Attention Please ! هي الأجيال بتطلع أوحش من اللي قبلها ليه ؟ ------------------------------------------------------------------------- سمعت من فتره ان هاني سلامه عمل مسلسل اسمه الداعيه ... و طبعا لأني عارفه عن هاني سلامه و يوسف شاهين كنت متخيله الغرض هيكون ايه .... و بعيدا برضه عن ان دقنه في المسلسل كيوت كده و شكلها شيك غير الدقن السنه المنعكشه المتربه ( أو زي ما حابين يرسموا في أذهاننا ) ابقوا تعالوا شوفوا خالي بيهتم بدقنه ازاي :) المهم بقى كانت مروه خارجه و ساحباني في ايدها كالعاده ففي المحل شفت اعلان المسلسل ده لأجد الآتي : - في لقطه بسمه بتزعق له بصوت الناشطات الحقوقيات "لما تحب توجه لي كلام تبص لي او فيما معناه يعني " و هذا يعد هجوم صريح على فكره غض البصر lowering the gaze أو غض البصر مش فكره ده أمر في القرآن للرجل و المرأه ..... و طبعا هاني سلامه مجسد شخصيه مقرفه جدا عشان كلنا نكره الدقن و نقول "المهم الأخلاق " و كأن الدقن معناها يبقى مفيش أخلاق !! و طبعا هو الشرير اللي ضد الموسيقى !! و لو حد قالي الموسيقى فيها اختلاف هقوله على راسي من فوق خليني أقولك لما يبقى فيه اختلاف في حكم فقهي بيحصل ايه ..... الرأي الفلاني بيحط الأدله اللي على اساسها قال الرأي ده و الرأي الاخر بيحط الأدله اللي على أساسها قال الرأي ده و حضرتك بتعقل انا مش بقول الأغاني حرام عشان مزاجي أغلس عليك !! لأ عشان فيه حديث صريح في الموضوع ده و بعيدا عن اني مش داخله أناقش حكم فقهي أنا بس بوضح ان المسلسلات مش الحكم في الاختلاف في الأحكام يعني لو عايز تعرف الحقيقه دور على الأدله مش عشان بسمه قالت لك في المسلسل peace ! و طبعا أخلاقياته سيئه جدا و عمل نفسه وصي على الناس باسم الدعوه ... عشان لما تشوف زميلك اللي بدقن ولا زميلتك قررت تنصحك نلاقي وحش طلع منك بيهاجم الوصي الخيالي اللي شفتيه في المسلسل و تخيلتي انه بيتجسد فينا في الواقع ... لأ على فكره الحقيقه ان العلماء ورثه الأنبياء و الحقيقه برضه ان الدين النصيحه يعني مش معنى أن حد نصحك أن قرر يبقى وصي عليكِ بالعافيه فلازم تهزقيه عشان تدافعي عن حريتك ( اللي انتِ فهمتي ان حد بيهاجمها !! ) الخلاصه .... و الهري ده كله عشان الناس بتيجي تتسائل هي الأجيال بتطلع أوحش من اللي قبلها ليه ؟؟ و الأخلاقيات في انحدار مستمر ؟؟ عشان الهري اللي بيدخل أذهاننا و احنا مش حاسين من مسلسل و مسلسل رمضان اللي بعده هيبقى أسوأ و هكذا و هكذا أما بالنسبه لغض البصر ........ لو حضرتك شايفه انه اهانه ان زميلك ميبصلكيش او ميفضلش مبحلق في جمال حضرتك و هو بيكلمك هقولك فكره خطيره ..... ردي له الاهانه يعني متبصيلوش انتِ كمان :D قشطه :D انا شخصيا دورت في نفسي و وجدت اني بحس ان اللي قدامي بيحترمني و هو مش مبحلق فيا ببلاهه و هو بيكلمني ... قمت عملت save as حته فطره سليمه لسه الحمدلله حافظوا على نفسكم المسأله انك مبتبقاش حاسس بالتغير اللي بيحصل في تفكيرك this is asymptomatic mind toxicity
Posted on: Tue, 30 Jul 2013 15:38:02 +0000
Trending Topics
Recently Viewed Topics
© 2015