EVM CHUNGCHANGA ZNP PRESIDENT PU LALDUHOMA THUSAWI (Dt. 20.3.2014 - Dawr 2:15pm Vanapa Hall) Vawiin 20.3.2014 khan UDF te’n Vanapa Hall-a campaign kick off an neihnaah ZNP President, Pu Lalduhoma chuan EVM chungchangah hetiang hian thu a sawi... Kum 2013 MLA inthlana hman EVM tih chingpen thu-a Pu Chhawnthuama leh Pu Lalthanhawla te inkhinna thubuai hi Mizoram leh a pawn lam thlenga mite ngaihven ber a nih avangin ngaihdan tlem han tihrik ve ka duh a. 1. Pu Chhawnthuama’n SMS hmanga Pu Hawla EVM tih chingpen vanga Sorkar siamah a puhna chu Pu Hawla’n dawta intihmingchhiat tumah puhin F.I.R a theh luh avanga he thubuai hi lo intan a ni tih kan hre theuh va. Pu Chhawna hian Pu Hawla a puhna hi a finfiah theih chuan, Pu Hawla leh a sorkar leh a party chu Ui ek pu tlukah lek a chhuah ang a, a finfiah theih loh erawh chuan mi tihhmingchhhiat man, thiam loh a chang ve thung ang tih chu mipuiten kan lo thlir dan a ni. 2. Hun rei tak chhung Charge sheet thehluh a nih loh hnuah ni 13.3.2014 khan thehluh a ni ta hram a. He thubuai chhuitu I.O thlak a ni te, Magistrate thlak a ni thinte hian titi a ti tam hle. Mi pakhat, EVM chungchanga thil hre ril tak nia sawi, tuin-emaw a ei turah mihring nunna atana pawi thei a pawlh ruk avanga hun rei tak nikhaw hre lova a awm te leh, chumi chhunga a Handset leh document thenkhat laksak a nih thu; facebook lama lo langte phei hi chuan ngaih a ti tha loin suangtuahna a ti sei duh hle awm e. Heng bakah hian ngaih ti thalotu lian ber chu Pu Chhawna an puhna atana an DAN tlawhchhan an tidanglam fo mai hi a ni. A tawpa Chargesheet an thehluha Pu Chhawna an puhna Section- te hi han enin, EVM tih chingpenna leh intihhmingchhiatna a tel ta hauh lo mai a. Chumi awmzia chu, he thubuai hian EVM chungchang a kaihhnawih dawn ta lo va, mipuite chan loh khânah a chhuak dawn ta tihna a nih chu. A tira EVM tihchingpena inpuhna atanga thubuai lo intan ni reng si, chulam kâwk miahlo tura her danglam a lo nih tak avang hian, Pu Hawla hi a tlanchhia a, EVM chungchang pumpelh dan a ngaihtuah a ni tih, hai rual a ni lo va, mitdel biru ang maiin a lang reng a ni. 3. Hetiang hian EVM chungchang hi pehhel tum eng ang mah se, Phantoma hian EVM tihchingpen a nihdan zawng zawng, a finfiahna te nen khawvel hriatah a la pholang tho tho ang tih hi, mipuite beisei dan a ni. Chutiang a nih chuan, he thila inhnamhnawih ve lote pawhin an tuar tel ang a, an sorkar leh party tan a la pawi hle ang. Chumi hunah chuan he thu hi Mizoram mai ni lo, India ram mai pawh ni lo vin, khawvel pum huapa tunlai thiamna hmanga suahsual bâwlna (International Cyber Crime) lian ber a tling ngei ang le. 4. Thuthlung hlui hunah Pathianin roreltute a ruat thin a, Zawlnei hmangin hriak a thih tir thin tih kan hria a. Amaherawhchu, Thuthlung hlui hun ngeiah pawh hriak thih ni lo, diklo taka rorelna pâwng lâk chîng an awm thin a, chung chu Pathianin a dem a ni. Hosea 8:4 ah chuan, “Ka remtih lohvin lalte an thlanga, ka hriatpui lohin hruaitute an ruat bawk a..... an chhiat phah dawn a ni,” tih kan hmu. Kum 5 dana kan duhthlanna chanvo (right) intihchingpensak chu a tuartu tan chuan na tak a ni. 5. Tun hnaia kan C.M tawngkam, “Hrangturo bial hian Ruling Party an thlantlin loh chuan tukkhum chhah pawh chhawn ila, an vui thei lo vang,” a tih hi a mawilo hlein ka hria. Pu Chhawna a puhna hi a thudik a ni tih finfiah a nih tak tak chuan amah zawk hi mi te’n tukkhum chhah an la chhawn tura chu a ni ang a, rei vak lovah sorkar thar siam turin kan inthlang tha leh mai dawn a ni zawk. I lo thlir ang u.
Posted on: Thu, 20 Mar 2014 12:50:01 +0000