"BU KITAP SAHTEKÂRLARĞA QARŞI BIR VASTA OLUR", – dedi "Qırımtatarlarnıñ tarihı" kitabınıñ müellifi V.YE. Vozgrin halqımıznıñ aqiqiy tarihını aydınlatqanını bildirip. Lâkin er kes onıñ fikrinen razımı? Kitap taqdiminden qaydlar Zera BEKİROVA Doğma aqmescitli rusiyeli tarihçı, Skandinaviya devletleri boyunca mütehassıs, professor Valeriy Vozgrinniñ "Qırımtatarlarnıñ tarihiy taqdirleri" kitabınıñ birinci qısmı bundan yigirmi yıl evelsi dünya yüzü körgen edi. Alimge eseri üzerinde işini devam etmesi içün yardımğa bütün halq atlandı, kitapnıñ neşirine beş grivnâdan başlap biñlernen para toplandı. Yigirmi yıllıq mahsulnıñ dünya yüzü körmesi içün bu para ep bir yeterli olmadı ve bu vazifeni iş adamları Lenur İslâmov ve Emil Aliyev boynuna aldılar. Avgust 14 künü ise qırımtatarlarnıñ qadim devirlerden Ekinci cian cenki yıllarına qadar tarihını qaplap alğan 4 cılttan ibaret eser Aqmescitte Ukrain muzıkalı-drama teatrinde Meclis yolbaşçıları, ziyalılar, qırımtatar cemaatçılığı, milliy areket veteranları iştirakinde tantanalı şekilde taqdim etildi. Cumhuriyetniñ resmiy şahıslarından iç kimse körünmedi, albu ki olarnıñ episi davet etilgenler. Bu kibi er bir tedbirde olğanı kibi müellifniñ şerefine medhiyeler oquldı, vaqia ise umumhalq bayramı kibi tanıldı. Böyle müit yaratılmasına taqdimnameni alıp barğan jurnalistler Lilâ Bucurova ve Şevket Memetovnıñ kiriş sözleri de sebepçi oldı. Qırımtatar halqı Meclisiniñ reisi Mustafa Cemilev, onıñ birinci muavini Refat Çubarov müellifke böyle ciddiy ve ilmiy iş içün teşekkür bildirip, M. Cemilev müellifniñ başına qalpaq da kiydirdi. Olardan soñ cevap sözünen çıqışta bulunğan V. Vozgrin de borclu qalmadan, em Meclis reisine şahsen, em de diger qırımtatarlardan minnetdar olğanını bildirip, bir qaç kün evelsi "Qırım" gazetasında yazıcı Riza Fazılnıñ maqalesine işaret eterek, belki kitapnıñ mündericesine kimlerniñdir itirazları da bardır, dedi. İtirazlar ise az degil eken. Olarnı ifade etmek içün mikrofon yanında bayağı bir adam toplandı. Lâkin çıqış fursatına ancaq dört adam nail oldı. Olardan da ekisi, yani milliy areket veteranı Ruslan Eminov çoq yıllar evelsi "dostu Valerağa bu işni yapmaqnı rica etkenini", öz vaqtında Lenur İslâmovğa tarihtan ders bergen oca Adil Seitbekirov bugün talebesine 12 ball qoyğanını aytsa, milliy areket iştirakçisi Gömer Bayev müelliften qırımtatarlar tamır halqmı, dep soradı. Tilşınas professor Ayder Memetov müellifni sovet devrindeki tarihçılarnıñ uydurmalarını devam etkeninde tenqid etip, skifler iç bir zaman iran tilinde laf etmediler, türkçe qonuşa ediler kibi ve ilâhre delillerini ketirdi. Onıñ çıqışı belgilengen reglament sıñırından çıqqanından sebep başqalarğa söz berilmedi. Soñra kitap tarqatuv ve imzalavğa keçildi. Tedbirge medeniyetli adamlar toplansa da, bedava kitap almaq içün medeniyet biraz unutıldı. Alıp barıcılarnıñ em rus, em ana tilimizde "kitap er keske yetecek, yetmegenlerge ise sertifikat berilecek, lütfen qalabalıq yapmañız" dep yalvarğanlarına baqmadan kitaplar sayılı daqqalar içinde ortalıqtan cıyıştırıldı. Böyle meraq pek yahşı, lâkin buña kitapnıñ içindekilerine de ciddiy diqqat, talil qoşulsa daa güzel olur. Jurnalistlerniñ suallerine cevap bergen ATR kanalınıñ saibi, kitapnıñ baş sponsorı Lenur İslâmov: "Bu er bir qırımtatarına kerek, sizge de, bizge de. Biz, qırımtatarlar, öz tarihımıznı bilmek kerekmiz. Men, er bir qırımtatarı kibi, qalğanlar da qırımtatarlarnıñ bu topraqta kim olğanını bilgenlerini isteyim".
Posted on: Thu, 15 Aug 2013 11:42:44 +0000
Trending Topics
Recently Viewed Topics
© 2015