FATHER’S DAY (PAHAI NI) THUCHA - R.S Puruolte Vol.9 Issue No.11 9-15 June, 2014 Father’s Day hi khawvel in kum 100 lai ei lo hmang ta a. Hi ni hi a hung inher suok dan thua ngaidan chi hran hran a um a; chuong hai lai chun Washington nunghak SONORA LOUISE SMART DODD- in a pa a chawimawina dingin hi ni hi a lo suolsuok a ni a. Chu chu khawvel mihriem pawm dan tlangpui a hung nih. Ms Sonora hi nunghak te kum 16 mi chau a ni laiin a nu’n nauneina chungah a lo boral san a. Chutaka inthawk a pa William Jackson Smart chun a sang nautesen a nu’n a thisan le a sanghai an rengin paruk chu harsatakin a hung enkawl ta a. A pa inrimna le sawlna chu a theinghil thei nawh. Hmangai le duot taka an ureng inhruoizala um a enkawl zie chu theinghil ruol ah a ruot bawk nawh. Kum 1909 khan Nk.Sonora chu kum 20 mi a hung ni ta a, an biekin a Mother’s Day an hmang ni a sermon a ngaithlaka inthawk chun, “Iengleiin am Father’s Day hi inser ni bik nawng a ta” ti chu a lungril ah a hung siplien ta a. Apa in a sanghai le harsa taka Nu thanglova a lo enkawlna hai chu ngaituo zing in Father’s Day khawm inser ngei dingin thang a lak ta a. Kum 1910 June 19 chun khawvel a Father’s Day hmasatak chu Spokene Ministerial le Young Men Christian Association hai chu thang tlangin an lo hmang tan ta a nih. Nk.Sonora hin a tum dan taka a pa piengni June 5 ni thei sien ti a beisei a, sienkhawm inpuochana hun an nei naw leiin June 19 ah an lo hmang ta lem a nih. Kum 1972 kuma inthawk khan America President Richard Nixon chun Father’s Day chu June chawlkar thumna Pathienni chu America pumpuia inser dingin thu a lo puong ta a nih. Sungkuo a pa ngirhmun hi a pawimaw hle a, pa nei lo sungkuohai hi a hre chieng zuoltu an nih. Hmarhai khawm hi sungkuo a lientak chu PA hi a nih. Pa ni hi a awla PATLING ni ruok chu an tak. Ei Bible a ei hmu angin nuhmei lu chu pasal a ni ang hrim hin nu takin pa thuneina anga thiem a pawimaw khawp el. Nu in pa thuneina ang a thiem chun nauhai khawm hril ngai lovin pa an hung inza ve ngei hlak. Pasal lu chu Krista a hung ni nawk leiin pa khawma Krista rawn pum zing in sungkuo a enkawl a pawimaw em em. Pa ni lei el a mani thu thu a thil thaw hi a tha chuong kher nawh. Pa thuneina chu Krista ditzawng leh an mil naw chun pa chun a ngirhmun a hluo zo chuong naw tina a hung nih. Pahai thilthaw, chingdan le fak le dawn ei thaw ang hi nauhaiin hung thaw ve hai sien ei ti ang tak hin hringnun hmang thei inla nuom a um de! Nu’n sungkuo a uop lum a, Pa’n sungkuo a suk inzaum hlak. Pa’n sungkuo hi hmangaina leh a enkawl ding hrim hrim a nih. Sungkuo nunphung pangngai ah nauhaiin pa nekin nu an belbul lem hlak. Harsatna le mangangna taktak sungkuo ah hung tlung sien, Nu in “Ti naw ro/beidawng naw ro” a ti nek chun Pa in a hung ti hin an nuhmei le nauhai an thla a muong lem hlak. Nepolean kha ral hrat mihuoisen le hmingthang ani baka, a rawihaiin an ti le an inza em em a nih. Khawvel po po hnea a thuhnuoia sie tum a ni kha! Sienkhawm a nuhmei Josephine kha a thuhne in a thunun thei naw tlat chu tie! Ram rorel nekin sungkuo rorelna kha a huphur lem dai a ni kha! Eini lai khawm PA ti a inhrosa pum pum insungkhura mani nuhmei ngamlo iengzatam um veng ei ti aw! Bible thu angtak a mani pasalhai inza thiem hi ei thaw ding ni lem sien. Pahai khawhlona lei a nauhai, tu-le-tehai a suonthumna le a suon lina chena hrem hlak Pathien hi hrietzing ding a nih.
Posted on: Sun, 15 Jun 2014 12:17:26 +0000
Trending Topics
Recently Viewed Topics
© 2015