DT: Thlaram 08, 2013 CHANCHIN LAWRKHAWM ** Delhi khawpuia Hmarnau haiin September 4, 2013 khan Hmar Christian Fellowship Delhi kum 25 zet a tling lawmna chu Apostles Methodist Church, Sector - 4, RK Puram New Delhi hmunah ropui taka nei a nih. Hi huna Rev. Rothanglien Hmar, Assam chu thuhriltu ni’n Pathien thucha ropui tak a hril. Silver Jubilee lawmna hun hih hun thuma ṭhe a ni a. Hun khatna hin Pastor Lalsiesang ZOte in keihruoi a. Upa Dr. Lalsiemlien Pulamte, Chairman, HCFD in Silver Jubilee hmang dinga fe hai lawmlutna le Silver Jubilee thukhawchang hrilna a nei. Hi huna thuhriltu dinga ruot Rev. Rothanglien Hmarin Pathien thucha a hril bakah, Ṭhalai pawl haia inthawk hlapawl ngaitlakna nei a nih. Hun hnina hi Pu Herbert Lalsanglur in a keihruoi a. Pu Hrangkaplien Sinate, Secretary, HCFD in ‘HCFD’s 25 Year’s Journey: A testimony of God’s faithfulness’ ti thupui hmangin kum 25 sunga Delhi a Hmar mipui hai Pathien chawibiekna khaitu, HCFD chanchin, ngainuom um taka hrilna a nei. Hi zova hin HCFD a mawphurna lo chel hlaktu, hmun danga lo um ta hai, Pu Laldatlien Tusing, Pu Kh. Thangdailo, Pu Dr. Chawngrolien Chonzik haiin thuhriltawi an nei. Unau Zomi Christian Fellowship Delhi, Kuki Worship Service, Delhi, Vaiphei Worship Service, Evangelical Baptis Church, Delhi, Delhi Mizo Inkhawm le pawl dang dang haia inthawkin lawmpuina thu an hril bawk a nih. HCFD lo inngirtu hai mi 6 hai kuomah chawimawina inhlan a ni a, an ni hai lai hin Pu Lalditlien Tusing, Pu C Thant Khobung le Pu Dr. Chawngrolien Chonzik hai chu hi huna hin an ṭhang. HCFD Silver Jubilee lawmna hun hrietzingna dinga siem souvenir, ‘Ebenezer’ chu Pu Dr. Chawngrolien Chonzik-in tlangzarna a nei bawk a nih. HCFD Mission field - Shiv Vihar Church le Bethany Covent School haia inthawka Pathien thu besana lemchang (skit presentation) an nei bawk a nih. Hun hnina zova hin ruoi ropui tak el kil tlang a nih. Mipui an khawpin an tlai hle. Hun thumna hi Singing Festival ni’n, Nk. Dorothy Lalneizo le Tv. Nehemiah D Ruolngul haiin an keihruoia. Rev. Rothanglien Hmar a inthawk Pathien thucha tawi ngaitlakna nei a ni bawk. HCFD ṭhalai pawl le mimal a inthawk hla ngaitlak a ni bakah, unau Delhi Mizo Inkhawm a inthawk hlapawl le malzai, Vaiphei Felloship a inthawk hlapawl le malzai, EBC a inthawk ṭhiengzai hai ngaitlakna nei a nih. ** Zani (Sept 7, 2013) khan HCFD Silver Jubilee Celebration Committtee ‘n Silver Jubilee review meeting, Pu Herbert Lalsanglur in-ah an nei. September 4, 2013 a Silver Jubilee hmang zo ta khah a hlawtling thawkkhat hle a ngai a nih. Silver Jubilee hmangna dinga budget cheng nuoi li dinga induong khah cheng nuoi nga lai zet hmusuok a ni a. Cheng nuoi hnih vel hmang zo in, a chuong ṭhahnem tawk tak ni a hril a nih. ** Zani (Sept 7, 2013) khan HCFD Silver Jubilee Celebration Committtee ‘n Silver Jubilee review meeting, Pu Herbert Lalsanglur in-ah an nei. September 4, 2013 a Silver Jubilee hmang zo ta khah a hlawtling thawkkhat hle a ngai a nih. Silver Jubilee hmangna dinga budget cheng nuoi li dinga induong khah cheng nuoi nga lai zet hmusuok a ni a. Cheng nuoi hnih vel hmang zo in, a chuong ṭhahnem tawk tak ni a hril a nih. ** Zani (Sept 7, 2013) khan Pu Hrangthangvung in, R.K. Puram, New Delhi-ah Hmar Christian Fellowship Ṭhalai pawl haiin HCFD Silver Jubilee Retreat le Insukhlimna hun an hmang a. Pu Lalramsang Hrangate a inthawk Pathien thucha tawi ngaitlak a ni a. Malzai le insukhlimna chi hrang hrang ṭhalai haia inthawk inentir a nih. ** Nk. Dorothy Lalneizo, Asst. Secretary, HCFD Ṭhalai Pawl chu a’nchukna a vawikhat zo (Ph.D Thesis submit zo) ta leiin veng tienga lo chawl ta dingin tuta kar hin Delhi khawpui suoksan a tih. ** Pi Lalremvel Songate, Aizawl/Lungthulien chu hlawtling taka enkawl zo ni ta in (operation zo) Indian Spinal Injuries Centre, Vasant Kunj-ah a inthawk a suok tah. Delhi khawtlang ṭhuoitu hai lo bawisawmna chungah a lawm em leiin a lawmzie suk langna dingin cheng 2000/- DHWA kutah an hlan. ** Wales le UK a Pray for the World rawngbawlna a ṭhang ve dingin tuolsung mi, Pu Dr. Upa Lalsiemlien Pulamte, Nk. Roslyn Lalumpui le Pu Laliensung Amo hai chun Sept 12, 2013 hin Wales pan an tih. An ni ruol hin, Rev. C Kawldinglien, Dr. Chaltonlien Amo, MLA, Tipaimukh Sub-Division & HAC Chairman le a nuhmei Pi Lalramsang Amo, Kestri, NEREF Ltd le Mizoram tienga inthawk mi dang 7 hai khawm fe veng an tih. Pi Lalremsiem, Pu James Lalrawngbawl, Jim Blessing, Pu Abel D Hmar, Rev. Darkung hai nupa chu Sept 5, 2013 khan an lo fe hmasa a nih. Sept 15, 2013 hin Swansie hmuna Pray for the World biekin hawngna nei ning a ta, hi biekin le biekin danga hin Sept 16-19, 2013 sung hin bunghei ṭawngṭai nei ning a tih. Sept 20, 2013 ah Cardiff khawpuia ṭawngṭaina hun nei ning a ta, kum 1904 a revival tlungna hmun, Llanelli a Sept 21, 2013 hin ṭawngṭaina hun hmang nawk ning a tih. Sept 23-26, 2013 sung hin London khawpuia a biekin hrang hrangah bunghei ṭawngṭai nei ni nawk a ta, Sept. 27 - 28, 2013 sung hin Scotland-ah ṭawngṭaina hun hmang ni nawk thung a tih. Sept 29 - Oct 2, 2013 sung hin South Wold, Eastern UK a biekin hran hrangah bunghei ṭawngṭai nei ni bawk a tih. Oct 3, 2013 hin Delhi hung chuongkai nawk an tih. Ṭawngṭaia lo san dingin mitin an fiel. ** Zani (Sept 8, 2013) Pu H K Kawllienthang in, R.K Puram-ah Prayer for the World Ministry member haiin ṭawngṭaina hun an hmang. ** Vawizan tieng dar 6:30 hin Pu Hrangthangvung in, R.K. Puram-ah Hmar Students Assn. Delhi ṭhuoitu dinga thlang thar hai le a hlui haiin sin inpeksawngna le meeting nei ning a tih. Hi huna hin ṭhuoitu hlui le thar hai po po ṭhang kim seng dinga inhriettir an nih. ** Nov 16, 2013 hin North East Tomchon Trophy, foolball inkhelna ṭan a ni ta ding le inzawmin, a ṭhang nuom hai chun taksa lo sawizawi ṭan a, HSA team a ṭhang dinghai thlangna huna ṭhang dingin HSA ṭhuoitu hai chun inhnikna nei hai an hriettir. Thu kimchang lem hung insuo vat ning a tih. ** DHWA executive committee in a lo rel ta angin, Sikpui Sports chu Nov 14 & 16, 2013 hin nei ning a ta, Sikpuiruoi khawm Dec 7, 2013 hmang ni bawk a tih. ** AIIMS, Delhi a thawk ding, Staff Nurse Grade-II Written result puong a ni tah. Hmar hming pakhat, Rebecca Ramvarzing ti a ṭhang.
Posted on: Sun, 08 Sep 2013 19:43:40 +0000
Trending Topics
Recently Viewed Topics
© 2015