ENERGIA POSITIVO! DEN CUADRO DI FORMACION DI UN GOBIERNO NOBO PA ARUBA EcoTech, Ecological Technologies and Training y ATCO a presenta nan plannan na formador Eman Peter Kelkboom “Nos proyectonan ta bon pa henter comunidad” ORANJESTAD- Den e ultimo simannan formador Mike Eman a tene varios reunion cu instancia, organisacion, fundacion, gremio, institucion y otro partnernan den comunidad pa tende di nan, nan sugerencia, deseo, proposicion pero tambe discuti hunto riba e retonan cu tin pa un siguiente gobernacion. Un delegacion di EcoTech a sinta cu formador pa duna un presentacion di loke nan ta haciendo y splica mas di nan plannan ambicioso pa futuro. Director Freddy Kelkboom a amplia un poco riba e encuentro cu nan tabatin cu formador Eman, cu el a califica como uno masha ameno y habri. “Nos a papia riba proyectonan cu EcoTech, Ecological Technologies and Training y ATCO ta haciendo pareu na e momentonan aki. Nan ta proyectonan hopi grandi pa e isla aki. Ecological Technologies and Training ta trahando actualmente riba un proyecto di gas. Esaki ta un proyecto na unda ta haci uso di e sushi cu EcoTech ta recoge y cu no ta wordo usa. “Tur e material cu ta resta despues cu nos planta a saca afo loke nos ta exporta pa 12 aña caba – entre otro papel, carton, hero, aluminium – ta wordo converti den gas. E material aki ta un cantidad considerabel. Despues cu via un proceso e ta wordo converti den gas e ta bay den un pipa straight pa WEB NV. Eynan e ta wordo usa pa traha electricidad y awa”. E proyecto aki por tuma lugar danki na e reformanan fiscal cu gobierno a introduci cu ta haci’e posibel. Kelkboom ta consciente di esaki. “Nos ta hopi leu caba cu e proyecto aki. E contractnan ta firma y nos a ordo un cantidad grandi di ekipo caba cu ta yega Aruba prome cu fin di aña . Planea ta pa na juli 2014 WEB NV ta haya su prome gas produci for di sushi aki na Aruba mes”. EcoTech ta haci tur esfuerso pa recicla mas hopi cu ta posibel. Esaki no tabata algo facil, pasobra cu conscientisacion riba esaki a bay poco poco. “Pero, den e 12 añanan cu a pasa nos a wak hopi crecemento den conscientisacion. Mas y mas nos ta mira cu e comunidad ta separa boter di plastic, carton, corant, bleki di aluminium y tambe otro sorto di bleki. Riba diasabra nan ta bin trece tur esaki pa nos na EcoTech. Pero nos mes tambe ta piki un cantidad di material di cas, hotel y restaurant. Casi tur hotel cu nos ta ofrece servicio tin un programa di reciclahe. Nos ta haci hopi, pero falta mucho mas hende pa wordo envolvi”. Esnan cu hiba bleki, boter, papel y otro material separa cu nan a acumula pa EcoTech riba diasabra ta haya puntonan di Fun Miles. Cu e puntonan aki por haci compras den varios pacus y otro negoshi. “Esaki a bira algo masha popular mes. Tur diasabra e lugar ta yen di hende para den rij cu ta bin trece nan material pa nos”. Kelkboom a bisa cu formador Eman tabata masha satiefecho cu e presentacion y plannan di EcoTech. ATCO tambe a duna un presentacion na unda nan a mustra kico nan ta haci cu loke resta di material di construccion manera beton, bloki y piedra. “ATCO a cuminsa cu un proyecto nobo cu ta keda cla pa fin di aña. Esnan cu tin material di construccion por trece esaki na EcoTech of e por wordo busca gratis. E material ey ta bay den un machin cu ta mul’e fini fini y ta segreg’e den santo, piedra chikito y piedra mas grandi. Material cu pa hopi aña ta wordo importa, awor nos mes ta produci pa wordo usa. Esaki ta algo bon pa henter comunidad”.
Posted on: Sun, 27 Oct 2013 23:57:51 +0000
Trending Topics
Recently Viewed Topics
© 2015