Cuerpo Policial Aruba mas cerca di pueblo “Mobiele Eenheid” cu demostracion na Kids Universe Camp Durante e periodo di vakantie grandi aki, Mobiele Eenheid (ME) di Cuerpo Policial Aruba tabata hopi activo, haciendo diferente demostracion na vakantie-kamp nan tur rond di nos isla. E team, cual ta specialisa den accionnan represivo, conoci como Riot Comando den pueblo, a duna demostracion di nan trabao y despues invita e muchanan pa participa hunto cu nan den un “training” special. E demostracionnan y intercambio amistoso cu nos muchanan tin como meta pa trece Cuerpo Policial mas cerca di nos comunidad. Tambe e miembronan di Mobiele Eenheid a duna diferente conseho valioso na nos muchanan, entre otro con pa cuida nan mes y preveni crimen. E impacto di e demostracionnan aki ta grandi, pasobra e muchanan ta comparti esaki na cas cu nan ruman y mayornan, pero tambe ora nan bay scol nan ta conta di e experiencia y ta comparti e consehonan aki cu nan amigonan. E siman aki e muchanan di Kids Universe Camp a disfruta masha hopi di e intercambio cu e departamento aki y ta papia tur dia ainda di nan experiencia. E lidernan y mayornan a keda hopi contento y satisfecho cu e bishita aki y e forma con a presenta e informacion di parti di Cuerpo Policial Aruba, na un nivel cu tur e muchanan por a compronde. Cuerpo Policial Aruba ta existi desde aña 1986 y ta conta awendia cu mas o menos 600 Polis trahando incansablemente pa brinda siguridad na nos pueblo. Orguyosamente Cuerpo Policial Aruba ta conta cu hopi respet internacional, specialmente pa su unidadnan special manera “Motor Unit”, “K9 Unit”, “Arrestatie Team”, “Mobiele Eenheid”, “Duik Team” y “Helicopter Unit”, sin lubida e departamentonan conoci di patruya y recherche cu ta bon entrena y capaz pa investiga y soluciona e casonan mas complica. Pa mas informacion por subi e website kparuba.
Posted on: Thu, 01 Aug 2013 22:43:26 +0000