BORESETSE: Mosireletsi wa setshaba, Advocate Thuli Madonsela - o nale tetla go ya ka molao go gwetlha tshwetso ya tona ya tlhaeletsano Faith Muthambi le dikatlenegiso tsotlhe tsa board ya tirelo-kgaso ya Afrika Borwa, SABC - mabapi le go thapa leruri motlhankedi-mogolo wa tsamaiso wa SABC, Hlaudi Motshoeneng. Seno ke go ya ka moitseanape wa merero ya molao-theo le motlhatlheledi wa molao kwa University of Cape Town Professor Pierre De Vos. Professor De Vos - a re seno ke ka gonne ga reng ga tse dingwe, SABC - e reteletswe ke go isa Motshoeneng kwa kgotleng-kgalemo go latela diphitlhelelo tsa dipatlisiso tsa mosireletsi wa setshaba - e leng nngwe ya ditheo tseo di itsegeng ka Chapter Nine Institution tse di akaretsang ga reng ga tse dingwe, Khomishine ya ditshwanelo tsa botho le Khomishine e ikemetseng ya ditlhopo. Go lebega fa ditheo tseno di kopana le kgwetlho ya go tsweletsa tiro ya tsona go ya ka malaotheo. Sekai ke yona tiragalo eno ya go thapiwa ga motlhankedi-mogolo wa tsamaiso wa SABC le fa gone go nale dikatlenegiso go tswa go mosireletsi wa setshaba Advocate Thuli Madonsela. Re buisana le moitsanape wa molaotheo go tswa kwa University of Cape Town, Professor Pierre de Vos ka ditheo tseno. A re utlwe go tswa mo go wena o le moagi wa Afrika Borwa o nagana gore puso e ka dira eng go netefatsa gore ditheo tseno di tsewa tsia? Romela tshwaelo le maikutlo a gago mo tsebeng ya rona ya facebook ya Boresetse kgotsa Moepeng Mosimanewamotlhaping Korogo, twitter: @moepengkorogo, email: address:[email protected] kgotsa o ka letsa mo 018-3897402. Ammaruri re lebogela seabe sa gago mo thulaganyong ya rona ya Boresetse - Legae la gago la tshedimosetso e tshepagalang mme e bile e ikanyega.
Posted on: Mon, 14 Jul 2014 03:38:54 +0000
Trending Topics
Recently Viewed Topics
© 2015