo pronto. E dos wardanan aki prinsipalmente lo ta enkargá ku asistensia i ayudo polisial sin karakter di emergensia (por ehèmpel molèster den bario). Despues di e orarionan menshona e barionan lo keda risibi asistensia polisial di e polisnan ku ta hasi Noodhulp e grupo di handhaving, otro gruponan ku ta enkarga ku proyekto i tambe di e agentenan di bario. Lo no tin kambio serka e wardanan (wijkteams) na Barber, Rio Canario i Montaña. Esakinan lo ta habrí 24 ora pa dia i 7 dia pa siman (24/7). Aki lo sigui brinda: asistensia i ayudo polisial ku un karakter di emergensia (por ehèmpel aksidente ku herido) i asistensia i ayudo polisial sin karakter di emergensia (por ehèmpel molèster den bario i kòntròl strukturá i planiá den bario). Pues por akudí na un di e wardanan aki na momentu ku e wardanan ariba menshoná ta será òf por yama 917 i 911 (dependiente di e kaso). Numbernan di telefòn 911 i 917 Banda di e number di emergensia konosí 911, ku ta konektá ku e ‘Meldkamer’ lo introdusí un ‘Call Center’. E ‘Call Center’ aki lo ta alkansabel 24 ora pa dia i 7 dia den siman (24/7) via di e number di telefòn 917. E meta di e ‘Call Center’ ta pa atendé ku e kasonan i petishonnan ku no tin un karakter di emergensia. Komo konsekuensia lo tin hopi ménos yamada ta drenta serka 911 (Meldkamer). Asina kier logra pa duna mas i mihó servisio kaminda i ora esaki ta nesesario.
Posted on: Wed, 30 Oct 2013 02:22:53 +0000
Trending Topics
Recently Viewed Topics
© 2015