Esther Cingsan USA gam sungah Zin Kawikawi laitak: Zomi innkuan USA (ZIUSA) te in tukum ZIUSA khawmpi 2014 ah Zinmang khatin asap uh Zogam lapi Esther Cingsan pen ZIUSA khawmpi man khit akipan USA gam sung Zomite omna State tuamtuam ah pai kawikawi a, Zomi pihte in zong itna,ngaihna tawh na muak ciat uh cih kiza ahih manin lungdam huai mahmah hi. Hih banga zin kawikawina, a tuntunna ah zin le leng do in, a buaipih genkhiat zawhloh Zomite khempeuh Topa mahin cidamna le daupai, matutna thupha namkim na piaksak hen. USA Pahtawina Thupi Tuamtuam Kipia: Tua banga a zin kawikawina ah pahtawina laipi bek hilo in sum le paii zong tawh Pahtawina kipia ziahziah cih kiza hi. Tuate sungah a ciamteh huai phadeuh pawl khatte: July 27,2014 ni in Cross Laizom Christian Church te in Zomi Studio ah Lakhum masapen bek tham loin, lakhum zawh Kum 31 cinna & Pasian phatna La bek sa in, Zomi le Zogam hong lamsang Zolia Pahtawina Laipi pia uh hi. Tua mah bangin Florida Zomi innkuan in zong abeisa August 14,2014 (Thursday) ni in Holy wood Rotary Club Hall ah lasak pawi Concert thupitak bawlpih uh a, tua lai pan Zogam Lasiam Kumpinu (Queen of Zomi Singer Award) cih pahtawina laipi mah pia leuleu uh ahih manin, hih banga minam sungah pahtawi huaite a pahtawi siam Zomi Kipawlna le Pawlpite vaihawmsiamna tungah zahtakna i pia hi. Esther Cingsan in hih pahtawinate a ngah ma-in, abeisa April 2-6,2014 sung tenga Tahan EBC biakinnpi akibawl Tuailai 2014 pan Zogam Lapi Award cih pahtawina kipia khin hi. Hihte banah kipawlna le biakna pawlpi tuamtuam pan zong pahtawina laipi le sum le paii cihte tampi ngah khin a, tuate a vekpi in pulak nawnlo ding hi hang. Esther Cingsan i tangthu tomno: Zogam, Tedim gam huam Gamlai khuami Tedim Lawibual veng ateeng Rev.J. Tun Za Kap (late) leh Sianu Vung Khaw Niangte sung pan a piang tate sung pan a nihna ahi hi. Aneu tung akipan Pasian in lasak siamna (Talent) Pasian in pia in, tua a siamna (Talent) uh a zatsiamna dingun a nu le pa in biakna sungah pahtah in makaih toto hi. Tua bang teng tawh EFCM pawlpi sungah khangkhia toto in, a pa mahmah in laphuak in a tate sasak pahpah in a Unau teng un Aw kihual pha mahmah uh hi. Lakhumna Kipan (Recording): Hun hong pai toto in, lakhumna Studio nangawn ah lakhum kipan ta uh hi. Zola bek hi loin Mizo (Lushai) la tawh zong khum in Mizote mah bangin siam uh hi. Zomi numei sungah lasa siam bek hi loin, Aw khumna (Studio) a lut masa pen zong ahi hi. Dorcas Quartet min tawh a lakhum zawh tu in Kum 31 cingta a, tuni ciang dong mah Zomi numei sungah lasiam a om zel hangin, kiphazo nailo ci leng kikhiallo kha ding hi. Tuni ciang dong amau Dorcas Quartet Album te Zomite bek hi loin, namdangte nangawn in kideih mahmah hi. Aw Tuampianna Nei: A mah pen lasaksiamna ah Awlin theihna Orginal ngiat khat Pasian in pia hi. A ma Awlinna le a lasak zia tungtawn in Zomi numeite sungah Awlingna hong kipankhia kicithei hi. Tua ahih manin Esther Cingsan pen Zomite ading a tuampian ngiat Awhoihna le Lasak siamna Pasian in hong piak bek tham loin, Zomi le Zogam hong lamsang Queen of Zomi Singer dinmun ciang dong hong makaihsak i Topa min i phat hi.
Posted on: Fri, 19 Sep 2014 06:24:52 +0000
Trending Topics
Recently Viewed Topics
© 2015