Diferente Resultadonan Positivo di Job Fair Minister J.M. Francisca, di Desaroyo Sosial, Labor i Bienestar ta satisfecho ku e dos dianan di Job Fair, ku gobièrnu a juda organisá na Universidat di Kòrsou. Esaki a tuma lugá den wikènt tra’i lomba. Hopi ta esnan ku a elogiá e organisashon i a ekspresá e deseo, pa ripití e sistema aki mas biaha durante aña. Tin en berdat hopi di siña di e instrumento aki. Por ehèmpel, algun eksperto a trese dilanti den e foro, ku organisashonan laboral mes lo tin di ta menos pendiente di gobièrnu, i ta mas aktivo huntu ku otro i ku enseñansa. I nan mes organisá Job Fair. Segun e inister un Job Fair naturalmente ta efektivo ora ku gruponan grandi di buskadó i dunadó di trabou por traha afsprak ku otro. Pero tambe e Job Fair tin otro meta. Por ehèmpel e ta duna bista di e problema i solushonnan. Krusial ta pa e diferente aktornan siña konose e problematika i jega huntu ku otro aktornan na solushonnan. Asina, entre otro Universidat di Kòrsou a menshoná solushonnan ku nan ta ofresé diferente tipo di dunadónan di trabou. E Minister a skohe, ku e instrumento Job Fair aki, pa un aserkamentu nobo di e situashon, den kua no ta gobièrnu só ta desaroyá solushonnan pa problema. Ora ta papia di aktivashon di bario ta papia di aktivá habitantenan pa tuma mas responsabilidat. I den e kaso di aktivashon laboral esaki tambe ta nifiká mes un kos, i no warda riba gobièrnu. Ta basta organisashon grandi i chikí tabata presente. Tambe diferente tipo di organisashon. Organisashonan públiko i esnan di sektor privá. Por bisa ku e Job Fair ta un tipo di ban topa entre diferente partido i eksperto. Algu kompletamente otro for di un solisitut normal, ku ta un enkuentro formal i individual. E Job Fair ta mas informal, den grupo i dínamiko. Segun e Minister por siña di e Job Fair, ku nos ta bibando den un era den kua gobièrnu no ta e uniko ku ta planifika maneho laboral. Ta henter un ‘netwerk’ di planifikashon laboral ta desaroyando. Esaki lo por nifiká pa e problema di desempleo hubenil, ku esaki tampoko lo no mester keda un problema ku ta gobièrnu só ke bai solushoná. Di otro banda ta keda importante si, ku gobièrnu ta keda stimulá, reglementá i kontrolá e maneho laboral. Minister Francisca ta desea di jama tur partisipante danki pa nan aporte.
Posted on: Tue, 24 Sep 2013 18:59:53 +0000
Trending Topics
Recently Viewed Topics
© 2015