EBOLA- THE DEADLIEST DISEASE ON EARTH He Ebola natna chimawm zet hi Africa khawmualpui ram thenkhat heng- Guinea, Liberia leh Sierra Leone ah te darh chhovin, kumin march thla atanga vawiin 8th August thlenga record ah chuan mi 932 lai an thi tawh a ni. 2nd Aug- 4 Aug chhung ringawt pawh khan WHO record dan chuan mi 45 zuk thi hman a! A tirah chuan he virus kai tawh mi 100 zela 90 te chuan an thihpui anga chhut a ni a, tun hnaiah erawh hmuh chhuah hma avanga inenkawlna avangin za zela 60 thi anga chhut a ni thung. Tunlai khawvela natna hlauhawm ber ber, AIDS, Cancer, Malaria etc. te aia hlauhawm lawr lak a ni a, khawvel puma a darh palh an hlau thawng zek zek a ni. Q1. Ebola natna an tih hi eng nge ni chiah? (Causative organism) ANS: Natna hrik te tak te ‘EBOLA VIRUS’ an tihin he natna hi a siam a, a natna hmingah ‘Ebola Virus Disease’ tih emaw, ‘Ebola Haemorraghic Fever’ an ti bawk thin. (Natna tihdam theih loh AIDS te, Hepatitis B te pawh hi Virus chi dangin an thlen a ni, heng atang hian Virus hlauhawmzia chu kan hrethiam mai awm e.) Q2. Chung Ebola Virus te chu engtia inkaidarh nge? (Mode of spread) ANS: He Virus hi khawi atanga lo piang nge tih hriat a ni lova, WHO sawi dan chuan a inthlah punna (primary host) chu Bak chi khat thlai rah ei thin, ‘Fruit Bats’ a ni a. Chung Fruit Bats te atang chuan Zawng, Chimpanzees, Gorillas, ten an kai chhawng a, chung Ramsate chil emaw, zun leh ek emaw, an taksa tuihnang leh thisen atang chuan Mihringin a kai chhawng ta nia hriat a ni. Heng Virus te hi 1976 daih tawhah khan hriat chhuah an lo ni tawh bawk. Mihringin he Virus hi a lo kai tawh chuan mihring taksaah a inthlah pung thuai a, chu natna vei mihring atang chuan midangah awlsam takin a taidarh ta thin a ni. Inpawlna te, khing ramsate atanga mihringa a darh dan hrang hrang ang te khian mihringah a darh thei a, mihringin vun pilh a lo neih chuan, hetiang natna vei thawmhnaw, mut bu leh inchiuna hman hnu atangte in a kai chhawng thei bawk thin. Damlo taksa atanga tuiril chhuak hrim hrim leh chung tuiril hruk faina emaw, tuirilin a tih-huh thawmhnaw leh puan zawng zawngte chu awlsam taka inkaichhawn theihna hmanrua a ni vek a ni. Midang hmai bul cheta damlo a hahchhiau (sneezing) emaw, a khuh (cough) emaw pawhin awlsam taka he natna hi kai chhawn theih a lo ni tho bawk. Mittui, hnap tui, beng ek leh ka leh ka chuktuaha infawh atangte pawhin a kai mai theih bawk. (HIV te hi chu vanduai palh fe emaw, fimkhur loh lutuk vang leh insum loh lutuk avanga kai chhawn theih a ni chauh va, he Ebola virus zet hi chu a hlauhawm bik em em a nih chu.) Tuna hian report thenkhatah chuan Ebola Virus air borne version a lo chhuak a, hei hi genetic engineering hmanga biological weapon siam chhuah thar a nih ring an awm a, conspiracy theory nen sawi zawmin, Elite family (khawvel pumpui sum chetvel dan controltu) ten khawvel mipui tam leh tawt lutuk an suat rem tumna hmanrua a nih ring an awm fur bawk..internet lamah hengte chu chhiar tur a awm nual a ni. Q3. He natna hi engtin nge a lan chhuah? (Sign & Symptoms) ANS: A tirah khawsik, taksa chau ngawih ngawih, tihrawl na, Luna (headache) leh hrawkna/thip ten a lang phawt thin. A hnu lawkah Luak, kawthalo, durh, kal (kidney) leh thin (Liver) tha lo, case thenkhatah chuan taksa chhung rila thi chhuak (internal bleeding) leh pawn lama thi chhuak (external bleeding) tein a zui leh thin. Ebola natna hi Malaria leh Cholera natnate nen khawsik leh luaka anga a intan vek avang hian damlo tam takin Ebola natna an ni tih an inhre lova, hmuh chhuah tlai a nih thin avang hian thi an tam phah em em niin Cyprien Fabre, West Africa office of the European Commission’s humanitarian aid department-a an hotupa chuan a sawi a ni. Q.4: He Virus mihringin a kai atanga engtik hunah nge heng natnate hi a lan chhuah thin? (Incubation period) ANS: He natna a rawn darh tirh kha chuan natna hrik a kai hnuah mihringin natna a vei nghal mai lova, a kai atanga ni 2 chin emaw, a rei berah ni 21 hnuah natna hi a chunga kan sawi tak ang khian a lo lang chhuak chauh thin a ni...hetih chhung hian natna hrikte hi taksaah an inthlah pung hman thin a, taksaa natna hrik eng pawha luh atanga natna lo lan chhuah hma zawng hi ‘incubation period’ an ti thin. WHO sawi dan chuan tun hnai teah hian incubation period hi a rei lo ta deuh a, ni 4-6 thleng a awh thin a ni. Q5: Hmanlai Ebola natna leh tuna Ebola natna lo darh ta hi eng nge an inan lohna? ANS: Tun tuma Ebola hrileng hi chu West Africa ram heng Guinea, Sierra Leone leh Liberia ah te a vawi khat lenna a ni a. Tun thleng hi chuan Democratic Republic of Congo leh Uganda te hi a darh chak berna hmun an ni a, heng ram pahnihte hi chu tlawh pawh loh tura ‘khar khip’ a harsa lem lova. West Africa ram pathumte erawh khi chu ramri ah lut leh chhuak controlna a that loh avangin, mi thenkhat, Ebola natna vei, rinhlelh leh thinhrik hlauh vanga inentir duh si lote an kal tlang zung zung mai a, hei vang hian hmana Ebola natna hri ai khan tunlai Ebola natna hri hi a darh chak ta bik a ni. Q6: Ebola natna veite chu enkawlna tha a awm em? (treatment, prevention & cure) ANS: Ebola natna damdawi hi an la hmu chhuak lova, mihring taksa thisen sipai (immunity) chak leh chak lovah a innghat deuh ber mai. Dam lo chuan tui a tlakchham fo avangin thisen zama taksa tichak thei tuiril thunsak te, ORS, electrolytes pai tam tawk tak intir te a ni deuh mai. Tuna an inenkawl dan tlang lawn chu- Dam lo chu tui tlachham lova siam, a thisen hloh zat ang pek let te a ni mai a. Tin, taksa chak loh avanga natna dang kai chhawn leh theih (opportunistic disese) ven nan antibiotics hmangin an enkawl bawk. Cyprien Fabre a sawi zel dan chuan, damdawi lam thiam thenkhatten he natna hi kai chhawn an hlauh em avangin dam lo enkawl lamah harsatna an tawk a, ram chhung clinic hrang hranga dam lo tharte an lo admit duh thin loh avangin a buaithlak zual hle thu a sawi a ni. Q7: Ebola damdawi hmuh chhuah nan hian hun eng chen nge ngai ang? ANS: Tunah hian Winnipeg, Canada-a National Microbiology Laboratory te, US sipaite leh damsawi siamtu company pahnih (Mapp Biopharmaceutical Inc.of San Diego leh Toronto-based Defyrus Inc.) te chuan he Ebola Virus do thei tur ‘Antibody’ siam chhuah an tum mek a, rei lote-ah ransa-ah test theih an intiam a ni. Defyrus ho chuan nakum (2015) kum chanve velah chuan hman theiha siam chhuah an inbeisei thu an sawi bawk. (Hei hi innghah bur nan chuan a hman tlak hrih loh, AIDS damdawi pawh tun thlengin an la siam chhuak lo a nih hi.) Q8: Khawvel ram dangah he natna hi a darh tawh em? ANS: August ni 2 khan American Christian missionary pahnih, Kent Brantly leh Nancy Writebol, Liberia a heng natna veite en enkawlna lama Ebola natna vei ve ta-te chu United States ah phurh luh an ni a, Emory University Hospital, Atlanta ah enkawl nghal niin August ni 5 thleng kha chuan ngaihtuahawm lutuk an ni lo. Dr. Michael Savage, Epidemiologist bakah US mipuiten Obama an sawisel a, enkawlna tha nei si lova Ebola Virus kai te United States a phurh luh ngawt hi an duh lova, ObamaCare promote tumna mai a nih ring an awm bawk.. ObamaCare act kha pass tawh mahsela RFID chip erawh tihluihnaa mihring taksaah thunsak an la ni lova, a duhte erawh chuan an timek bawk. US a he natna hi a darh palh hlauh chuan treatment emaw, medical hostory tih lan nan emaw, ngei ngeia ObamaCare a in register-a, RFID chip hi lak a ngai ngei dawn a, chu chu American tam takin an hlau thawng a ni. CNN in CDC a thawk an kawmnaah pawh khan, “Engvanga Americaa rawn phur lut nge in nih? tih zawhna an zawh kha “American an ni si a” tih ringawtin a chhang bawk. El Pais chanchinbu sawi danin Europe-ah chuan Spanish priest Miguel Pajares chu he natna vei hmasa ber niin tukin zing khan Spain ah phurh thlen a ni a, Madrid khawpuia damdawiin ah enkawl nghal a ni. New York lamah pawh he natna vei nia rinhlelh mi 6 an test tawh a, an vei leh vei loh erawh finfiahna a la awm lo. Chutiang bawkin Saudi Arabia ah pawh mi pakhat, kum 40 mi, Sierra Leone atanga lo kir chu Ebola Virus infection an rinhlelh avangin 5 Aug khan sample test neih a nih thu Health Minister chuan a puang a, a result ala hriat theih loh bawk. Red Sea City damdawiin-ah an dah hrang rih a ni. CNN Medical Chief Sanjay Gupta pawhin interview a neihna-ah, he natna hi khawvel pum puiah a darh chhoh thuai a ring a, khawvel mipuite a warning lawk bawk a ni. (Conspiracy theory nena an sawi zawmna te khi chhui chian a chakawm a, a bul te atang chhui dawn chuan a ni lovang tih rin a harsa khawp mai..a thui lutuk dawn si a, tawk phawt mai rawh se..a tul leh remchangah post hranin kan la chhui dawn nia.)
Posted on: Fri, 08 Aug 2014 04:26:56 +0000
Trending Topics
Recently Viewed Topics
© 2015