BUHCHANGPHAIAH ASSAM POLICE IN MIZO LEILET ENKAWLTUTE THLAM THIAT TUR IN AN TI Mizoram chhunga ngaih, Buhchangphai Ramthar Zaua Mizoleilet enkawltute chu nimin zing khan Assam Police leh Forest miten an kal chilh a, thlámte chu ṭhiat turin an hriattir a; hei vang hian nimin vek khan Mizo IR police-te tirh nghal an ni. Buhchang branch YMA president C Lalhmachhuana sawi danin, Assam police 12 leh Forest mi eng emaw zat chu nimin zing dar 8:30 vel khan Ramthar Zau-ah an kal a, April 2014-a Asssam police-ten thlám an ṭhiahsak hnua sorkar ṭanpuina hmanga thlám sak ṭhat lehte chu ṭhiat turin Mizo leilet enkawltute an hriattir a ni. Assam police-te chuan, thlámte chu a neituten an ṭhiah loh chuan anmahnin an ṭhiahsak tur thu an hrilh a; leilet enkawltu vaite chu vawiin zinga Genda Police Outpost, Assam-a inhriattir turin an ti bawk. C Lalhmachhuana chuan, Mizoram leh Assam sorkar hotute ramri chungchangah a inbe tawha an ngaih laia Assam police-te an che leh chu mak an tih thu leh, Assam police-te chet zui dan chu a hmuna thlìthlai reng an tum thu a sawi. Assam police-te chetna avang hian Bilkhawthlir Police Station OC Vanlalruata leh a naute chu nimin vek khan Ramthar Zau-ah an kal nghal a, Kolasib aṭangin IR police-te an kal bawk. Buhchangphai Ramthar Zauah hian April 27, 2014 khan Assam Police leh Forest miten Mizo leilet thlám pali an lo tichhe tawh a; chungte chu April 29, 2014-ah Buhchang khawtlangin hnatlangin an sak ṭhatsak a, mahse April 29, 2014-ah vek tlai dar 3 velah Assam police 50 velin an ṭhiahsak leh nghal a, thlai leh thei eng emaw zat an suasam bawk ani. Assam police-te chet dan avangin Ramthar Zau hi Home minister R Lalzirliana, Environment & Forest minister Lalrinmawia Ralte leh Mizoram police hotute chuan April 30-ah a hmunah an tlawh a; Home Minister chuan, Buhchangphai Ramthar Zau chu Mizoram chhung a nih thu sawiin, Assam police-te an che leh a nih chuan lo kâp turin Mizo IR police-te a hrilh a ni.
Posted on: Tue, 20 Jan 2015 04:10:49 +0000
Trending Topics
Recently Viewed Topics
© 2015