BONEIRU Rijksdienst Caribisch Nederland (RCN) den kolaborashon ku Entidat Públiko Bonaire, Sint Eustatius i Saba, i e Konseho di Enseñansa i Merkado Laboral di Hulanda Karibense (Raad Onderwijs Arbeidsmarkt Caribisch Nederland – ROA CN) a laga hasi un investigashon di merkado laboral. E resultadonan a kaba di bira optenibel. E meta di e investigashon tabata pa krea un bista di e manera ku e demanda i oferta riba merkado laboral na Hulanda Karibense ta relatá na otro, i kon e relashon entre enseñansa (vokashonal) i e nesesidat di e merkado laboral ta. Banda di esaki a hasi un investigashon di e posishon i e imágen di RCN i e Entidatnan Públiko komo dunadó di trabou. A interpretá e resultadonan di e investigashon den dos rapòrt. E rapòrt “E merkado laboral na Hulanda Karibense 2013, inkluso rekomendashonnan pa maneho” i e rapòrt “E posishon di gobièrnu di Hulanda Karibense komo dunadó di trabou”. Merkado laboral na Hulanda Karibense E redaktornan di e rapòrt ta konsehá pa duna prioridat na: Dunamentu di un impulso na estudionan vokashonal ku ta relevante pa e merkado laboral, prinsipalmente pa e profeshonnan tékniko, ICT, turismo i horeca. Hasi un komienso ku desaroyo i ehekushon di un maneho di migrashon koherente. Tantu pa migrashon entre e islanan komo remigrashon for di Hulanda. Formulá un ophetivo pa intermediashon konkreto i sigui desaroyá i inkorporá instrumentonan pa intermediashon, pa yega na un mihó manera pa kombatí desempleo. Ofresé kontrato di empleo ku un durashon mas largu (mínimo di 3 aña) i ofresé kontratonan fiho na remigrantenan. Adaptá e kalidat di leinan di labor i un mantenshon mas estrikto di esaki. Mehorashon di e klima di invershon pa kompanianan eksistente i kompanianan nobo. Aki trata entre otro e adaptashon di e legislashon di impuesto na fabor di e invershonistanan. Un di e rekomendashonnan den e rapòrt ta pa stipulá un punto di koordinashon pa manehá, stimulá i monitòr implementashon di tur e rekomendashonnan. E Entidat Públiko ta esun mas apropiá pa hasi esaki, mirando ku prinsipalmente ta trata mehorashon di funshonamentu di e merkado laboral riba e isla. E posishon di gobièrnu komo dunadó di trabou E rapòrt no ta kontené análisis i rekomendashon spesífiko pa Saba i Sint Eustatius, pasó aki muchu tiki empleado a entregá e kuestionario yená. For di e rapòrt ta resultá ku RCN i Entidat Públiko ta dunadónan di trabou atraktivo pa potensial empleadonan. Prinsipalmente pa personanan riba e islanan mes, i ménos pa personanan for di den region. Pa personanan for di Hulanda, inkluso remigrantenan, tin hopi opstákulo, prinsipalmente riba tereno finansiero. A investigá kiko por hasi pa garantisá entrada di sufisiente empleado bon eduká riba término kòrtiku i término mediano. E redaktornan di e rapòrt ta konsehá entre otro e siguiente asuntunan: Pone mas atenshon na retenshon di e personal aktual. Halsa e produktividat di kada empleado, dor di drecha e efisiensia interno. Baha e preshon di trabou. Sigui desaroyá un maneho profeshonal di personal, bou di kua spesífikamente un maneho pa esnan di edat avansá i esnan mas hóben i ofresé oportunidat pa desaroyá. Adaptá e métodonan di reklutá. RCN, Entidatnan Públiko i ROA CN, kaminda ta nesesario konhuntamente, lo saka nan konklushonnan i mira di kua manera nan por tuma medida i transformá e resultadonan di e investigashon di merkado laboral den maneho, remarkando si ku un parti di e rekomendashonnan ta kai riba tereno di e departamentunan di Den Haag i ta pertenesé na nan responsabilidat. E organisashon di investigashon i konsulta Ecorys en kolaborashon ku e ofisina di konsulta ekonómiko i di maneho Curconsult a hasi e investigashon di merkado laboral.
Posted on: Thu, 20 Jun 2013 23:57:09 +0000
Trending Topics
Recently Viewed Topics
© 2015