CHHUIHTHANGVALA (PHUAHTU:LALNUNMAWIA) (at kan so ve lawk.. a mawl zual chhiarah!) Vengkil lam hmeithai in awng rawp tawh lam a tang chuan a rawn chhuak a. A chhak tlang tlai ni tla turin a chhun en ruih lam chu a pan a. Chulai tlang a han thlen chuan chawlhni tlai ni tla tur lawm nula leh tlangval te chu a kawp te te hian tlai ni tlak mai anhlau ang tih tur khawp a inthlahlel hian an lo thu a.. A chhak deuhah chuan thianho luhai lam tawh ni awm tak techu mei chhem thut bialin an aw rawl tawp tawp in an lo zai te vawng vawng a. Chung mi te tih buai phak loh chin mual liamah chuan thuthmun a rem a, tlai ni tla tur chu a thlir a. A suangtuahna chu a kawm a, chu lai hmun a nula leh tlangval te khawvel chu tlanchhiat san in a hmangaih telna nunhlui suangtuahna khawvel chang tawhah chuan a chen san a. A mah lo hmutu tan chuan chu ni tla tur chuan a mah chu a liam pui ve hial dawn ni awm hian a hmel chu a ngui zo a ni. Suangtuahna khaw vel a nunhlui chhui kir a a rum vang vang lai chuan a chhak a tlangval hawk lak te zai ri chuan a ti harh zawk a.. a han ngaithla a.. Di nen tlaitla eng ruai hnuaian maw, An leng vel zaleng zawng te chu. Mahse suihlungleng valmawia chuan, Lunglen zai sa in a di a au ve. A va run tak em, chu hla thu chuan! Ni e, hmanah chuan he a thutna hmun ngeiah hian a hmangaihi nen khan hlim takin vawina a thlir tlai ni tla tur khi an lo thlir liam dun fo tawh a ni. A ngaihtuahna te chu a bing mup mup a, he lai hmun a hmangaihna thu ropui ber mai rinawmna a chhilhhnana an tiam kha vawin hian a tan hriat reng turin la cham mahse a tiamtu ber chuan a kal san tawh si a le! Chu tlangval khawngaih thlak tak hmangaihna thutiam vawng tlattu,hmangaihna vanga thinlung tap mek chu tu tan mah han hnem rual a ni lo. A hnem theitu ber, hnem ngai a siamtu chuan anthu tiam kha vawng ta lo mahse a tan a rinawm reng,amah hmangaihtu hi vawi khat tal a rawn hre chhuak ve a ngem le? Tlang pang thlifim thaw ri heuh heuh karah chuan tlangval zurui zai ri chuan.. Dawn ve ang maw,a di ve khan? Chhuihthangvala ar ang a vai hi. Hnem thiam awm ang maw damlai khawvelan, Awm hian ka ring lo a na em lunglen zawng! Chutah zet zawng chu tlangval chuan a lunglenna chu harhfim a tuar chhuah rual ni in a hre ta lo a niang, hmeithai in a tanga a ah chhuah saranga tui chu a no ah chuan a thli a, an tlak pawp a.Mahse chu tui no khat lek chuan chu lunglenna chu a hnem dawn lo tih a hre chiang lutuk. Thawk an la halh a,a no chu a ti khat leha, a tlak leh pawp a. Ni tla turin kawlkil thlang a en eng ruih cham put mai lam chu a thlir vawng vawng a,a rum leh hak thin. Chu a in hnem tumna chuan a chhawk pawh hian a lang lo a, chutih laia chu tlangval hmel leh mitmeng chu a hmangaih chuan en ngat se, chu tlangval mit a mittui tling sarah chuan a ma hlimthla chu hai rual lo a fiahin a chhiar thei ngei ang le. A lunglen hre miah lo tlangval rual ho lah chuan tih el ni awm hrim hian anhla chu mihlim zaikhawm ang maiin an nawn tluk tluk mai si. A hla thu a cheng sak ni lo tih hriat tak, a tuartu tan a tuar har tawk lek si hian aw rawl rual chuan.. Nemten lunglen tuar nan ti zel in, Cawlh tui ning zu dawn zai a rel. Mahse a nem thei dawn chuang em ni le, Tah ruai ruai a lo nuam ta si. Chu tlangval, mipa fa chuan a mit a mittui tling chu a hru a!Chu a mittui pawh chu hmeichhe awmnem te in a kaih chhuah a ni! Chu tlangval khawngaihthlak tak chuan nunna a la neih miau a vangin ni chu eng tin tin e maw a hmangliam ve thei hram a. Zan thim rorelna hnuaiah chuan a khum tlanga thu in a hmangaih a mah phat santu chu a dawn kir a,an sul chhiah dun zawng zawng nen. Hmangaihna chuan a thinlung chu chhun ai a na in hliam mahse a hliamtu chu vawikhat pawh thiam loh a chan tir phal si lo. A hmangaih a ni tlat si! A khum bul a zu chu a tlak miah miah a,a rui telh telh a,a hmangaih chu a ngai zual telh telh a, a mitthla ah chuan a hmangaih nui hmel mawi em em chu a fiah telh telh si.A taksa in a men pui zawh loh thleng a in a, khum a a tluk hnawk thleng pawh chuan a hmangaih chu chu zu chuan a ngaihtuahna atang chuan a hruai chhuak zo si lo. Chutlangval vai tak mai chu lunglenna up teuh chung chuan a muhil ve ta. Chu ti tak a a ngaihtuahna in a ngaihtuah a hmangaih chu a mumang leh zel pawn a lo hria! Mahse ch mumang mawl chuan a hmangaih liam tawh chu a tak chang lo tur si hian a lo dinthar leh a! Chu tlangval chu a rawn harh hun chuan chu a mumang chuan a vel ngei ang le.. Tawnmang mawl tah i ti tam e mai.. Hai leh ruiin zan mu a chhing ta, engtak tawnmangan maw? hai ang thang a suihlung vai hmabakin, Mang laman a di a au e.. Thlifimte chuan a bul a batlangken kung ding laih te chu a chhem che lei lei a, tlai ni tla tur chuan chung thingbuk ler te chu a thãwi dan dan a. Hman a he hmun a an awm dun lai te ang kha chu ni se, mawi tiin a thlir kual leh ngei ang le. Mahse tunah chuan chung khawvel mawi ti a a thlirna hun lam pan chuan a chung van a chhum tleh del del te rual chuan a ngaih tuahna chu a kir vawng vawng si a.
Posted on: Tue, 02 Dec 2014 17:38:43 +0000
Trending Topics
Recently Viewed Topics
© 2015