DT: Thlaram 29, 2013 MIHRIEM VARNA INṬHANG PEI LE SAKHUONA - Joyful Z Khawzawl Ei ramah chanchinṭha a lût hlima inthawka tuchena ei khawtlang inṭhuoidan le inrelbawl dân, ser-le-sâng hmang ni khuo a hrim hrim ah zai khat a mi la khitdetu chu sakhuo ngainatna lungril ei nei hi a nih. Chu lungril nei ding le ringna kawnga mi chawilientu chu ‘Kohran’ hi a nih. Khawpui haiah ei lut rawn deu deu deu pei a, inchukna ṭha, sin thaw ding le khawsakna insang lem beiseina lien tak nei pum in. Ei hnam nunphung vawng zing a ni theina ding le; inpawlkhawmna, inlaichinna ṭha lem le inthuruolna hai dam a um nawk zuol theina dingin HSA Freshers’ Meet, Sikpui Ruoi le Inkhawmpui dang dang ei neina haiah a ser laia mei ang el a ei ngai chu ‘ṭawngṭaina’ hi a nih. Chu umzie chu ei khawtlang inrelbawlna kawnga le thil ei thawna kawng dang dangah ‘Pathien’ inṭhangtirin ei khawtlang lungril ngaituona-ah Ama hin hmun lien tak a hluo ti an entir bawk a nih. Sakhuo tienga inhnikna le chawisangna insangtakah khawtlang ei hmang mêk khêl a hin, sakhuona le thlarau thil tieng hrim hrim uksak lo khawtlang um thei dingin ei ngaituo hlak am? Um chu um thei mawl a tih. Amiruokchuh, chu hun chuh ei lo tawng nit a sien ei ngirhmun ding chuh ngaituo um tak ning a tih. Ei sakhuo chel le khawtlang nun hi ṭhehran thei lo, pakhat a sie chun pakhat dang khawm ṭha thei lo ding thil a nih. Ei sakhuo chel hih mi tam takin lo pet hmang sanin sakhuo dang lo va chel ta ang hai sien chuh, ei ṭawng le zie hin a mi phuor khawm zo tak tak ring a um nawh. Sakhuo inangnaw chuh la zuk theinghil ta inla, ringna inang naw lei khawm ni chuong lova inlawina pawl indang lei ringawta ei khawtlang tuorna hi ei hmu ṭhel ring a um nawh. Chu leiin ei sakhuo chel le khawtlang le hnam hi thlier dan le kei kawp dan ei thiem naw chun ei hmakhuo an thiem em em ding a nih. Mihriem hrietna le thiemna an ṭhang hrat em em a. Mihriem ngaituona a changkang deu deu pei a. Kum 50 a liem ta a inchuklai naupang hai hrietna le lungril le tulaia naupang inchuklai hai lungril hi ei khaikhin ta inla chuh in tlau hle’ng a tih. Chu changkangna in a hung invawr suok pui pakhat pawimaw em em chuh ‘chîkna’ – mihriem in ama le inzawm thil le inzawm naw hai a hmu-ah hriet chieng nuomna le hriet rawn a nuomna hi a nih. Hieng hun ei hung tawng mêk ta leiin ṭhangthar laia inthawkin zawna mak tak tak le ni danga la um ngai lo mihriemin ei dawng pei ding a nih. Mihriem hratna le thilthawtheina bâk a chawisang ding le chawimawi ding a um nawh, ti ngaidan intuna khawvel a hung lien deu deu pei leiin ei sakhuo chel le inzawm khawm hin chu khawvel le inmil dinga hmalakna thar le thil thar ei ser suok pei a ngai a nih. Pathien hmangaina le ringna kawngah infuituona le insawmdawltuo nekin science, logic amanih annawleh mathematics hai hmanga thil iengkim hrilfiena pawm dinga inchuktir le inhrilhriet ei thaw deu deu ding a nih. Asanchu, sawrkar taphawt inrelbawl nuom dan dam, khawtlang tin in khawsak an siem nuom dan hai le chuonghai po po chu thlusie lova dawmkanga a um zing theina dinga khawvel pumpui huop a mithiem le thuneituhaiin an siem le induong, ‘inchukna khawlpui’ rurel le hmathlir hai an rem dan hrim hrim hi ‘mihriem le a thilthawtheina’ bak a ngaituo ding thil um a um nawh, ti intuna awn zawnga bawl a ni tlat lei a nih. Lekha hriet le thiem nuomna lungril neiin hrietna kawngah insangtak tak inchuk, lekha tiem rawn le thiemna ngaina mi la tam deu deu ei ta, thlarau nei a siem ei nina ni lovin mihriem el ei nina thil ngaituona le sutna lungril nei ei hung nei lien deu deu zing ta a, a kakhawk ding thil ri hin ei na dar a suksiet el dim ti hi ngaituo um tak chu a nih. Ei ngaituona le khawvel ei lo en dan dam le, khawtlang in thil ei lo pawm dan hai hi thlakthleng ding le ding naw thu a ‘zawna’ dam; Hieng thil hai hi Kohranhaiin ei thilthawtheina le thuneina tha po po hmangin ei la’n sikpui thei ding tawk a lien le hrat ‘thil’ , ami tuom vel ta zing tu chu an nih. Hrietna le thiemna tuipui infawn vel in ei khawtlang vakam a hung nawt phak ta leiin lipui tieng kir dinga a fawn kir nawk hin mi fen sa ve’ng a tih, ti hi inlau a um takzet. Ei det tawk am leh? Hrietna hau le hau naw thu a ni hran nawh. Pathien hi mihriem siemfawm a nih/ a ni nawh, ti a varna le hrietna hmanga thu a inselna khawvel a nih, ei hril tak chu. Chuleiin, varna le hrietna tuipui infawn hlup hlup hin a mi nawt siet nawna dingin Kohranhaiin hma ei lak nasa nawk zuol a ṭul takzet a nih. Kohran le Kohran inkara tisa thil ah buoina le inhmelhuotna chite te hai hin ei thapui ei seng ral zo a, ei thaw ding tak ei hriet phak ta naw em em a nih. Bible thu chipchier taka hrie a, ieng ang zawna khawm hmaisan a hmasuon ngam mithiem tukhawm hril ding ei la um naw el dam hi inzak a um. Kristien kum za ei tling hnung khawma hieng ang mithiem le hrietna nei mi ei la um naw el hin ei Pathienthu lak dan le fepui dan a khingbaina tamtak a um a nih, ti an entir hle a nih. Hieng a ni lei hin ei ringna intlungna ‘Bible’ a thu umhai hi khawvel hrietna le thiemna chemhai vilikna a inthawk in ei humhim hne a pawimaw hle a. Chu ding chun Kohranhai le ṭhuoituhai ei inpuocha ṭha tawk am? Ieng angin biekin hmun hau in, lien le ropui tak tak hai bawl inla khawm thangtharhai lai a inthawka ‘zawna’ la hung suok ding hai hi ei dawn hne naw chun ‘Wales’ hai ang la ni ve ngei ei tih. Siksikrieu hai tuolchaina hmunah a la’n chang ding a nih, ‘zawnahai’ hin an mi pan hnai ṭhet ṭhet zing si a.
Posted on: Sun, 29 Sep 2013 16:42:57 +0000