Christmas Khatvei Chu Written by Vungzamuan Valte, Columnist Zogam Neulai in kum khat sawt kisa mahmah hiven, tunung a i ngaihtuah kik chia`h maktak ahi, tung zihzeh maw. Kum khat chihphet, kha khat le sawt eivoi, kar khat le hilai, school kai aningkhate diakin kar khat sung beihak sathei mahmah uhi. Nasem a niteng a kuankhete nasan in kiginni tunghak sa uhi. Ahia, nasep awlmoh leh school kai awlmohte a dingin hun bei hulhul, winter break ding ngak a parents ` day zatmah nuampen. Hun nuam khat bel, school kaite winter break ma in advance Christmas chi`n kilengkhawm ek zel hi, Hill Model High School Special na ahi hi. Pa Thawnkhansuan te inn ah 1977 in kilengkhawm a, nungak tangvalte kikhelah thei mahmah ahi ngei ding ua, zanhak hial uhi. 1978 kum in school ah kilengkhawm a, nuamsa mahmah mai uhi, adiakin Lamka lam apat nungak lian hethut khenkhat Singngat tangval te`n mialnuai ah mitmelhcheuh in samkhe thei huthut zel uhi. Piching heuhuauta, mite mitmuh a hoihlah lou, thachingpipi dainawllam ah liam chuanchuan zel ua, hailian thei uh kisa mahmah hi. Huchi`n advance Christmas len`khawmna School Managing Board in bandh puankum ta hi. Koulawi bel picnic bawl pen bandh hon puankhum mahle uh, khamzoulou uhi. Christmas a tun ding chiangin kisakkholhna lungsim ah om masa sek hi, kuate toh bangchi zat ding chih ahi tangpi, len`khawm peih ngelloute a dingin koilak hiam a kikulkhum anuam hi. `83 ahi, Nu Thanpar khualzin hiven, Kaizahlun toh a inn vengtu hikawm in giak ung, lupna zaw nuam mahmah, hileh le Zasemte inn toh kinailua inchin, a kikar ua baang in bilnei adiam? Zingkar thoukhia a, lamsak lam nga fefa kawm a, zun ithak thahah leh; Zasem nu`n, ah.. nougel nahi uhmaw zannitak a zankhua a houlim, honchita mai. Ka gente uh lah chu khawk theisim zawmah inchin, ki-ip tuntun in aom aka. Pawl buk bawl a chithak lukluk, singbul tomkhawm a tampi koihhoih em um, meitual sem hluahhluah. Kahpuk, pistol, thaulem leh akep ahuntawk neihchu nuam himai, puak ziahziak lel. I hong khanglian deuhdeuh a, gawphel khong kuahguk angai maimah a hiven, Singngat mite gitlouhdan i theihsa vek ahi. A guk a gamtang chi kihi inchin, mi thum leh li lelmah toh mahni tawk a nuamsa tei emem chihdante. Halpuak a kham kham na lam uah hon suthangpai unchin, gelatine bomb kon halpuak taktka u`chu aw, kuamah apau ngam hauh kei uh, hon thei omsilou u`chu, gin`lelh a leng ki-om kha khollou hizawmah. Mipi omkhawm noinoi nalak a le tel ut khollou, Christmas ni khong a kawltu tep nuanua, kibual a kuankhia, football, volleyball kimawl daih chihmahtak. Christmas ni in thangkam i vil a, vahlah a awk bangzaw aw, mas lamlam le kiphawk nawnkei veh. Huchi hinazenpi a, Khatvei 1977 ahi, ka pa`n khual hon zinpih, Sinzawl ah kar khat buhpua in kiloh ung, sipi leh si deihna ziakin. Sinzawlte chalakna mahmahna bel, a buhte uh bawng athawn a hon pawsak unchin, a si (sesame, oil seed) uh huchia hon leisak chauh dan uh ahi hi. Christmas ni ding nai hiai hiai, pap`n lah Singngat lam ngat sawmta mahmah lou, katere! December ni 24, 1977 chu mitkha ah mang nawnkei hial inchia. Sinzawl apat Phaitong lam hon kahtouhpih laizang, khitui naptui toh Singngat taang kigal etet maidan ahi, muh theihna mun mun apat i et guk chia Lungthul mual leh Songtal, Mualnuam taang te`n liahkhuk dimdem, Singngat ngai in vul ning niang maimah ingh. Khawmui zul in Phaitong ka tung uhi, bawng te`n a tunna mun uh thei hiven, inn khat pan char char mawk uhi, lamdang. Bawng long azak ualeh innsung apat amei apa hong kikhohkhia sungsung ua, ka U Thang, U Thang chi suausuau hial uhi, U Thang hong zin..haha. Ka pa mite` U Thang ahihlam huai ni a ka theih patna. Naupang hon kithalawp thei mahmah ua, bawng bang tuh deih thei mahmah zawmah uhi, ka bawng etkol ding kul kiikeei louhial in ni thum ka chaam sung un, gamlak ah ching ua, hoihtak in hon kepsak uhi. I theih thakthak leh, chikhum khong paw teltul a set voi, ka pa le chu aw, ei lah hon leisak ngei le hisam lou. Azi, ka nu Khanngai te inn ahi laizang kei dia, nuam dawm sak louh lah aw, kawi thahah. I nunawn hileh zong, pi leh pute itna kingah mahmah a, courtesy a U Thang uh, himahleh, nitak khomial in ka lung hong leng law mawk hi. Pipi lah ngai, lawmte lah ngai, tapsak lah ngai, ki men treiutriau lel hi. Papa`n puan-ak khat leh pheituam khat athak liklek hon dokkhia a, ka lukham nuai ah ka sel thilthen a, zingkar thoh ding hon phursak a, ihmut lim zong ahon pia hi. Christmas zingkar ahita, kikhop dia lah kineu deuh lai, kizahkai lai zawmah, puan-ak thak toh khekor thak toh Phaitong kholai ah ka pai zakzak a, numei te`n hon gal-et giaugiau un ka thei. Ka nunu naupa Pu Khansong te tangval hive un, nungak hel sek uhi, a nungak helna uh ka zuih chiangin ka maizum theilua ei set ve. Christmas sa nek hunta, bang bang hiam chu ka ne tei mial mial a, ka gil avah lam le ka thei kei, ka zum lua a. Ka zumna lam ah tui sianglou va dawngkha laizang zawmah ing. Ka pa bel makpa duat hiven chin, nuamsa ahita ve, pai ding gen pah lou zawmah. En kumthak inn lam a zat ki-ut tinten, awl awl a hon gamtat pih ei settawk ve. Sinzawl ah sipi e pi lou e, zanah e nah lou e, thaksik e sik lou e, paw tultul in (bawng 7 nei ka hi ua) inn lam ka manoh ua, vaiveih tuk a rang a pai ut mah leng thil hithei ahi kei, bawng vanpua toh nikhat in KM 15 kan kipai zoulou hi. Leimawi paikan, Khuanggin paikan, Kangkap paikan, Lungthul paikan, Chiangpi kan nawn, Mawngken kan nawn, Tuivelzang kan nawn, huchia Maukot kitung bangzaw aw, kithawhuai maisam ahi. Tuivai lei paikan, Meilum tou kahtou ngatngat, Singngat Zouveng Hanmual gamla`tungtou, huchia hanmual nai, akhai.. inn tun di chu khepen a rang zotzot eive aw! Kizang hauhhauh mahmah, lungsim aguk a nuinui maidan ahi hi. Pu Vungluai kiang ah van puak teng zuak malam ung, huchin I khanvual neih khat le nih te`n mitmul sauzen a honna enen sam ahihna uah, tulai thil hileh chu kipom chot a, ka ngoh ngoih theihna ahi takmeuh. Kumthak lap changchang in inn lum ka tung ua, ka thawhuai zawzen hi. Banghang a Christmas leh Kumthak chia innlum hichitel a ngaihhuai ade aw??? Phaitong khau ah kum khat Christmas lopna neizoulou dektak uhi, banghang hiam chihleh thuguk kisel tampi om hi. Nidang deuh lai in, Christmas chia sa neklouh ding ngaingamlou ngenta kihi hi. Sa ichih pen, huchia I duh hunhun a nek ding om mawk khol thahah louhial hi. Huaimah ziakin Christmas kingaklah lua ahi hi. Phaitong ah tuanvai te`n vok mat honsawmta uhi, hih khialkha ua, kipeksuah ta hi. Gamlak reserve ah lut mang hiauta hi. Aw! Ka ngaklah uh Christmas, koilam paimang na hiam, vok toh lou a Christmas zat chih thahah dan omlou himhim ahi hi. Tuanvaite a tek a khang gamlak ah vialdian sawsaw hial ua, man moh ten uhi. Kikhop lah nuam theilou, miteng in a khaa tanglou, Christmas khaa lengmang hiau hi, anguai a nguai gaivek ta ahi uhi. La zong sak chih om thei nawnlou chi uhi. Huchihlaitak in, pa kha Biakin kongkhak ah hong dak keukau a, tangval thahat leh papi thahat teng hong diangkhia un, Christmas sa nezoulou taktak ding ihi uh, hong kin un, chita hi. Kikhawmte a diang khe thei thei diangsuah suausuau ua, a numei leh a teklam leh naupang lam teng ngui leh bah takin sisun banghial in vul ning niang hial uhi. Huchi in, U Ginkhanthang pa thugentu ding hiven, Pulpit ah dingkhia hi, thugen lah haksa, gamlam thawm kia bildoh chiat ahihna uah, amah zong, thau gin ding ngak in dawi keekaw hialmah hi. Thau in PUUNNG chita, eh! SA NE ZOU DING I BANG UH, achih leh mipi bang hong harhkuau hialthok uhi. Huchi in, vok mante hong tung ua, tutung Christmas zaw sa ngawllou ding, hlim leh lawmtak in I zai ang u, chi`n Christmas LA satheihta uhi.
Posted on: Sat, 20 Dec 2014 04:13:06 +0000
Trending Topics
Recently Viewed Topics
© 2015