~By: Shonnou Suantak “Youtube tungtawn a a hiem-ngam dan uh,a dieh a US mi 2 leh British mi1 gimneitah a a thadan uh khovel pumpi muding a ang hakhiet(Upload) uleh,michin lungsim ah ISIS Movement hing kilang thakia a,a thei nailou te nasan in jong thei utna hing nei in,ISIS bang hi a(?),a Movement uleh a tup thupipen uh bang a diei(?),chi dotnate’n michin lungsim hingluo in,khovel pumpi bildaw leh buoipi ang hita uhi”. ISIS KICHI BANG E? The Islamic State of Iraq and Syria(ISIS)kichi khu Iraq a Sunni Muslimte sung apat hingpieng khie ahi a,Amauh khu Islamic State of Iraq and the Levant(ISIL) jong kichi ua,Iraq leh Syria gamte ah busa in huhamtah in thunei khum uhi.ISIS pawl khu Sunni Jihadist Group chia jong thei in um uhi.1999 in Abu Musab al-Zarqawi(Jordanian Jihadist)in tami group na phutkhie hi.ISIS te’n a tuppen uh ahileh Islamic State phukhiet ding chi ahi.2006 in US-Sepaite leh Iraq Govt(Sunni Militias)pangkhawm in ISIS helpawlte nasatah in nadou ua,suchimit manphiel ua,deibang a hatzou nonlou in koi uhi.Hinanleh,Iraq a pieng Ibraham Awad Ibrahim al-Badry,tuchieng a Abu Bakr al-Baghdadi kichipa lamkaina nuoi ah kum 2010 vel apat hing kidinsuo khetha kia uhi.Baghdadi khu 2004 lai a US Army te’n Iraq a opkhumlai un Falluja ah na mankha ua,US sepaite khut nathuohsa leh suongkul apat a na suohta khat ahi.ISIS te hing suhat in Iraq a Shia-Govt tung ah helna hingpan ngal ua,khovel a Terrorist minthang mama a kigen al-Qaeda te toh kizop in masawn mama uhi.ISIS Member te khu ata’ngpi a Saddam Hussein nuajui pawl chi a thei hi ua,Baath Party apat hing kipan ngen ahi uhi.2011 a Syria a Civil War um in Rebel Force te panpi in nasatah in gal vakap ua,a Muslimpi mama te nasan uh gimneitah a ang thasuh zialzial tah un al-Qaeda pawl in ngai thada in akizopna uh beisah law hiel uhi.ISIS pawl in panpitu hoitah nei ua,gamtamtah apat panpina ng uh kichi hi.Adieh in,Saudi Arabia,Kuwait,Turkey leh Qatar gamte apat panpina mu in,sum-le-paai ah hausa mama uhi.Iraqi Intelligence te suikhiet dan in ISIS te’n Gou(assets) $2 billion vel ding nei ua,tuajieh in khovel a Helpawl(terrorist)lah a hausapen ding a gintat ahi uhi.ISIS in Syria ah Member 50,000 leh Iraq ah 30,000 vel nei uh chi ahi. ISIS HELPAWLTE HING KIPAT DAN: Kum 570 in Mecca khuo,Saudi Arabia ah nau-ngeh khat na pieng a,amin khu Abu al-Qasim Muhammad ibn ‘Abd Allah ibn’Abd al-Muttalib ibn Hashim chi ahi.Amapa khu tuchieng in Mohammad chilel in kitheita hi.Mohammad hinkhuo i suutchieng in gimnei mama a,hinkhuo nuom anamang khalou chithei ding khop in gentheina-lunggimna tamtah na tuohtou hi.Apien masang in apa’n shisan a,kum 6 bep a upa ahi in a pienna nu’n shisan kia in,apu(grandfather)toh hing khosatou ua,hunsawtlou nua in apu’n zong shisan kia leuleu in,tuachi’n apaneu(uncle)Abu Talib ibn Abdul-Muttalibbel in hing khosatou hi. Kum 25 achin in Khedijah kichi numei khat toh kiteeng a,tapa 2 leh tanu 4 nei nan-uleh a damsawt zou umlou in,atanu Fatimah chilou adang teng in shisan siengpai kia uhi.Tambang a hinkhuo chituompi khat leh lamdang mama khat ang phuttou niainuai lai in,kum 40 vel ahi in ahinkhuo ah kikheelna thupitah hing um a,Mount Hira kichi ta’ng a kal a Pasian toh hunzahkhawm nuomsa a,chiindan anei in,kumchin in tuabang in hun hingzang toupeh ta hi.Tuabang a hinkhuo akumkum a ang zattah in,610 AD in vansawltah Gabriel kichi in Mohammad a ta’ngkalna’h va kimupi’a,Thukhun(Message)avapeta hi.Tuabang in Gabriel toh hing kimutuo jel in Pasian apat thutung(message)te Gabriel in Mohammad pesawn jel a,tuabang a thu amute anuajuite ahilsawn banah,Lekhabu ahing bawlkhie in tuakhu QURAN kichi hi. Mohammad in Pasian apat a athumu(Message)te dapkoi mailou in akhuo uh Mecca ah hing ta’ngkoupi a,Pasian khat um a,amabou i bieh ding uh,milim pasien biehna(Idol worship) tawpsan a,milim pasiente(Idols) i suhsiet gamsieng ding,chia a genleh Mecca-te ginglou(polytheistic)nam ahiman un pomsiem theilou ua,ngaidan kikalna nasatah um in buoina thupitah pienlaw a,Mohammad nuajui pawlkhat in shilaw hiel uhi.Tuabang a Mecca khomite’ huhamtah a ang gamtat tah un Mohammad leh anuajuite bitna ding mun sui in Medina khopi ah hing kisuon uhi.Tammi khuolzinna khu Muslimte tawndan(tradition)ah HIJRA chi in ngai poimaw mama ua,Muslim kumsimdan a a NI masapen(first day of Muslim year)ah lawm(celebrate)jel uhi.Mohammad in Pasian kung apat a athumute tukip chinten in hing ta’ngkoupi a,hasatna tampi tuoh nanleh nuatawnlou a manaw jel hi.Tuabang a atupguh na jieh in hing lawchingtou semsem a,nuajui hing pung semsem in,Muslimte kituohtah leh phungchingtah in hing khosa khawm thei uhi.Tuabang a agim-atawlnate hing gasuo tah a,hinanleh,632AD in damlouna khohtah jieh in aleitung hinkhuo anabeita hi.Mohammad ang shitah in a nuajuite Arab gamsung teng ah hing kithetha’ng ngal ua,tuakhu Muslimte kikhenna kipatna ahita hi. Mohammad in a shi masang in a dinmunluo ding koima ana guonglou a,a shinua chieng a anuajuite kivaipuoh dingdan bangma thuvaihah na nei sese lou hi.Tuabanah,adinmunluo theiding tapasal naneilou ahiman in,ashizaw in dinmunluotu ding thu in nasatah in hing buoi ngal ua, kithukim theilou in Group-2 in hing kikhenlaw hiel uhi. Group-A te’n Mohammad in Muslim sung a mipoimaw bangzat e khat teelkhiet a,tuateng in i lamkaitu ding ang guot toujel ding uh adeidan ahi chi’n pang ua,tualeh adinmunluotu ding in a Sungpa(azi’pa) Abu Bakr(Abu)guongding in hoisa uhi.Hinanleh,Group-B te’n Group-A’ te deidan pompieh lou in,Mohammad’ deina bang a Muslimte lamkaitu ding khu Pasian guot ding ahi chi’n pang ua,tualeh a dinmunluotu ding in atanu Fatimah pasal Ali ibn Abi Talib(Ali)guongvai chi kia leuleu uhi.Hibang a ngaidan kikal a ang buoi lemlum tah un,hatzaw hina hing kitupan ngal ua,Group-A te hatzaw in thuneina hingtawi in Abu lamkai ding in hing tungding ua,hinanleh Group-B pawl in thukimpi lou ahiman un,akal uah kituohlouna chii(seed)hing poukhe pan ngal in,kilang bawltuo in kituombawlna hingkhuo in zuitou den hi.Kum 1300 bang peisa nua a siltung hitananleh,tami hun a CHII(seed)hoilou kitu in gasuong hoi mama lai a,gapha semsem ding in kilang nalaiset hi. Tuhun a theidan in Group-A te khu Sunnis namte hi ua,tualeh Group-B te khu Shias namte ahi uhi.Sunnis leh Shias te kal ah buoina piengtou den a,kithattuo tuo mai in,kituombawltou den ua,kimudana chii kitupen beituonlou ahiman in kituohtah a hinkhawm dieldiel chi umlou in ui-le-keel bang in hinkhuo zangtou den uhi.Sunni Muslimte’n lamkai ding pen eima kiteel ding ma ahichi paipi touden lai ua,Shia Muslimte’n Pasian deiteel leh guot ding ahi,tuapen Prophet Mohammad hing zilsah dan leh Quran toh kituohzaw ahi chi’n tudet tinten lai uhi.Sunni leh Shia Muslimte’n Mohammad pen final prophet ahi chi’n pomtuohtuoh ua,Five Pillars of Islams gindan zui in,Quran pen ‘Holy Book’ chi’n pomkip tuoh veve uhi. Kum 1968 in Sunni Ba’ath Party te’n President Ahmad Hassan al-Bakr leh Vice President and General Saddam Hussein lamkaina nuoi ah thuneina hingla in,Iraq ah vai hing hawm uhi.Kum 1979 in Saddam Hussein in President hina dinmun thagum in hingluo tou a,kum 24 sung vingveng vaihawmna chiengkhut hingtawi hi.Hisung a alunglut huoi mama khat ahileh,Iraq gamsung ah population a et in- 55% Arab Shia,18% Arab Sunni,21% Kurd leh 6% Others- ahi.A mitamdan et in Shia namte tam mama nanleh,Iraq gamsung ah Sunni te’n vaihawmna dinmun luo tawntung moh uhi.Sunni nam apat Saddam Hussein in a lal hunsung in Shia namte bawl genthei mama a,tuombawl in gawt theina chinteng in gawt hamtang hi.Tuabang a Saddam Hussein tatsietna khu Shiate’n thei kilkel kawm in pan hingla ua,2006 in thuneina hingtu in Nouri al-Maliki lamkaina nuoi ah Sunni te gawt hing kipan kia leuleu uhi.Sunni leader-te Sepai thahatna toh mansah in bawl namse mama ua,Sunni namte’n thuohah sa mama uhi.Maliki Govt in Sunni te bawl namse sengseng Sunni namte’n anti-govt terrorists te hing panpi law hiel uhi. Shia Islam-te Iraq a atam mama vang un,World Islam population a et in tawm mama ua,90% Sunni Islam leh 10% Shia Islam chi ahi giap hi.Shia te tamdeuna pen khu Iran ahia,Sunni-te akhu Saudi Arabia lah ahideu hi. TULAI KHOVEL: June 9,2014 in Iraq gam a khopi thupi leh poimaw mama Mosul buluh in opkhum ua,agamsung a Thautui lahkhietna te thuneikhum in,nasatah in masawn uhi.ISIS pawl in gam a opkhum teng ukhu Belgium gamsang a lienzaw ta chi ahi. August 19,2014 in U.S Journalist James Foley(2012 lai a Syria a mang)athadan uh khovel a michin muthei ding in YouTube ah hakhie(Upload) ua,tuami’n mi tamtah lungphawng mama hi. September 2,2014 in U.S Journalist ma Steven Scotloff gimneitah in that in Youtube ma ah hakhe kia ua,atha masang un US President nasatah in galgiih(threatened) uhi. NGAISUT THAMCHING: A Muslimpi mama uh Shia Muslimte tung a lungkimlouna jieh a kiphut khie ISIS pawl in bang jieh a US-te nasan ang thapat uh adiei?chikhu mi tamtah buoina ahia,atamzaw ngaidan in ISIS pawl khu Saddam Hussein nuajui pawl kipawlkhomna apat hing piengkhie ahiman in,US-te’n alamkaipa uh athasah uh phuba lanuom uh hiva chi ngaidan nei uhi.September 13,2014 in British-mi David Haines kichi khat athana uh Youtube ah hakhe kia ua,British PM David Cameron kung ah US toh akizopna sutawp ding in giihna(threatening)bawl kia leuleu uhi.Tambang a Shia Muslim leh US-te mai hilou a Western Countries-te nasan tung a huham tah a ang gamtat tah un khovel pumpi ah lunghimaw hing kuongzah a,gamsung lamkai-te kikumtuo in ISIS te bangchi suh chimit ding(?),chikhu a Agenda thupipen uh ahita hi.US President Barrack Obama in galvan hoipenpen toh ISIS dou ahiding chia agen bang in doupan ngal ua,Jetfighter hoitahtah zang in ISIS-te um na biel lah bukap in um ngal hi.Tuabanah,Iraq ah US-army tamtah sawllut in um ngal a,apoimaw bang a sawllut be hilai ding chi’n thupuon anabawl ta hi.Bangteng hitaleh,Obama in ISIS Movement a khaamkhawl zou diei(?),chikhu khovel mite bildawna leh theinuompen ahita a,tuami dawnna khu hun hingtung ding chauh in ang hilchien thei giap ding hi.
Posted on: Sat, 20 Sep 2014 12:11:44 +0000
Trending Topics
Recently Viewed Topics
© 2015