ELOMZALI ALIWELI PHANSI 18. UNtondolo laye wangena emhlambini kazelusile watshona eluzulane. Wayezula ayele lale evele ebona kufana nje yonke indawo. Bathi elilamehlo liyazibonela madoda, okokudla lokokunatha laye wangena kanje waphuma kanje kuthe kuhwalala laye esidla ngapha enatha amanzi. Wazulazula njalo manje ke wayesedinga lapho ayengafihla khona ikhanda. Lakanje kwakuleyinye imbodlela stolo lapho ezazisiwa khona kuluthuli lothudlana kwatsho khona ukuthi laye wafika wazithela ebandleni lakhona wenza lokho okwakusenziwa lapho. Phoke ubani njalo esengene ngaphi?,phela endaweni ezinjalo wayebizwa asabele. Wayesenza okokukhangela laba asebedakwe kakhulu baze balahla abesetshaya iminwe emibili ongathi wena ma uthanda ngomphetsheya uthi yi (two finger). Phela madoda abantu bayadakwa langaphandle uthole umuntu engasaboni ngitsho lakancane kodwa eqhulule inkalakatha zamehlo,yibo ke ababefunwa nguNtondolo labo. Wayethola imadlana yokudla leyokunatha amambodlela abemabili. Wayengasapheli ke kuleyondawo uNtondolo wawungafunga wena owawungazi uthi ibhawa leyo ngeyakhe nanko phela kwakuvalwa ekuseni ekhona,kuthi kuvulwa emininyana laye esekhona njalo. Wawuthola laye encedisa ukuthanyela lokukolobha khonapho okwenza ababesebenza lapho bamjayela sekusithi nxa besidla bambize badle laye. Waqhubeka esenzenjalo kanti njalo umninibhawa le wayelokufika ambone encedisa ukudobha amambodlela angaselalutho wabesemqhatsha wasebenza khona ukuthanyela lokudobha lawo mambodlela. Kwathi ke ngenyanga yesibili laye wathola indawo yakhe lapho ayezafihla khona ikhanda. Lanxa nje babehlala bebanengi kuyizidakwa zodwa kodwa ke kwakungefani. Ngale ekhaya emuva umaDube wayesedinge waze wabeka phansi. Wayesithi lanxa angaze ayebhula babemtshela nje ukuthi umfana wakhe uyaphila. Phoke yikho okwakumjabulisa lokho ukuthi uyaphila ekholelwa ekuthini ngelinye lamalanga wayezavuka ekhona ngakibo. UVela yena waqhubeka ebuhlaba engadlali,kanti njalo umthwalo kamaNkomo lawo wawukhula. UmaNkomo watshayela uJohani umkakhe embikela ngokuthi usezithwele nanko phela wayezitshela ukuthi uJohani ekufikeni kwakhe ekhaya wayeke wanatha laye emthonjeni ngakho umthwalo kwakumele avume ukuthi kwakungowakhe. UVela laye wayengapheli khonangale esiyakhulisa umntwana. UNtondolo eGoli ngitsho bakithi lokuthi ngelinye lamalanga ake acabange atshayele unina amtshele ngalapho ayekhona. Yena kuphela wayezibona esebunandini athi bunandi ngibulala nanko phela wayesithi mhla engasebenzi adakwe ilanga lonke aze enze okokuthwalwa sesiyalaliswa. Kusenzeka konke lokho isikhathi sasihamba singamanga. Kwedlula ubusika,nanko umnyaka usubanga emaphethelweni njalo. Hawu umaNkomo umthwalo wawusukhonale suthe puntshu. Khonokho nje wabeletha umntwana ongumfana owawungeke wabuza ukuthi wayengokabani. Phoke lawe uyabazi abantu ogogo uzwe sekuthiwa,hayi umntwana ufuze ukhokho wakhe owayezala uyisemkhulu. Abangapha konina uzwe bethi ufuze umalumakhe owabhubhayo,pho yintwenjani yonaleyo enjalo. Lapho nje uyabe ubhadwa ngodaka emehlweni emina kabha,kubalekelwa iqiniso ngoba ngesinye isikhathi amanga ayakha. Kodwa ngesinye isikhathi mangabe ufuna ukwakha ufuna ukungachithekelwa ngumuzi vuma lokho ozabe ukutshelwa yizalukazi,ungabe usabuza okunengi phela kuthwa ezalelwe esibayeni ngeyakho. Ngakho asazi ke ukuthi uJohani wafike wathini asilindeni nango uyeza esuka eGoli esiya ekhaya. ***Sukoluhle kini lonke. #Dumazile_Mntanami uhamba lelinye elithi #Imali. #UNkanini,UNkunzemnyama,kunye laboMakhelwane ogwalweni olulodwa olweZindatshana. Bakithi imbila yaswela umsila ngokulayezela,kanti usalindeni eZim tshayela uSenzo ku 00263776104250. EGoli shayela mina mathupha ku 0736821913 uzitholele uzifundele ngiyabonga ngoJesu Amen. Watch out for chapter 19 Pls like and share my page Mathanzima Dube - Writer/Ndebele Novels
Posted on: Tue, 11 Nov 2014 23:12:40 +0000
Trending Topics
Recently Viewed Topics
© 2015