BUBBLE by Michael Abrahams Dem a wear party shirt an a call out fi Portia An a wave orange flag like Dutch football supporter Wave flag through car window an wave flag inna sky Me haffi wonder if dem a wave dem flag fi fan fly Fly weh a buzz roun di stench of corruption Weh a flow like a river widout interruption Wheels of justice turn slow like turtle An di stinkness tun up til joncro waan circle Trafigura an Spencer still inna court Contractor General give damning report Illegal activity from Mr.Azan But Sister P hug him up like him name Superman People cyaa afford light bill an rent Unemployment up at sixteen percent One o two Jamaican fi buy one U.S. cent An IMF test nuh stop stress we inna wi economic mess Millions spen pon Grand Gala fi jump an celebrate But Glenhope an Windsor cyaa re-open dem gate While di abuse a wi children tun national pastime As we feel di heat from a upsurge in crime Leader go China an give interview An look like she lost, like she doh have a clue Goat Island talks transparent like thick black smoke Chat bout “two likkle lizard” like wi environment is a joke Local media kept at bay Tun off microphone gwaan di most way Like seh dem nuh waan we fi know di truth Wah kinda example dem a set fi wu yute? Den PJ seh di party need “loving care and attention” BUT A DI PEOPLE OF DIS COUNTRY NEED DI CARE AN DI ATTENTION! Bout how old tree need “sustenance” fi mek it alright (But old tree often rotten and harbour parasite) Wi country pop dung an inna serious trouble But some a we live inna one big everlasting soundproof titanium reinforced shock-absorbing bubble A jump an a wave flag bout “tun up di ting” But all me see around me… is… pure… suffering.
Posted on: Sun, 29 Sep 2013 12:01:26 +0000
Trending Topics
Recently Viewed Topics
© 2015