DTUP pa 6 yüli 2013 / e kolumna aki ta unpoko drecha Bon dia Dios mediante. Amèn. *** Siman pasá nos a kai lat ku e kolumna, pe motibu ei e no a sali. Nos diskulpa. Tin hende ku no a keda masha kontentu ku e kolumna no sali. Ya, shonan mi fayo, trabou a kue pisá. *** E kolumna aki Di Tur Un Poko / Tiki dentro di poko lo kumpli 16 aña stret ku e ta keda publiká. *** Apesar ku tin tur medio i forma pa komuniká i hasi publisidat, tòg nos kolumna ta keda úniko, hopi hende ke pa nan potrèt keda publiká den nos kolumna pa motibu di espasio nos no por publika tur potrèt. Mi ta apresiá e kos ei un mundu. *** Djaweps selekshon di baseball Little Leaqeu Devishon Senior a biaha pa Sint Maarten pa representá Boneiru na e kampionato Latino Amerikano i Del Caribe. Anto pa despues nos ke keha ku hubentut ta kiko, ten nos ten ku yen pantomina mas. En todo kaso, awe nos muchanan ta hunga nan promé wega Dios yuda nan pa nan duna fuerte bataya i gana. Éksito. *** Ayera e wega a keda posponé pa motibu di áwaseru. *** Ora ku e muchanan ta den un bon direkshon hasiendo deporte, arte, drama, músika i baile kosnan postivo, nos ku ta grandi i instansianan konserní i empresanan di élite nan ku ta skruf pueblo ku nan preis haltu, no ta koperá ku nos muchanan òf ku organisashonnan di e índole aki. Anto ora e hóbennan desviá pa motibu di falta di liderato ku no tin na gran eskala den nos komunidat, komo ku lidernan tur ta haña skòp pa danki, pa motibu ku belasting ta mata nos, pueblo ke rabia i bisa ku hubentut t’esaki t’esaya. Ta nos mes por ke ku hubentut ta desviá òf hende ta desviá, ki nos ku ta grandi a aportá na nan òf kiko nos ku ta grandi no a hasi bon i duna bon guia, nos tur a wak pa nos mes lubidá e pober òf esunnan ménos fortuná. *** Ora bo ta traha i hasi trabou boluntario, bo pago ta “ Aanmanning, Enkaso büró, (Deurwaarder) abogado. Ken ta haña gana di traha òf hasi trabou boluntario pa komunidat pa keda kastigá. *** Djadomingo awor 7 di yüli pa 11or nos di 21 edishon “Dia di Arte” Pueblo i famia kompletu ta keda invitá pa ta presente den Parke Wilhelmina 11or di mainta. Bin mira nos hóbennan talentoso i sera konosí ku nos artistanan di Boneiru, manera Duo Sharella & Giovanni Wanga ademas Julina Felida & Nethanja Bendt Duo Ganadór di Boneiru na Caribbean Gospel festival 2013. Tin mas sorpresa ku varios Grupo Folklor. Henter dia tin artistanan di Aruba,Alemania, Kòrsou,Canada, Atrakshon speshal Los Hermanos Hurtado di Venezuela,Merka, Sint Maarten,Sürnam,Colombia i algu nunka bisto, nos kostureranan di Boneiru ku ta bin ekshibí nan bistínan trahá na man. Diferente wega pa mucha,pintamentu tantu di kara i tambe e muchanan mes por pinta i traha obra di man pa gana hopi premio. E famoso Bon kuné, stènt di boka dushi, kuminda krioyo i di Sürinam no ta hasi falta i mas ku klaro lo tin e bar ku lo ta bon surtí. Bin gosa,aploudí i apoyá nos artistanan lokal i kumpra un rekuerdo trahá na man pa bo keda rekordá nos di 21 edishon “Dia di Arte”. No pèrdè e oportunidat úniko aki. *** Ayera curasaleñonan bibá na Boneiru ta selebrá nan Dia di Bandera na Klup di ABVO. Tin un programa ofisial ku ta kuminsá 10 ku un santu sakrifisio di misa pa despues e partifestivo ku ta bai te den oranan di anochi. Kuminda kriyoyo bar bon sortí na preis di famia. *** Na Boneiru nos ta siegu pa nos mes kultura i baloran den tur aspekto. Nos no konosé nos historia i nos no ke sa tampoko di nos historia. Nos ta floho pa sa nos mes historia i falsu kontra nos mes hendenan. Mi ta mira un odio grandi ku tin den sierto organisashon den tur gremio, kristianismo, gobièrnu, parlamentario, prensa, salubridat, pueblo den su totalidat. Awor ku e dialogo sentral ta andando, ban spera algu positivo sali anke mi tin mi opinion reservá. E hendenan ku ta den tur tempu por a hasi nan best den mes seno drecha kos, pero a laga e baka hoga na pos pa awor trata di dempel e pos. Nos mes ta odia nos mes i no ta duna rekonosementu na otro i yuda otro pa nos a bai dilanti. Blo sinta wak ki otro ta hasi robes pa kastig’é. *** Nos a bira manera ku no ke pa nos mes hendenan bai dilanti ni ta den sierto posishon klave den nos komunidat, ya nos ta kla pa odi’é bring’é saka pia pe. Tin algun hende gusta pa tur kas bai malu na Boneiru pa nan sinti nan bon pa komentá i chèrchè otro. Ta manera sierto hungadó ku no ta dominá sierto deporte bon i nan no ta hasi esfuerso pa trein duru pa bai dilanti, nan ta keinta banki i pidi pa kualke di su kompañeronan faya asta pidi pa algu grave pasa pa nan drenta hunga. E mentalidat aki hopi di nos bonerianonan tin. Esunan frustrá sigur. *** Nos no ta gusta duna nos mes hendenan un skouder klòpje, pasobra nos tin kompleho di inferioridat pa duna nos mes hende mérito i pa duna rekonosementu i balorá nos mes kompatriota. Nos mes ta Omití nos mes, djis pa no duna bo próhimo e mérito kon chikí ku e por ta, nos ta Omití otro. Egoismo a penetrá te den nos bena nan, pero kualke ken si ku bin djafó sin nos sa kua patu a brui’é e ta bin hunga sabi i anto ta kore kere i ta koré karg’é poné riba un pedestal. Kisas e meresé un pedestal si, pero den un otro forma. Nos mes ta nos problema. *** Feria pa mucha grátis na Plasa Antriol huntu ku Avanti den koperashon ku Grupo Kara Kòra, Panchito Club, APEM, Magic Ed, Bonaire Jeugdschaakclub i Boneiru Youth Outreach Foundation ta organisá e feria aki. For di 10’or di mainta te 9’or am. *** Durante e siman ku a pasa gobièrnu di Boneiru pa medio di SKAL a organisá diferente charla i e apertura a tuma lugá dia 22 di yüni den Parke Wilhelmina kaminda tabatin presentashonnan di diferente banda lokal ku e tema nos herensha afrikano i a inkluí músika di San Juan i San Pedro. Na e okashon aki diputado Silvana Janga Serfilia a hiba palabrá i a hasi e apertura ofisial. Un siman kaminda hopi informashon di sklabitut, nos herensia afrikano. Awendia tin sklabitut ainda, shonnan makamba ta aktivo ainda i na Boneiru tin halá di bomba ainda. Djis wak rondó di nos i e leinan anti hende drechi ku nan a pusha nos kuné. Sklabitut di salon moderno, di sueldo. Wak kompanianan di Uitzendburo un humiashon di trahadó. Ta eksplotashon di hende tin awendia. Hopi trahadó ta traha bou di preshon i ta keda ultrahá. Bo ta traha hasi bo doño di trabou riku i abo mes ta keda pober. Un do`o di trabou ku ta biba bon aló ménos su trahadó nan tambe mester por bibá un bida desente sin ku kada luna bo ta kore kabes di gai pa paga bo debenan mensual. *** Ata otro kos aki, papel di registro sivil no ta konta mas. Awor nos a kaba yega den nos minsa kiko. Pa bo habri un kuenta òf bira kliente na sierto instansia finansiero bo mester karga henter bo selashi familiar trese pa nan, ku buki famia, sédula, pasport, resibu di WEB, Telbo, UTS, Flamingo TV, pa bo por habri un kuenta pa bo poné dòsplaka. Falta so pa nan bisa bin ku adrès di e shon ku bo sa bishita pa nan sigur ku ta bo mes. Inkreibel, kansa mi. Pa mi bira kliente soportá tantu pantomina asina mi ta laga numa. Instansianan konserní mester aktua ora ku un persona duna adrès robes, segun mi mester tin un lei pa sanshoná. Awor di kon hustu hende drechi mester paga pa pekadó. Hende iresponsabel ta gana merkado anto esun korekto tin ku paga pe. *** Mi ta haña ku tin skiming, ta e bankonan provokativo pa seguridat di nan kliente, pa motibu di algun buf, e hustu tin ku paga pa pekadó. Ki nos ta bezig kuné. Nan ta forsa nos tur manera pa nos plaka ku nos ta traha ku sodo di nos frenta, ta kastigá, no ta fia pueblo sèn ku e mes ta karga hiba banko. Aki na par di dia algun banko lo dal nan porta sera. Ohalá ku mi no haña rason. Otro ora bo ta para den rei te blikia pa un banko a disidí ku e ta kambia su sistema anto pueblo tin ku bira víktima para kasi 2 ora den rei, pa motibu ku e banko no a prepará si trahadónan sufisiente pa e sistema nobo na mi pareser. Den aña 2013 ku tur moderno ku mundu a bira nos ta tras tòg. *** Ami ta haña ku no por obligá un trahadó kobra via banko. E lei ei mester bin na vigor pa motibu ku bo ta forsa mi kobra na banko, banko ta gana sèn riba nos kabes esta tur transakshon ku nos hasi, anto nos no por aní fia sinkuria na moda di papia sèn ku nos mester ta duna banko. *** E kolumna aki no ta pa trapa pia di ningun hende, pero esun ku sapatu pas nan bistié. Komo ku a bira asina nos skirbi algu, algun hende ta yama nos heringá bisa nos ta tira kos òf skirbi kos pa nan. Ami no ta skirbi personal, pero e bèrdat nos ta skirbi, loke ku mi ta mira i tende. Nada personal. Punto. *** Te otro siman ku Dios ke. Skirbi pa Tico Janga. diturunpoko@hotmail sel.796 2020
Posted on: Sun, 07 Jul 2013 14:45:29 +0000
Trending Topics
Recently Viewed Topics
© 2015