Allir sem tengjast mér á einhvern hátt og þykir vænt um mig... mig langar að þið lesið áfram... "Hjá Guði einum hlýtur sál mín hvíld því að frá honum kemur VON mín. Hann einn er klettur minn og hjálpræði, vígi mitt, mér skrikar ekki fótur." -Sálmarnir 62:6-7 "Allt megna ég fyrir hjálp hans sem mig styrkan gerir." -Filippíbréfið 4:13 Þessi tvö litlu Biblíuvers hjálpuðu mér að sjá hversu mikilvægt það er fyrir mig að eiga VONINA og styrkinn í Jesú, sem hefur staðið með mér í gegnum mikla erfiðleika undanfarið. Mér skrikaði ekki fótur... Eins gott, því ef það hefði gerst, þá hefði bókstaflega allt hrunið í fjölskyldunni og lítið orðið eftir. Ég á frábæra fjölskyldu, tengdafjölskyldu og vini sem styðja mig í gegnum allt sem ég geng í gegnum, en þau geta aldrei verið með mér hvert einasta skref eða hverja einustu sekúndu að tala við mig í síma til að uppörva mig. Það þarf meira til í millitíðinni ef maður er einn að berjast við erfiðleika. Það þarf VON, það þarf haldreipi, það þarf að vita að maður er ekki einn, aldrei nokkurntímann. Þessa VON eignaðist ég fyrir alvöru fyrir um 14 árum síðan, þegar ég fór að umgangast kristna einstaklinga. Það fór allt í einu eitthvað að gerast innra með mér, ég fann fyrir því að þessu fólki á mínum aldri þótti vænt um mig eins og ég var, var ekki að dæma mig fyrir útlitið mitt, bakgrunn minn eða hvað annað sem ég hafði gengið í gegnum þegar ég var í grunnskóla (sem voru óþarfa fordómar og einelti). Þessir krakkar mundu eftir mér og hvaðan ég væri þó ég kæmi inn í rúmlega 100 manna hóp sem hittist vikulega, og ég og vinkona mín höfðum komið þangað í fyrsta skipti sirka 4-6 vikum áður. Manneskjan sem tók á móti okkur minni mundi næstum því nöfnin okkar, var allavega mjög nálægt því. Smám saman eignaðist ég nýja vini í þessum hópi og besta vini mínum kynntist ég þar og lærði að hann er persónulegur og elskar mig alltaf, þrátt fyrir allt sem ég geri vitlaust, hann er ekki með fordóma gagnvart mér eða öðrum, og hann myndi gera hvað sem er til þess að leyfa mér að upplifa sinn kærleik. Það gerði hann reyndar, og ég vissi af því samkvæmt því sem ég hafði lært í skólanum, kirkjunni og í fermingarfræðslunni, en ekki fyrr en þarna var þetta raunverulegt fyrir mér, og ég fattaði að ég gæti ekki bara talað við hann þegar eitthvað væri erfitt, heldur talaði hann líka við mig. Þessa von sem ég eignaðist þarna á sínum tíma, vonina sem hefur haldið mér uppi síðastliðna viku, langar mig að allir geti eignast. Það er til dæmis frábært tækifæri til þess að heyra meira um þessa von í kvöld og á morgun í laugardalshöllinni, sama hvað fjölmiðlar og aðrir sem ekki eiga þessa von og eru á móti kristinni trú eru búnir að reyna að skemma þetta tækifæri fyrir þeim sem enga von eiga, sem hafa ekki heyrt að þeir eigi von, og vegna þessarar leiðinlegu umræðu undanfarið um hátíðina ætla sér ekki að mæta á hana. Það eiga allir erindi inn á þessa hátið, það eiga allir rétt á að heyra boðskap vonarinnar. Það eiga allir rétt á því að upplifa það að þeir eru ekki einir og það þarf ekki að eltast við heimsins áhyggjur eða fylla tómarúmið í lífi sínu með peningum eða öðru veraldlegu. Mig langar að fólk virði þetta tækifæri í dag og á morgun og láti ekki fjölmiðla hafa áhrif á það sem þau jafnvel langar að forvitnast meira um. Það að heyra frábæra tónlist. Það að heyra jákvæðan boðskap frá manni sem sagði í gær að hann hefði ekkert á móti samkynhneigðum, hann trúir á það sem stendur í Biblíunni og er ekki sammála líferni þessa fólks, sama hvað íslensk lög eða önnur lög segja til um. Ég dæmi ekki fólk fyrir það sem það gerir, því ég verð sjálf dæmd á sínum tíma fyrir það sem ég geri eða hef gert. Ég hvet ÞIG til að þora að mæta og njóta þessarar frábæru hátíðar. Ég hvet ÞIG til að þora að vera öðruvísi og svala forvitninni. Það skyldar þig enginn til að mæta. Það skyldar þig enginn til að taka á móti Jesú. Það skyldar þig enginn til að vera sammála öllu sem Franklin Graham mun segja. Mættu, njóttu, hlustaðu, meltu boðskapinn og taktu svo ákvörðun um hvað þú vilt gera við hann. Ég dæmi þig ekki fyrir það ef þú ert ósammála. Ég dæmi þig ekki ef þú labbar út áður en þetta klárast. Ég vil bara ekki að þú farir á mis við þetta tækifæri til að heyra allavega um vonina, sama hvernig þér líður í dag, hversu hamingjusamur eða hamingjusöm þú ert, eða hversu mikið þú fyllir upp í tómarúmið þitt. Þetta er frábært tækifæri til að allavega að kynna þér á einfaldan hátt þá von sem er hægt að eignast í Jesú. Vonandi sjáumst við í kvöld. Ég hlakka til að fá að deila boðskapnum með öðrum í kvöld, og gefa þeim möguleika á þeirri von sem ég eignaðist í Jesú. SJÁUMST Í LAUGARDALSHÖLL :) húsið opnar 17:30 fyrir þá spenntustu sem vilja ná bestu sætunum, samkomurnar byrja kl. 18:30 bæði kvöldin.
Posted on: Sat, 28 Sep 2013 13:45:37 +0000