Banko Sentral: Ekonomia di Kòrsou a bai levemente atras den 2012 banko sentral cur sxm– Miéntras ku na 2011 ainda tabatin un kresementu modesto di ekonomia di Kòrsou, na 2012 ekonomia a bai atras ku 0.1 porshento. Asina presidente di Banko Sentral, Emsley Tromp a bisa awe na presentashon di e Relato Anual 2012 di Banko Sentral di Kòrsou i Sint Maarten. Aña 2012 tabata di kuater aña desde komienso di e krísis finansiero internashonal. E pasonan pa rekuperá di e krísis tabata lento i karakterisá pa insertidumbre den sektor finansiero, peso di debe públiko haltu i medidanan fiskal di ousteridat. Durante aña 2012 kresementu di ekonomia mundial a baha te na 3,2%, loke ta konsekuensia di aktividat ekonómiko ku a debilitá na e paisnan di ekonomia avansá i emergente i na e paisnan den desaroyo. Na Kòrsou, Produkto Interno Bruto real a baha ku 0,1% na 2012, despues di un ekspanshon di 0,6% na 2011. E kontrakshon ekonómiko akí tabata kompañá pa un oumento di e tasa di inflashon di 2,3% na 2011 pa 3,2% na 2012. E oumento di e tasa di inflashon tabata prinsipalmente resultado di subida di e tarifa di “omzetbelasting” di 5,0% pa 6,0% na 2012. E kaida di Produkto Interno Bruto di Kòrsou tabata konsekuensia di un bahada di demanda lokal. Tantu demanda públiko komo demanda di parti di sektor privá a baha na 2012. Den sektor privá demanda a baha debí na ménos konsumo. E inflashon durante 2012 a redusí forsa di kompra di konsumidónan, loke tabatin komo konsekuensia un kaida den konsumo privá. Invershonnan privá al kontrario a registrá un kresementu marginal, danki na invershonnan den, entre otro, refineria i sektor di utilidat. Mientrastantu, demanda públiko a baha pa motibu di ménos konsumo i invershon di parti di gobièrnu. Demanda neto for di eksterior a kontribuí di un forma positivo na kresementu ekonómiko durante 2012, komo e kresementu den eksportashon a surpasá subida di importashon. E resultado ekonómiko negativo na Kòrsou tabata pa gran parti resultado di un kontrakshon den e sektornan di industria i konstrukshon. Ademas, e otro sektornan ekonómiko a konosé un kresementu ménos fuerte na 2012 kompará ku 2011. Den e sektor di industria, balor agregá real a kontraé, prinsipalmente debí na un kaida den produkshon na refineria Isla. Trabounan di mantenshon, ku a tuma lugá durante gran parti di 2012, i retraso den e proseso di start e cat cracker despues ku a terminá e trabounan di mantenshon, a kousa e bahada di produkshon. Ademas, aktividat di reparashon di barku a kai, loke tabatin komo konsekuensia un redukshon di e kantidat di ora di trabou bendí. Meskos ku tabata e kaso durante e dos añanan anterior, aktividat den sektor di konstrukshon a baha na 2012, pa motibu di falta di proyektonan grandi di konstrukshon. Durante último añanan e kantidat di proyekto grandi di invershon den sektor privá a kai debí na, entre otro, falta di konfiansa di parti di invershonista i e situashon ekonómiko na Hulanda ku a empeorá. Hulanda ta un merkado importante pa e sektor di propiedat residensial na Kòrsou. Aktividat a debilitá den sektor di komèrsio por mayor i por detal, debí na un kaida di demanda lokal. Sinembargo, oumento di reeksportashon dor di e empresanan den Zona Franka i desaroyo positivo den sektor di turismo a kontribuí di un forma positivo na kresementu di aktividat den sektor di komèrsio por mayor i por detal. Den sektor di utilidat aktividat a debilitá, pa motibu ku e oumento di produkshon di elektrisidat i awa tabata ménos evidente na 2012 kompará ku 2011. Produkshon real a krese den e sektornan di transporte, almasenamentu i komunikashon, ounke e tasa di kresementu tabata ménos evidente na 2012 kompará ku 2011. Transporte aéreo i aktividatnan relashoná ku aeropuerto a subi konforme e oumento di e kantidat di turista di estadia. Ademas, e kantidat di buelo komersial a krese na 2012 kompará ku 2011. Haf tambe a registrá resultado positivo danki na un oumento di e kantidat di barku ku a despachá, i kresementu di e kantidat di karga ku a atendé i di e aktividatnan di almasenamentu di krudo. Tambe den sektor di servisio finansiero aktividatnan a debilitá na 2012. Balor agregá real di servisio finansiero lokal a subi danki na un oumento di entrada di interes neto. E mayor entrada di interes neto tabata resultado di un kaida di gastunan di interes. Desaroyo den sektor di servisio finansiero internashonal tabata desepshonante, komo aktividatnan den e sektor akí a kai, loke a kousa un bahada di suèldo i salario. Por atribuí e desaroyo positivo den sektor di restorant i hotèl na kresementu di e kantidat tantu di turista di estadia komo di turista krusero. E desaroyo alentador den turismo di estadia durante 2012 ta suprayá importansia di mas konekshon aéreo. Durante 2012 konekshon aéreo ku Suramérika i Sentroamérika a oumentá, komo COPA Airlines a kuminsá ku buelonan regular entre Kòrsou i Panamá. Ademas, Air Berlin a introdusí konekshon aéreo direkto entre Düsseldorf i Willemstad. Un análisis di e diferente ramonan di merkado ta mustra ku e kantidat di bishitante for di Sur- i Sentroamérika, partikularmente Venezuela, a krese konsiderablemente na 2012. Ademas, e kantidat di turista europeo a subi, prinsipalmente danki na un kresementu signifikativo di e kantidat di bishitante aleman. Pero, un bahada di e kantidat di turista hulandes, ku ta e merkado prinsipal di turismo pa Kòrsou, a moderá kresementu di e kantidat di bishitante europeo. Kaida den e kantidat di bishitante di Norteamérika i di Karibe a moderá e ekspanshon di turismo di estad
Posted on: Wed, 24 Jul 2013 01:38:21 +0000
Trending Topics
Recently Viewed Topics
© 2015