Chinmi Hawile Hna, A voi khatnak Australia Chin Federation Conference cu a ra laimi October 3-4 tiang, Melbourne nichuah lei ah hlunghlai taktak in tuah ding a si cang. Atu tan kan civui hi Australia ram ah a voi khatnak bik, States kip ah a ummi Chin community hna ifonh in, kan tuah ding mi a si. Kan civui min a kengtu Australia Chin Federation (ACF) hi Melbourne, Adelaide le Perth i a ummi Chin community hna nih Australia ram pi huap Chin community aiawh ding ah dirhmi a si. Atu tan, a voi khatnak ACF Conference cu Australia Chin Community (Eastern Melbourne) nih inntek dirhmun lak in don mi a si. Naite ah, Media lei in Victorian Multicultural Award for Excellence a hmu mi Chin News Channel (CNC) nih Live-stream in siseh, CNC website in siseh, Youtube in siseh, Facebook le thawngzamhnak dangdang in siseh, kan civui tuahnak pawl vialte thawngzamhnak an kan ngeih piak lai caah, nan umnak ram cio in, kan civui ah nan rak kan telpi cio naklai kan in sawm hna. Kan civui ah, Australia Federal MPs hna, State MPs hna, Speaker of Victorian Legislative Assembly a simi Christine Fyffe, Local Councilors le Mayors hna le VMC Chairperson hna zong nih biachimnak in an kan telpi lai. Kawlram lei in Muko Editor Salai Joel Ling zong nih an kan telpi ve lai, visa a hmuh cang. Myanmar National Literary Award a hmu mi Pu Stephen Ni Kio le CACC Culture and Literature Department Secretary a simi Rev. Taan Mang hna zong nih, visa an hmuh ahcun, an kan telpi ve lai. Chin National Front Secretary General a simi Pu Zing Cung zong CNF Australia Regional Committee nih hi ACF civui lioah Australia rat tlawn ding in sawm a si i, caan a ngeih i Australia a rat khawh ahcun, ACF civui ah a kan telpi ve te lai. Kan civui ah: ACF Miss ithimnak, ACF Idol izuamnak, Lai Paih izuamnak, Laam izuamnak, Lentecelh zuamnak a phunphun (soccer, volleyball, table tennis), Capar le Biazai ttial izuamnak, Debate izuamnak a um lai. Atu tan kan civui ah, Australia Cozah nih University luh khawh nakding caah Australia ram i tang 11 le 12 siangngakchia hna nih an phitmi Victorian Certificate of Education timi VCE ah Chin Hakha holh kha subject pakhat dirhmun in tang 11 le tang 12 siangngakchia hna nih cozah sianginn ah cawnnak nawl an kan peknak zong conglawmhnak tuah chih ding a si. Cucaah, ram kip um Chin mi hna nih kan civui ah nan umnak ram cio in nan rak kan zawh cio naklai kan in sawm hna. CNC nih AFC civui caah Promo an tuahmi a tanglei Video zong rak zoh cio ding ah ka rak in sawm hna. youtube/watch?v=T01bn1GsU8o Upatnak he, Lian Ding Hmung Hotu Australia Chin Federation & Chungttuan Australia Chin Community (Eastern Melbourne)
Posted on: Wed, 24 Sep 2014 03:46:01 +0000
Trending Topics
Recently Viewed Topics
© 2015