Atop sang eskwelahan, ginlupad sang buhawi sa Sara, Iloilo Written by Jun Desca Published in Ilongo Friday, 05 July 2013 14:48 ILOILO CITY—Ginsuspindi ang klase sa Sara National High School sa banwa sang Sara, Iloilo subong nga adlaw kasunod sang paglaslas sang buhawi kahapon sang hapon. Sa interview sang Bombo radyo kay Impidio Aspera Sr., PTA president, anum ka classrooms ang nadulaan sang atop matapos ginlupad sang mabaskog nga hangin pasado alas 5:00 kahapon sang hapon. Kabahin diri ang 5 ka classrooms sang grade 7 kag 1 ka classroom sang grade 8. Isa sa mga atop nga ginlupad sang hangin ang nagtupa pa sa malapit nga elementary school. Magluwas sa mga eskwelahan nga nadulaan sang atop, naglapta man ang madamu nga debris sa eskwelahan rason nga ginsuspindi na lang ang klase. Ang paglaslas sang buhawi natabu pasado alas 5:00 kahapon sang hapon sa diin sa maayo nga palad, wala na sang mga estudyante sa eskwelahan kag gwardya na lang ang nabilin sa diin naglawig sang 10-15 minutos ang paglaslas sang hangin. Nagahingyo naman sang bulig subong ang eskwelahan nga mapakaayo gilayon ang mga naguba nga classrooms agud makabalik na sa regular nga klase sa Lunes. Magluwas sa eskwelahan, may mga balay man nga naguba kag nagkalatumba nga kahoy lakip na ang mga poste sang kuryente rason sang power blackout sa apat ka banwa sa 5th district sang Iloilo kabahin ang Sara, Ajuy, Concepcion kag San Dionisio.
Posted on: Fri, 05 Jul 2013 08:00:02 +0000
Trending Topics
Recently Viewed Topics
© 2015