BIBLE CHHUT THAR BER (COMMON LANGUAGE RE-EDITED) –A TAWNGKAM THENKHAT TE HI TAWNG BUNGRAW HRANG - TUM THUHMUN (DYNAMIC EQUIVALENT TRANSLATION) AN NI LO: Exodus 20:7 “LALPA i Pathian hming chu I lam mai mai tur a ni lo; LALPA chuan a hming lam mai mai chu thiam loh chantir lohvin a chhuah dawn si lo va”. (Old version/OV re-edited) “I Pathian, LALPA hming chhalin dawt sawi suh; dawta a hmingchaltu chu Pathianin hrem lohvin a chhuah lo vang”. (CL re-edited) Note: India ramah chuan Danpui (Constitution) a awm a. Chumi hnuaiah chuan danpui kalh si lovin dan-te-sep tam tak a awm a. Heng dan-te-sep te zinga pakhat hian khawi laiah emaw danpui akalh vaih chuan dan-te-sep chu thiah a ngai thin. Chutiang deuh chuan kan Pathian engkim tithei hian Danpui (Thu Sawm pek) Sinai tlangah Mosia hnenah Lungphek a ziakin a pe a. (Ex. 31:18). Chu Danpui chu Pathian kutzung a ziak a ni. Thu Sawm pek hi Pathian Danpui (Constitution) mihring te tan a siamah kan puh thei anga. Mosia hoin dan-te-sep tam tak a siam te hi thupek sawm hnuaia awm vek an ni. Thu Sawm pek- a a hmasa pali te hi amah Pathian chawimawina lam an ni a: (1) Keimah lo chu Pathian dang nei suh; (2) Milem be suh; (3) Pathian hming a naran in lam suh; (4) Chawlhni serh rawh; tih te an ni. Amah lo Pathian dang neih a phal lova. Milem biak a phal lova. Ama hming bik (proper name) tul lova sawi rik a phal lova, lei leh van leh a chhunga chengte a siam zawh entirna a chawlh tak na ni hrereng tur leh serh turin min duh. Thusawm pek 3-na in sawi a tum hi chu a tha lamin emaw a chhe lamin emaw thutak sawi nan emaw dawt sawi nan emaw, a engti hawi zawng pawhin Pathian hming bik ‘Yahweh’ hi lamrik mai mai loh tur a ni.Tuna Bible lehlin thar (Common language/CL re-edited) in a sawi chu ‘Dawt i sawi dawnin Lalpa (Yahweh) hming lam suh u’ tihna a kawk chauh a ni. Hei hi tawngkam bungraw hrang, tum thuhmun (dynamic equivalent translation) ani lo chiang a ni. “You shall not take the name of the LORD your God in vain; for the LORD will not hold him guiltless that takes him name in vain” - Ex. 20:7. (King James Version/KJV) ‘Vain’ tih tawngkam lo chhuahna chu Hebrai tawng ‘Shawe’ emaw ‘Saw’ te an ti a ni awm e. Chu chu ‘worthlessness’ (pawmtlak loh), ‘vanity’ (lawilohna), ‘falseness’ (dik lohna), ‘false’ (diklo), ‘lying’ (dawtsawi), ‘lies’ (dawt) tihna te a ni, tiin mithiam thenkhat te hrilhfiah dan a ni. England Lal, James’an a lehlin tir a, mithiam rualte tawngkam hman ‘vain’ hi mizotawng chuan ‘holam’, ‘naran’, ‘thutak lo’, ‘mai mai’, ‘satliah’ tite pawhin a dah theih ang.
Posted on: Thu, 25 Jul 2013 05:16:58 +0000
Trending Topics
Recently Viewed Topics
© 2015