E karta akibou lo wòrdu entregá na Representante di Reino, Sr. Wilbert Stolte, un di e dianan aki: Na: Representante di Reino, Sr. Wilbert Stolte, p/a Ofisina di RCN, Kaya Internashonal z/n, PRESENTE. Boneiru, 16 di sèptèmber 2013 Apresiable Sr. Stolte, Tópiko: Petishon pa aklarashon tokante e ‘evaluashon’ For di media nos a tende ku e ‘evaluashon’ palabrá den Slotverklaring tokante e status nobo di BES, ya ta andando pa basta dia kaba pa ‘gana tempu’. Tambe nos a tende ku bo persona a disidí di posponé bo retiro te mei 2014 pa asina haña sufisiente tempu pa terminá e proseso di ‘evaluashon’, di moda ku bo susesor por kuminsá traha a base di resultado di esei. Den Slotverklaring a keda palabrá un periodo di 5 aña. Lo evaluá despues di 5 aña, pues na aña 2015. Den ki forma lo evaluá no a keda spesifiká, pero ta rasonabel pa suponé ku lo mester konsultá pueblo na un òf otro manera promé ku hasi e evaluashon. Nos ta di opinion ku un referendum ta e manera adekuado, pero otro opinion semper ta posibel. Pero nos no ta kere ku por tin diferensia di opinion tokante e nesesidat pa sikiera konsultá pueblo via di elekshon regular. Prinsipionan fundamental demokrátiko ta eksihí esei. Sin embargo, ounke ni 3 aña no a pasa ainda, nos ta komprondé for di media ku e evaluashon ya ta den full swing kaba. Ta bèrdat esei ta? Ta ki sorto di ‘evaluashon’ presis ta tumando lugá awor aki pa ‘gana tempu’? Kiko ta pasando? Nos ta pidi bo kortesmente pa aklará esaki. Ku Hulanda ta kapas pa ignorá prinsipionan fundamental demokrátiko, eigenlijk no mester sorprendé nos mas, pasobra Hulanda ya a forsa e ‘prinsipio di desigualdat’ riba pueblo di BES kaba. Esei tabata un violashon flagrante di prinsipionan fundamental demokrátiko. Tòg nos no por a kere ku Hulanda lo a kibra un afsprak por eskrito asina fásil. Sin embargo, ta parse ku Hulanda ta asta hasiendo esei awor? Si ta bèrdat ku e evaluashon di den Slotverklaring ya a kuminsá kaba, e ora ei akshon di parti di pueblo ta hustifiká. Anto e ora ei ta hustifiká tambe pa urgi bo persona pa tuma bo retiro mes ora, en bes di na mei 2014. Ya tabatin sufisiente motibu pa esei kaba, pero nos por soportá hopi. Pero pa kuminsá evaluá for di awor sin konsultá pueblo di niun manera promé, esei sí ta pasa e límite. Esei sí no ta soportabel mas. Manera bo sa, PHU ta keda pro integrashon den Hulanda. Solamente nos kier introdusí otro modelo, es desir e Modelo Federal. Nos ta deseá pa Boneiru bira un Estado Federal Outónomo dentro di Grondwet ku derechonan soshal/ekonómiko igual ku na Hulanda i ku un régimen di supervishon riba tereno atministrativo, finansiero i hudisial. Pa logra esei ta nesesario pa tene un referendum promé. Esei ta lógiko. Pero esei tambe ta nifiká ku e evaluashon no por tuma lugá te ora pueblo a ser konsultá, es desir promé pa medio di elekshon di 2015 i poko tempu despues pa medio di un referendum. Nos ta pidi bo persona kortesmente pa aklará e asuntu aki, pa lokual nos ta gradisí bo di antemano. Na nòmber di PHU, A.D. (Desirée) Croes, sekretario M. Bijkerk, presidente
Posted on: Tue, 17 Sep 2013 03:01:11 +0000
Trending Topics
Recently Viewed Topics
© 2015