“EROI” PI SEMPRI” dicinu li mura tapizzati di cartilluna cu li facci risulenti di Paolo e Giovanni a la genti oramai surda, stanca, ‘ndiffirenti ! Di li discursi e la truvata di Cammarata certi parenti parinu quasi cuntenti puru si nudda scritta ‘nforma e dici di cui, né pirchì st’omini foru ammazzati! Nuddu chi cunta a la genti a li sculari, comu 11 essiri umani fimmini, picciotti, mariti e patri di famigghia cu la testa e lu cori chini di sònnura e spiranzi travagghiaturi onesti, sirvitura fideli di lu Statu amanti di la vita, di la virità e la giustizia foru fatti a pezzi cu quintali di tritolu! Certu non c’è dubbiu ca ‘nsemmula a tanti àutri, tutti cu chiù picca cu chiù assai sunnu "EROI" puru siddu qualcunu, figghi e figghiastri ni vulissi fari, ma iu ca pi misteri sempri penzu m’addumannu: ma semu propriu sicuri ca è chistu ‘nzoccu sti eroi vonnu? Semu propriu sicuri ca non s’arrivotanu nni la fossa senza gammi, vrazza, ciriveddu e cori? Ca non si fannu fradici li sicchi vudedda sintennusi ‘ncinzari di chiddi ca forsi sunnu li veri mannanti... l’amici di l’amici, ca ‘n tempi non suspetti strinceru patti e manu assassini? Comu fannu “certi” siciliani “certi” parenti c’ancora chiancinu genti ca non è bannera di cannavazzu addiggiriri stu rospu, strinciri manu pilusi di genti trubbula, ca si non fussi pi certi avvocati omini di liggi, ‘mprinnitura e magistrati vinnuti a “certa” pulitica, avissiri a stari ‘ngalera?! Comu si po’ pinzari ca tutti sti nnuccenti ca dettiru la vita pi nenti, po’ essiri cuntenta d’essiri arricurdata, d’un presidenti ca non si sapi comu annappìa, ‘ncanta comu sirpenti, ‘mbrogghia la genti ca tempu fa parrannu di Paolo e di Giovanni li chiamò: “antropologicamenti diversi pi natura”! Forsi lu mischinu sinteva diri ca si certi magistrati troppu onesti sunnu a iddu non parinu umani, perciò ‘nsemmula a lu degnu amicu: Dell’Utri etichettaru “EROI” lu stalleri Manganu: un mafiusu cunnannatu a 30 anni e mortu cu la lingua tra li denti, ca omu di panza era e non cantò, salvannucci partitu e culu di la galera! 25 maggio 2008 LINA LA MATTINA
Posted on: Thu, 11 Jul 2013 10:49:59 +0000
Trending Topics
Recently Viewed Topics
© 2015