By.Rev . Biak Chhunga Vawiin October 28, 2013 tana Pathian thu—Philippi 4:8 A tâwp berah chuan unaute u, a dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te - ṭhatna rêng a awma, fakna rêng a awm awm phawt chuan - chûng chu ngaihtuah rawh u. Ngaihtuahzawm atan Kan ngaihtuahna hian a tha lo lam (negative lam) a awn hrim hrim a. Mi thiamho sawi danin kan thluakah hian a tha (positive) lam leh tha lo (negative) lam ngaituahtu (handle-tu) hi a hran ve vein an awm a, a tha lo lam ngaihtuahtu chu a lian zawk lehnghal a. Hemi avang hian a tha lo lam chu kan hre rei thei zawk tlat thin. Entir nan, $50 i hloh ni kha $50 i hlep ni aiin i hre rei zawk ang. Hei vang tak hian kan ngaihtuahna hi kan ven that a ngai ta a ni. A tha lo lam ngaituahna a lo luhin mi tam tak chuan movie en tur ang maiin kan thuthmun kan han rem tha sauh sauh a, popcorn (vaimin kan puah) kan ei a, kan ngaituahna mitthla puan var (screen)-a rawn inlar thil tha lo lam (negative lam) chu kan thlir nawn kan thlir nawn thin. I hriat tur chu e, chu chauh chu en tur channel i nei lo a nia. Channel dang, i lo hlawhtlin tawhna te, thil tha tak tak i lo tih tawh thinte pawh kha thlir tur a awm a nia. I hlawhchhamna, i mualphona, i rilru natna channel aiin chung i hlawhtlinna, i hlimna, thil tha i lo tih thinna channel chu thlir thin zawk rawh. I hlawhchhamna channel ringawt i thlir fo chuan hma lam i sawn thei miah lo vang. Pathianin i tan a lo dah that malsawmna hlawm pawh i hai baw thei bawk hek lo vang. Channel thlak dan zir rawh, tichuan Pathian malsawmna i dawng ang. Tawngtaina Lalpa, vawiin hian ka tana thil min lo tihsak tawhte ngaihtuah turin ka rilru ka pe e. Ka channel en thin pawh hlawhchamna lam ni lovin hlawhtlinna lam en turin thuthlukna ka siam bawk e. I mi hmangaihna lamah ka rilru dah a, ka nun kawng peng tinrenga mal mi sawmnate avangin lawmthu ka hrilh a che. Isua hmingin, Amen. (From Joel & Victoria Osteen)
Posted on: Mon, 28 Oct 2013 14:19:18 +0000
Trending Topics
Recently Viewed Topics
© 2015